Home Sosial & Politika 20 de Maiu, PR: Hahalok Ruma Gasta Osan Barak, Maibe La Lori Benefisiu Ba Povu?

20 de Maiu, PR: Hahalok Ruma Gasta Osan Barak, Maibe La Lori Benefisiu Ba Povu?

95
0
SHARE
20 de Maiu, PR: Hahalok Ruma Gasta Osan Barak, Maibe La Lori Benefisiu Ba Povu?

Caption: Prezidente da Republika, Dr. Francisco Guterres Lu Olo. [Foto: Santina Lucia da Costa | 20.05.2020]

Loron Restaurasaun independensia ba dala 18, povu Timor la selebra tanba iha hela situasaun moras surtu Covid-19 no estadu emerjensia. Iha loron importante refere, Prezidente da Republika, Dr. Francisco Guterres Lu Olo hatoo mesajen deit tuir proposta hosi governu.

Prezidente da Republika hateten  povu hafoin luta ho terus oin-oin, durante tinan 24 nia laran, komunidade internasionál rekoñese duni Timor-Leste nudar Estadu Soberanu, ne’ebé harii iha 28 Novembru 1975.  Iha loron 20 Maiu 2002, afirmasaun ba Timor nia identidade nakfilak ba ezersísiu soberania ho rekoñesimentu internasional. Tanba hetan rekoñesimentu ne’ e,  Timor-Leste rejista  iha Nasoins Unidas, nu’ udar Estadu ida ho direitu no dever hanesan Estadu sira seluk.  Liuhusi mekanismu Nasoins Unidas nian, ita bele mós hato’o ita-nia solidariedade ba Povu no País sira seluk, iha momentu ne’ebé de’it.

“Presiza tetu klean kona-ba osan ne’ebé ita hasai tinan-tinan husi Fundu Minarai no gasta oinsá.  Iha hahalok ruma ne’ebé gasta osan barak maibé lalori benefísiu ba Povu?  Ha’u husik hela hanoin klean ne’e ba ita hotu, iha loron ohin, liuliu ba ukun-nain sira iha ita-nia ukun to’o agora mosu dezafiu oin-oin. Banhira haree ba kotuk, mandatu governu ne’ebé too rohan mak IV Governu de’it.  Governu sira seluk monu tuituir dalan tambasá? Ida ne’e sai preokupasaun boot tebes mai ha’ u, nu’udar Prezidente Repúblika.” hateten Xefe Estadu.

Prezidente da Republika mos hateten, tinan ida ne’e hahú kedas ho problema ne’ebé afeta mandatu VIII Governu, ne’ebé harii ho maioria parlamentar ida mai husi aliansa partidu CNRT, PLP no KHUNTO,  ne’ebé manán eleisaun antesipada iha 12 maiu 2018.

Biar maioria parlamentar bele garante estabilidade governativa, mosu husi maioria ne’e duni hahalok ida ne’ebé hatudu relasaun frájil ida, katak relasaun ne’e la metin entre sira. Tanba  Orsamentu Jerál Estadu 2020 la pasa iha Parlamentu Nasional, situasaun foun ida ne’e komplika Estadu tomak ninia funsionamentu no afeta mós Povu nia moris.

Entretantu, iha 13 Marsu 2020 ita hasoru konsekuénsia aat tebes husi udan-boot no bee-sai iha Dili. Família liu rihun haat mak afetadu. Bee-lori no hamate Timor-Leste nia oan klosan ida.

Iha 21 marsu 2020, ministériu saúde fó-sai notísia katak covid-19 tama tiha ona Timor-Leste. Tanba ita la preparadu, ita hotu preokupa ho notísia aat ida ne’e.

Nune’ e, ita hotu nia atensaun fila ba oinsá proteje-an no proteje ita-nia Povu husi moras ne’e enkuantu ita hotu buka mós haree oinsá tao matan lalais ba populasaun afetadu husi udan-boot no bee-sa’e iha  Dili no munisípiu sira seluk. Iha kontestu ne’e mak ha’ u deside fó fiar nafatin ba VIII Governu no Primeiru-Ministru atu hala’ o nafatin sira-nia knaar.

Haree ba ameasa boot husi COVID-19, VIII Governu ho preokupasaun propoin ba Prezidente Repúblika hodi dekreta Estadu Emerjénsia.

Haree ba dadus husi Organizasaun Mundial Saúde (OMS) no fonte seluk, kona-ba pandemia COVID-19, katak moras ne’e la’o ona iha rai barak, inklui iha Timor-Leste, no hamate ona ema rihun ba rihun. Iha loron 27 fulan marsu 2020, ha’u dekreta Estadu Emerjénsia ba fulan ida, liuhusi autorizasaun Parlamentu Nasional nian. * [ Santina Lucia da Costa | 20.05.2020 ]