Home Siensia & Teknolojia APFTL no GIZ Realiza Formasaun Edukasaun Sivika iha Eskola Sekundaria FINANTIL

APFTL no GIZ Realiza Formasaun Edukasaun Sivika iha Eskola Sekundaria FINANTIL

95
0
SHARE
APFTL no GIZ Realiza Formasaun Edukasaun Sivika iha Eskola Sekundaria FINANTIL

Caption: Alumni Parlamentu Foinsae sira fo formasaun ba eskola sekundaria Finantil konaba sivika. [Foto: Martinho Moniz | 13.09.2019]

Demokrasia, rezolusaun komflitu, identifikasaun problema, papel orgaun soberania nomós partisipasaun síviku foinsa’e nian, mak hanesan tópiku prinsipál iha formasaun edukasaun sívika, ne’ebe fasilita husi APFTL suporta husi GIZ.

Prezidente APFTL, Zaulino Gomes, afirma ba www.tafara.tl, programa formasaun edukasaun sívika ne’e Alumni Parlamentu Foinsa’e Timor-Leste (APFTL) servisu hamutuk ho Deutsche Gesellsehaft fur Internationale Zusammenarbeit (GIZ) GmbH, ho objetivu dezenvolve hahalok síviku foinsa’e sira nian, nune’e foinsa’e sira bele hatene sira nia-an no respeita diversidade.

Dulce Casimiro Lopes, hanesan partisipante afirma ba www.tafara.tl, “bainhira mestre sira hili ami, hau hanoin ona katak, hau bele aprende buat diak balun husi formasaun ida ne’e. Hau seidauk komprende saida mak sidadaun síviku, maibé bainhira tuir tia formasaun ida ne’e, hau hatene saida mak sidadaun síviku no saida mak hanesan foinsa’e bele halo”. Entretantu estudante Jaqueu Noronha sente kontente tanba formasaun ne’e diak, durante ne’e sira halo buat balun ladiak, ho formasaun ida ne’e bele muda no motiva sira hodi labele halo buat ne’ebé mak ladiak.

Iha fatin hanesan, mestre Calistro Caet, sente kontente teb-tebes, tanba atividade refere fó hanoin, motiva sira nia estudante sira hodi bele muda hanoin, bele hatene buat ne’ebé mak sira seidauk hatene. Purtantu mestre Caet husu ba APFTL no GIZ labele para iha ne’e, kontinua nafatin fahe informasaun, fó formasaun ba estudante sira, liu-liu sira ne’ebé mak seidauk hetan formasaun ida ne’e.

“Atividade ida ne’e importante teb-tebes, GIZ no APFTL nebe iha hanoin diak atu mai fahe informasaun, nune’e husu atu labele para iha ne’e deit, tempu seluk bele mai tan hodi kontinua fahe tutan ba estudante sira seluk,” dehan Calistro Caet, ba www.tafara.tl iha Eskola Sekundária FINANTIL, 12/09/2019.

Prezidente APFTL, Zaulino Gomes, afirma, tuir planu atravez koperasaun refere, APFTL sei kontinua realiza atividade refere iha Eskola Sekundária 10 de Desembro, nomós suku Comoro no suku Kulu-Hun. Eskola no suku hirak ne’e hili tanbá konsidera konsidera fatin ne’ebé sempre mosu komflitu.

Zaulino mós espekta katak, estudante sira ne’ebé mak hetan ona matéria hirak ne’e bele aplika iha sira nia moris nomós hatutan ba sira nia maluk seluk ne’ebé mak seidauk hetan. Formasaun ne’e hala’o durante loron hat (09-12/09/2019), no partisipa husi estudante nain 30, kompostu husi feto 15 no mane 15. *[Martinho Moniz | TAFARA.TL | 12.09.2019].