Home Patriota Amali: Maske Iha Mate Laran, Konsege Salva Joven Seluk Nia Vida

Amali: Maske Iha Mate Laran, Konsege Salva Joven Seluk Nia Vida

104
0
SHARE

“Kamu sekarang ini berdoa saja, lubang untuk kalian sudah lengkap! Jadi, sampai disana tembak mati tinggal dorong masuk saja!” Ne’e mak liafuan TNI fo ba Amali ho nia kolega sira iha rate laran.

Joven barak mate, kanek todan, no halai hodi salva an hosi brutalidade militar Indonesia nian. Maibe laos Amali, nia hili dalan salva ninia maluk joven seluk. Espiritu abnegasaun ne’ebe bo’ot teb-tebes mak belit hela ba Amali, nudar joven iha tempu ne’eba. Statua joven mane nain 2 (ida kanek toba latan hela, no ida seluk hakneak fo hela salvasaun) iha Igreja Motael nia oin mak sasin ba Amali ninia espiritu solidaridade. Amali mak joven ne’ebe hakneak fo hela salvasaun ba Levi ne’ebe hetan kanek todan, joven maluk ida, Amali rasik la koinese nia iha tempu ne’eba.

Sergio Filomena Marques, nudar Becora oan, ho nia aten brani hasoru risku boot iha manifestasaun ne’ebe involve ema rihun ida resin ne’e. Sergio mak nia naran sarani nian, maibe ema hotu toman bolu ho naran Amali. Journalista TAFARA.ORG, hamutuk ho nia oras ida resin, hodi rona no hakerek istoria murak ne’ebe, sei metin nafatin iha ema barak nia fuan no memoria. Amali momentu ne’eba sei eskola iha nivel SMA (eskola sekundariu), nudar futebolista iha klube ida ho naran HIBER, katak Hidup Bersama (Moris Hamutuk). Amali mos ativa iha kanta koru igreja Becora nian, no mos nudar xefe Mudika (muda-mudi katolik). Amali joven ida ne’ebe mak iha nia talentu iha arte, Amali hanesan toka dor, nia konsege hakerek muzika ida ho titlu ne’ebe konyesidu tebes, nia titlu mak “Foin Sa’e Timor”, ne’ebe kanta husi artista Abito Gama.

Maske Amali invole nia an barak iha atividade barak, hanesan joven ida, nia la husik tempu hotu lao liu deit. Nia involve an iha movimentu klandestina hodi kontibrui ba luta ukun rasik an nian.

Amali, oan husi Joao Marques no Filomena Pinto, hanoin hikas loron ida antes 12 Novembru 1991, ho lian lian todan, nakonu ho sintidu triste nia konta saida mak akontese iha iha tempu ne’eba,“Iha dia 11 kalan ne’e, hau toba tuku 12 kalan hanesan ne’e. Depois hader sedu. Hau sai husi uma oras tuku 6:00 dader, tamba uluk ne’e ami sae bis.  Hau ho maun Mateus iha bis laran ami la konversa, tamba uluk ne’e mauhu sira ne’e barak, tan ne’e ita labele kolia arbiru”.

Imajina situasaun iha tempu ne’eba, manu fuik no animal sira seluk deit mak bele hasai lian, maibe nudar ema iha tempu ne’eba, tetu dala barak wainhira atu koalia lia fuan ida ka rua kona ba perparasaun 12 Novembru. Tan ne’e nonook mak dalan diak ida hodi bele seguru nafatin ba to’o iha fatin bis para hodi hatuun Amali ho Mateus hodi hakat ba Igreja Motael. Amali kontinua hatutan nia istoria dehan,“hau ba misa, hau tau kaos no kalsa levis. Hau sai husi uma, la konsege koalia lia fuan ida ba pae ho mae. Sira hatene deit katak hau ba tuir misa. Informasaun fo sa husi radio, momentu ne’e Ogy Osman mak koalia iha radio, katak iha 12 Novembru sei iha misa, iha Motael ba matebian Sebastiao nian. Entaun ema hotu hatene, maibe kona ba demonstrasaun ne’e ema tertentu deit mak hatene. Hau too igreja, langsung tama iha laran, hamrik besik altar. Misa hotu sai mai liur, langsung hakilar viva”.

Liafuan klandestina esplika duni buat barak, bainhira ema ida konta istoria kona ba luta ba ukun rasik an nian. Amali: Iha Mate Nia Laran, Nia Salva Joven Seluk istoria hatudu duni katak nia rasik la informa ba ninia inan-aman kona ba demonstrasaun ne’ebe sei akontese hafoin misa.

Amali nota katak iha Igreja Motael nia oin, ema kontinua temi k’nanuk igreja nian no orasaun hodi akompanna joven lubuk ida, ne’ebe lao husi tasi ibun Motael, hodi ba to iha rate Santa Cruz.  Maioria joven uza farda eskolah SMP no SMA mak partisipa iha manifestasaun ne’e. Amali ne’ebe maun alin hamutuk 12, konta tuir lalaok manifestasaun ne’e,“Sai husi misa,ema la avizu maibe ida idak hahu hakilar dehan “Viva Timor-Leste” to iha kantor gubernur oin (agora Palacio do Governo) ema tuda malu . Hau lao nafatin ho maun Luis, hakilar tuir dalan tama to santa cruz. Ami hakilar  ne’e, atu bele dada intensaun husi militar sira nian, komesa husi tasi ibun, marinir sira sai mai hare hotu”.
Situasaun komesa manas, bainhira manifestante sira lao tesik ba Kantor Gubernur (agora Palacio de Governo), grupu balun derepente tama, no provoka hodi tuda malu. La hatene los grupu ne’ebe tuda apoi los ida ne’ebe? Apoiu militar Indonesia ou manifestante sira? Maski nune’e, joven sira kumu liman hodi hakilar nafatin Viva Timor-Leste, no Viva Xanana Gusmao. Balun kontinua reza no hamulak. Joven sira hatudu duni sira nia aten brani iha farda makerek nia oin. Kosar wen suli, turu to hasan, hikis kosar wen, kontinua lao ho espiritu ukun rasik an nian.

Balun hahu sente isin fulun komesa hamrik, matan komesa hatudu tauk, karik buat ruma atu akontese. Amali, nudar kompozitor ba muzika Foinsa’e Timor, ne’ebe inspira joven sira, nudar fini Timor nian, ho nia lia fuan rasik nia konta tuir,“husi lampu merah to mai iha estadiun, kolega ida foti fatuk tuda vidru. Sira sona kanek militar ida. Balu tuda sala kona fali maluk sira, no ran suli, jadi kolega balun sai husi linha tanba komesa kanek. Hau haree ema serang mai ne’e, fatuk tuda mai ne’e, hanesan udan tun, balun halai ses, balun halai hasoru”.

Manifestante sira lao nafatin ba oin, brani kahur tauk. Intelijen Indonesia iha sira nia leet. TNI sira iha dalan-dalan mos fo intensaun maka’as ba joven lubuk ida. Amali nia lia fuan dehan mental tenke forte, ida ne’e los duni. Mental mak sai baze fundamental, hodi la hatudu tauk ba TNI no intel sira, no brani defende rai doben ida ne’e. Wainhira ema ida sona kapitaun TNI, Amali laiha hanoin, atu halai sai husi manisfestasaun ne’e. Tanba Amali perparadu ona no fo fiar ba Maromak, saida mak atu akontese, depende tuir Nai nia hakarak.

Amali haktuir, “hau mental perparadu ona, hakarak ka lakohi tenke halo duni. Hau la hakfodak liu, tanba hau rona lia fuan husi hau nia inan no aman, hatete katak o nia tiu sira mos mate ba rai ida ne’e. ida ne’e mak motiva hau atu brani.”

Manisfestante sira kontinua trata TNI sira no nafatin hakilar Viva Timor-Leste, Viva Xanana. Lia fuan viva nungka ses husi joven sira nian ibun. Manifestante sira pronto ona atu fo sira nia vida ba iha mate. Iha opsaun rua deit mate ou moris. Amali mos dehan katak durante manifestasaun joven sira trata militar Indonesia sira, maibe militar Indonesia sira hateke deit. Joven ida konsege sona kanek kapitaun Indonesia ida, iha momentu ne’e militar balun ameasa dehan,”depois imi to’o iha Santa Cruz mak ami (militar Indonesia) tesik ba. Los duni, militar Indonesia ba duni ho kareta hino. Sira serku hosi kedas rate Seroja nian to’o ba rate Cruz no prontu atu tiru ami. Amali rona deit pistola tiru dala tolu, maibe hafoin ida ne’e kilat bo’ot mos tarutu nab-naban. Jovens sira la konsege tau aifunan.

Amali ne’ebe agora dadauk servisu iha Centro Juventude Becora, ho ekspresaun seriu konta tuir istoria ne’e ba jornalista TAFARA.ORG.

“TNI sira mai ho kilat kompletu. Pokoknya komando fo aba-aba tiru dalarua deit, tuir fali mai ne’e razada deit ona..paaammmm..pammmmmm..pammm. Hau hamrik iha estrada, ami sena malu, hadau malu tama rate laran. Hau konsege tama, no salva kolega Mateus. Hau hit nia tama iha portaun maibe  monu kedan, hau hit tau nia iha rate leten. kolega Levi halai mai monu kedan iha hau nia oin. Nia hetan kanek rua, ida kona tiru no ema sona. Hau konsege salva ema nain rua. ida hau salva premeiru ne’e naran Maritu Cardozo. Hau ajuda tiha Levi, kuandu militar sira tama, nia sei toba nafatin iha rate leten. TNI baku nia, baku nia ba paredi makas los too nia monu. Militar sira baku ne’e iha hau nia matan laran, ema uza ai baku nia too ai rahun. Ita hare hanesan mate ona.”

Rate St. Cruz nakonu ho ran sulin, ba rai leten, ba rate leten, no mos baki loloon. Amali sente laran moras wainhira lembra fila trajedia 12 Novembru 1991 ne’e. Joven barak kbi’it laek, laiha forsa atu proteje an, maibe sira prontu ona atu simu konsequensia ida ne’e. Amali ho espiritu joven ida nian, hatudu ninian solidardade iha tempu ne’eba, konsege salva ema balun, maske nia la koinese. Maibe tanba joven hotu iha hanoin ida deit, hakarak ukun rasik an, Amali esforsu nia an, hodi salva joven balun. Ho Amali nia liafuan rasik nia haktuir,“hau la koinese Levi, maibe tanba ita halo asaun hamutuk, nudar Timor oan, sentimentu solidaridade ba kolega funu nain sira, ita tenke tulun malu. Tan hakarak tulun ninia kompatriota Amali mos atu hetan susar. “Hau nia tilun ne’e, ema atu kua kotu tiha, sira dada hau ba liur, sorte bapa ida mai dehan sudah, sudah”.

Amali mos hatutan katak, iha tempu ne’eba, Timor oan balun servisu hamutuk ho TNI Indonesia. Sira ameasa joven sira ne’ebe tuir manifestaun katak koidadu lao iha dalan, imi nia sei moris la hakmatek. Sira tau odio ba sira nia maluk Timor oan seluk ne’ebe bolu sira Mauhu ka Bihuu. Tan ne’e mak sira hakarak koa tiha joven sira ne’ebe hakarak ukun an nia tilun atu nune’e, sira (Mauhu no Bihuu) bele kontinua koinese nafatin joven sira ne’e.

Bainhira military Indonesia hapara sira nia tiru, joven barak mak mate no kanek todan. Joven sira iha esperansa atu hetan tulun hosi ema seluk, liu-liu Amo Lulik sira. Tanba iha tempu ne’eba so Amo Lulik sira mak livre uituan atu lao tun sa’e. Iha tempu ne’eba, Amo Bispo Belo ho Amo Jose Antonio, ba buka seminarista sira, iha rate Santa Cruz. Amali ho joven sira lubuk ida, hamutuk iha uma Painoso nia laran. Amali lembra fila fali bainhira Amo Bispo Belo, ba buka tuir seminarista sira.

“sorte Amo Bispo mai ajuda hela ami, wainhira Amo Bispo fila tiha, Amo Joao Filgeiras ba buka seminarista sira iha rate Santa Cruz. Timor oan nebe’e mauhu iha tempu ne’eba, husu ba ami, se mak iha ne’e hanesan seminarista? Hau hakat ba oin, kolega sira la hit liman, entaun hau mak hit liman, foin hakat ba oin, Amo fihir hau husi ain to ulun, pois Amo hatete ba TNI, nia laos seminarista, ne’e mak bapa baku hau mate tiha mak moris.

Amali hanoin atu salva nia liu hosi dalan bosok. Karik Amali mos hanoin katak Amo Joao sei salva joven se deit ne’ebe temi nia an nudar seminarista. Maibe lae, Amali ninia sorte la iha. Tan ne’e mak nia hetan baku maka’as liutan.

Sofrementu ne’ebe Amali ho joven sira seluk hasoru sedauk hotu. Sira hasoru bala musan, sapatu botas military nian, no hetan baku ho kilat loloon. Militar Indonesia hamutuk ho Mauhu sira halo tortura hirak ne’e la haree ba joven mane ka feto.

Isin fulun hamrik, triste no hirus, wainhira rona istoria ne’ebe Amali konta. Ho idade ne’ebe Amali nian iha tempu ne’eba, loloos ne’e nia la merese hetan terus todan ida ne’e. Tempu ne’eba, tempu susar no moris iha risku nia laran. Amali konta oinsa militar Indonesia halo tortura ba nia.  “sira haruka hau hakneak ba tau naran.  Hotu tiha, bapa ida mai ho kilat fai los ba kolega nia oin. Nia oin bubu boot los, hotu tiha, ami ba forma hodi hasai ami nia foto. Hau sae kareta ne’e sira baku hau to Kodim. Bapa ida dehan mai ami, “kamu sekarang ini berdoa saja, lubang untuk kalian sudah lengkap, jadi sampai disana, tembak kasih mati, tinggal dorong masuk aja”.

Violensia ne’ebe Amali ho joven sira seluk hasoru, perigozu duni ba sira nia vida. Ba matebian, rai lulik no Maromak deit mak sira harohan ba. Iha loron ne’eba, rai no lalehan hakmatek no triste los. Karik sira mos tanis no sai sasin ba terus lubuk ne’ebe joven sira hasoru. Amali hanoin iha nia ulun hau mate los iha nebe’e? hakoi los hau iha nebe’e? ho maten wen suli, Amali ne’ebe mos involve iha klandestina, haktuir nia istoria ne’ebe nakonu ho moruk,“sira haruka ami lao iha aitarak leten ain tanan deit, ami lao isin molik tur iha rai sumenti, ra manas los. Ita hamrok husu be, sira kuru los be iha kolam mak fo, o tenke hemu labele koalia barak. Sira fo paun ida deit han husi dader to 12 oras kalan”.

Liu tiha loron kastigu ne’e, Amali ho joven sira seluk, TNI sira lori fila ba uma, tanba militar sira kaer ona lider sira hanesan Gregorio SaldanhaAmali konsege fila ba uma iha tempu ne’eba, situasaun iha uma nakonu ho triste tanba familia hanoin katak, Amali mate ona. Loron tuir mai, Amali militar sira tenke kaer fali no entrega ba Koramil, tuir Amali nia lia fuan katak, militar sira kastigu sira, iha kampu liur deit, no lider sira mak kastigu iha sela laran.

“ami sira ne’e iha lapangan tenis nian, ami barak tur deit to kalan. To kalan sira komesa fahe ona ami no husi ami fila ba uma. Hau hatene paling aban ne’e sira mai kaer fali ona ami. loron-loron hanesan ne’e deit. iha Koramil kalan labele toba iha uma, ita ronda ho militar sira, ba postu sira jaga ne’e, kalan ita labele toba, dadersan toba oituan, pois hader tenke ba eskola. Iha tempu ida hau la ba Koramil, bapa sira baku kolega sira seluk to dolar, gara-gara hau la ba. Entaun sira mai serku tiha hau nia uma ho kilat metin, tebe odamatan, bolu hau sai kalan, sira lori hau ba koramil baku hau to dolar. Depois liu tiha fulan 7, hau halai lakon husi uma to tinan 1 mak hau fila”.

Tuir Amali nia istoria katak, wainhira nia mama hatene, nia ba tuir demonstrasaun no rona katak ema tiru, Amali nia mama halai hodi ba buka tuir iha rate Santa Cruz. Maibe hetan deit Amali nia sapatu, no lori fila sapatu ne’e familia sira tanis hotu. Sira la hatene ema kaer ami ba kastigu tiha, pois kalan mak tentara sira lori ami fila ba uma , pois dader mak mai tula ami ba kastigu fali.

Joao Alto, sobrevivente Masakre St. Cruz ida, wainhira jornalista TAFARA.ORG konfirma kona ba partisipasaun Amali nian iha 12 Novembru 1991. Joao Alto esplika katak wainhira bapa sira komesa tiru, no ema hotu halai namkari, halai sena malu no sama malu. Iha tempu ne’eba mak Joao Alto hare Amaliiha Painoso nia oin.

Luta no sakrifisiu ne’ebe naruk, bainhira hanoin hikas halo matan wen suli, no fuan moras wainhira hateke fali ba kotuk. Joven barak mak husik sira nia ran suli, sira nia moris, sira nia tempu haksolok tan deit hakarak ukun rasik an. Amali la husu estadu atu troka ninia sakrifisiu. Ohin loron Amali, kontinua nia moris hanesan sidadaun babain, ne’ebe la ezizi buat barak, atu halo nia moris sai diak liutan. Nia serbii joven sira iha Centru Juventude Becora, nudar kontribuisaun ne’ebe nia hakarak kontinua fo. Amali kontinua hatudu ninia hahalok diak nudar izemplu moris ida ne’e sei la lakon. Maski nia moris simplis sira hakarak tulun ninia alin joven sira seluk. Izemplu ne’ebe nia hatudu iha rate St. Cruz laran, bainhira iha hela susar nia laran, nia sei fo tulun ba joven seluk ne’ebe hetan susar. Ida ne’e mak nia kontinua halo too oras ne’e.

To’o oras ne’e Amali moris haksolok ho nia fen kaben Aguida Fatima Ribeiro, no iha oan nain 5. Amalihakotu istoria luta nian, hodi hato’o lia menon ba joven ohin loron, katak tenke hakerek no buka tuir istoria Timor nian, atu labele lakon, no jerasaun foun bele hatene.

“joven sira ohin loron, tenke kreativu, lalika moe hodi kompete ho ema esntranjeiru, tanba ita nia rai sira mak domina. Iha inisiativa husi an rasik, hodi bele hetan osan no lalika depende liu ba inan aman. Aprende agora hodi ba aban bain rua, bele hatene moris independente”. Tenik Amali, nakonu ho esperansa. *[Benvinda Gusmao, Sandra Moniz | TAFARA.ORG | 12.04.2016].