Home Internasional ASEAN Regional Forum Adopta Ajenda Promosaun Feto, Paz no Seguransa

ASEAN Regional Forum Adopta Ajenda Promosaun Feto, Paz no Seguransa

94
0
SHARE
ASEAN Regional Forum Adopta Ajenda Promosaun Feto, Paz no Seguransa

Caption: Ministrus Negosius Estranjeirus hirak neébe partisipa ASEAN Regional Forum ba dala 26 iha Bangkok, Tailândia (Photo: TWITTER.COM/MFAThai).

Preokupa ho ameasas ba estabilidade no prosperidade rejionais tanba konflitus armadus, nomos preokupa ho numeru refuziadus no ema deslokadus neébe aumenta, partikularmente feto no labarik sira, ASEAN Regional Forum (ARF) adopta deklarasaun konjunta konaba Ajenda Promosaun Feto, Paz no Seguransa.

Deklarasaun ida neé fo sai iha press release konjunta, nudar publika iha sitiu European Union External Action eeas.europa.eu edisaun 02/08/2019, neébe asina hosi Ministru Negosius Estranjeirus hirak neébe involve ka partisipa iha ARF, mai hosi ustrália, Bangladesh, Brunei Darussalam, Camboja, Canadá, China, República Democrática Popular da Coreia, Índia, Indonésia, Japão, Laos, Malásia, Mongólia, Mianmar, Nova Zelândia, Paquistão, Papuásia-Nova Guiné, Filipinas, República da Coreia, Rússia, Singapura, Sri Lanca, Tailândia, Timor-Leste, Estados Unidos, Vietname, nomos Altu Reprezentante hosi Uniaun Europeia.

Sira kompremetidu, haktuir press release refere, atu halo esforsu tomak, ho espiritu solidariedade, hodi dudu progresu konaba Ajenda Feto, Paz no Seguransa ho maneira:

1. HASAE partisipasaun feto signifikativamente, inkluindu organizasoens sosiedade sivil feto sira nian no rede hirak neébe implementa Ajenda Feto, Paz no Seguransa, konaba prevensaun, jestaun no rezolusaun konflitus ardmadus, nomos konaba rekonstrusaun no reabilitasaun konstrusaun paz pos-konflitu.

2. KONSTRUI feto sira nia kapasidade nudar konstrutoras ba paz, inkluzivamente sai hanesan mediadoras no negosiadoras iha nivel internasional, rejional, nasional no komunitariu.

3. INVOLVE mane no labarik mane sira hodi apoiu no haluan esforsu ba empoderamentu feto dentru Ajenda Feto, Paz no Seguransa, nomos involve entidade Nasoens Unidas mak servisu iha area Igualdade Jeneru no Empoderamentu Feto (Feto ONU) banati ba sira nia mandatu nudar introduz iha Kampanha ASEAN HeForShe, iha dia 30 de Novembro 2017.

4. PREVENE, responde no hakotu formas violensia oi-oin, explorasaun no abuzu sexual  iha situasaun konflitu armadu, partikularmente kontra ema sivil, inkluindu feto no labarik feto sira.

5. APOIA feto sira nia papel konaba promosaun kultura paz ida neébe eduka no kapasita ema hotu-hotu; prevene konflitus armadus; promove estadu de direitu no sustenta paz atraves aprosimasaun mak kompreensivu, intersetoriais no integrada.

6. ATENDE feto no labarik feto sira nia nesesidade espesifiku iha kontextu humanitarius, inkluindu provizaun (fornese) servisus, material no equipamentu medikus, legais, edukasionais, psikososiais, habitasionais (hela-fatin), nomos moradia asesiveis (kehidupan yang layak).

7. KONTINUA promove igualdade jeneru no empoderamentu feto no labarik feto sira, nudar forma ida hodi minimiza kauzas hosi konflitus armadas, hanesan probreza, diskriminasaun, injustisa sosial, no exkluzaun ekonomika no/ka sosial hosi pesoas no komunidade vulneravel sira, nomos hirak neébe iha risku instabilidade no terorismu.

8. ESFORSU hodi proteje feto no labarik feto sira nia direitu durante no hafoin konflitu armadu, inkluindu hosi diskriminasaun no exkluzasaun sosial, nomos promove kultura inkluzaun.

9. HAMETIN kapasidade operasoens no manutensoens paz para dudu (avansa) Ajenda Feto, Paz no Seguransa, inkluindu dezenvolve implantasaun (penyebaran) no partisipasaun signifikativa hodi feto iha nivel oi-oin, no inkorporar (hatama) Ajenda Feto, Paz no Seguransa iha planeamentu no implementasaun operasoens.

10. HALO advokasia ba mekanismu hirak neébe lideradu hosi ASEAN no parseirus dezenvolvimentu sira para apoia implementasaun kompromisus globais no dudu Ajenda Feto, Paz no Seguransa para apoia esforsu empoderamentu feto no labarik feto sira, hodi halo prevensaun no rezolusaun konflitus armadus no konstrusaun paz pos-konflitu.

11. INSENTIVA lideransa politika para promove maior equilibru konaba reprezentasaun feto no mane, nomos integra perspetiva jeneru iha funsionamentu esforsus internasionais mak ami halao konaba seguransa no konflitus armadus.

12. HABELAR konsientizasaun Ajenda Feto, Paz no Seguransa entre formuladores politikas no ba publiku, nomos insentivar diskusoens intergovernamentais sobre tema/issue importante konaba Ajenda Feto, Paz no Seguransa, hodi hafahe experiensia politika, lisoens aprendidas no molhores pratikas, no identifika forma kooperasaun oi-oin.

13. PROMOVE feto sira nia partisipasaun signifikativa iha prosesu prevensaun, jestaun no rezolusaun konflitus armadus no toma desizaun, nomos fortalese igualdade jeneru.

14. INSENTIVA adosaun (adopta) politikas nasionais, planu asaun nasional no esforsu hosi estrutura rejionais ho intentasaun hasae konsientizasaun publika konaba feto sira nia direitu no importansia hosi sira nia papel no partisipasaun iha prosesu hametin paz, rezolusaun no prevensaun konflitu armadu, no konstrusaun paz.

15. APOIA pesquiza, treinamentu no kompartilha informasoens sensiveis konaba jeneru no dezagregada dentru ARF, relasionadu ho operasoens paz no/ka inisiativas ba estabilizasaun, bazeia ba analiza jeneru neébe solidu ho perspetivas jeneru mak integrada para insentiva melhores pratikas (praktek terbaik) konaba materia/problemas feto.

16. TAREFA Espesialistas no Pessoas Eminentes (EEPs) hodi fornese rekomendasoens konaba AJenda Feto, Paz no Seguransa iha planu trabalho, programas no prosesu relevante sira seluk dentru ARF, inkluindu seisoens reunioens, workshop no atividades seluk mak relevante.

Atraves press release neé, ARF mos fo hanoin fila fali sobre Konvensaun Nasoens Unidas konaba Eliminasaun Forma Diskriminasaun Oi-oin Hasoru Feto, Konvensaun konaba Direitus Labarik, Deklarasaun konaba Eliminasaun Violensia Hasoru Feto (Deklarasaun Viena), Deklarasaun no Plataforma Asaun Beijing, no Ajenda Dezenvolvimentu Sustentavel 2030, partikularmente Objetivus Dezenvolvimentu Sustentavel (ODS) pontu 5 no 16.

ASEAN Regional Forum ba dala 26 neé halao iha Bangkok, Tailândia, 2 de Agosto de 2019* (Metodio Caetano Moniz | TAFARA.TL | 06.08.2019)


Fontes: sitiu European Union External Action