Home Sosial & Politika Tibar Fatin Kuarentena COVID 19, PR Husu Ba Ema Hotu Badinas Fase Liman ho Sabaun no Moris Hijiene

Tibar Fatin Kuarentena COVID 19, PR Husu Ba Ema Hotu Badinas Fase Liman ho Sabaun no Moris Hijiene

52
0
SHARE
 Tibar Fatin Kuarentena COVID 19, PR Husu Ba Ema Hotu Badinas Fase Liman ho Sabaun no Moris Hijiene

Caption: Prezidente da Republika, Dr. Francisco Guterres Lu Olo. [Foto: Copyright Media PR | 20.03.2020]

Relasiona ho Virus Corona ne’ebe mak sai pandemia iha mundu tomak, governu ho estadu Timor esforsu an hodi halo serbisu iha prevensaun. Ba jornalista sira Prezidente da Republika, Dr. Francisco Guterres Lu olo husu ba komunidade tomak atu fase liman beibeik ho sabaun ka uza dezinfentante ruma hanesan alko, labele kaer bebeik ita nia oin, karkita la fase uluk, pratika hijiene respiratoriu taka ibun no inus ho liman sikun bainhira fani, uza tixu, soe tixu foer ba lixu fatin, hadook an hosi ema ne’ebe mear ka fani, maibe labele hatudu katak hakribi sira. Importante buka ajuda sira. Se sente ladun diak, hel deit iha uma hodi deskansa, kontakta ho profisional saude nian karik presiza.

Prezidente da Republika mos informa ona governu hili ona Tibar nudar fatin kuarentena katak sei lori bai ha ne’eba, ema sira ne’ebe mai hosi pais afeta ka hetan ona virus Corona ka ema iha ona kontaktu ho ema ne’ebe iha moras virus corona. Durante kuarentena, sira sei halo teste no bainhira hatene ona rezultadu katak la moras, mak husik sira sai hosi fatin ne’e.

“Sira ne’ebe kazu suspeitu katak hatudu sintoma ruma maibe sedauk hatene loloos iha ka lae moras ne’e, pesoal saude sei lori ba hela iha sentru saude iha Farmosa, no ba kazu konfirmadu sira, tratamentu sei halo iha klinika Vera Cruz”, hateten Lu Olo, iha Palacio Prezidensia, 20/03.

Prezidente Lu Olo mos hateten governu prepara dadaun fatin sira ne’e no tenke foti medida ho koidadu hotu, atu fatin sira ne’e labele fo risku ba komunidade sira ne’ebe hela haleo iha ne’eba.

Prezidente husu ba komunidade atu fo apoiu ba governu atu implementa medida sira ne’e, hodi proteje komunidade no pais tomak, katak ema e’ebe suspeitu ka iha ona infesaun tenke tama kedas iha fatin governu prepara.

“Ita Presiza aprende hosi experiensia diak nasaun sira seluk nian, ne’ebe hatene ona oinsa prevene ka kombate moras COVID 19 hanesan Xina, Singapura, Vietnam no Macau hatudu ona dalan diak. Ita tauk to’o sai paniku, la ajuda ita hotu hasoru virus ne’e. Importante mak oinsa ita prepara -an no ajuda maluk sira seluk prepara sira nia an mos, iha munisipiu hotu. Liu-liu ita nia maluk idozu sira, ne’ebe sofre hela ho moras seluk no ita nia membru komunidade sira ne’ebe vulneravel liu. Ita Hotu, estadu no sosiadade tomak tenke fo liman ba malu atu prevene no kontrola Corona karik tama iha Timor-Leste”, hateten Lu Olo. * [ Zevonia Vieira | TAFARA.TL | 20.03.2020 ]