Home Sosial & Politika Belun Aprezenta Dadus SGBV Iha Enkontru Prevensaun Konflitu

Belun Aprezenta Dadus SGBV Iha Enkontru Prevensaun Konflitu

70
0
SHARE
Belun Aprezenta Dadus SGBV Iha Enkontru Prevensaun Konflitu

Caption: Program Manager Belun, Marilia Oliveira da Costa no nudar membru grupu servisu APPAP halo aprezentasaun konaba SGBV iha enkontru konaba Prevensaun Konflitu iha Jakarta -Indonesia

“Belun identifika katak akontese asidente mais menus 1,590, hosi numeru 1,590, kazu liga ho violensia bazea ba jeneru hamutuk 313, restu hosi numeru ne’e mak liga ho kazu arte marsiais, disputa rai no problema sosial, ba tinan 2018-2019”.

NGO Belun partisipa enkontru konaba prevensaun konflitu no violensia, ne’ebe organiza hosi Asia PAsific Centre For the Responsibility to Report no Asia Pacific Partnership Atrocity Prevention [APPAP].

Liu hosi workshop refere, reprezentante hosi NGO Belun, Program Manager, Marilia Oliveira da Costa, halo aprezentasaun liga ho Sexual Gender Base Violence - SGBV [violensia seksual bazea ba jeneru. red] ne’ebe akontese iha Timor-Leste.

“Durante ne’e Belun halo monitorizasaun identifika katak iha kazu Violensia Bazea ba Jeneru sei akontese, no afeita liu ba feto,  Belun hetan projetu ne’e, Belun halo esforsu hodi halo monitorizasaun klean ba iha kazu ida ne’e. Belun hetan apoiu fundus hosi UN WOMEN, liu hosi programa Atensaun no Responde Sedu [AtReS] no mos hetan apoiu hosi APPAP, ne’ebe programa ne’ebe foka iha Dili, liu hosi dadus kazu liga ho Violensia bazea ba jeneru, Dili hetan numeru boot liu”, hateten Marilia, 28/08

Marilia hatutan katak Belun kontinua servisu hamutuk ho governu hodi hare liu ba iha Lei Violensia Bazea Ba Jeneru no mos kontinua halo monitorizasaun, hodi aprezenta ba governu, UN WOMEN no mos ba membru APPAP.

Tuir dadus ne’ebe aprezenta hahu hosi tinan 2018-2019  asidente ne’ebe relasiona ho SGBV  akontese maka hanesan kazu violensia domestika liu hosi asaun fisiku, asaun violasaun seksual, ekonomia no sikologia. Iha dadus seluk mos akontese relasiona ho abuzu sexual ne’ebe halo hosi ema liur. Belun identifika katak akontese asidente mais menus 1,590, hosi numeru 1,590, kazu liga ho violensia bazea ba jeneru hamutuk 313, restu hosi numeru ne’e mak liga ho kazu arte marsiais, disputa rai no problema sosial.

Objetivu hosi enkontru hosi prevensaun konflitu no violensia katak atu kontinua enkoraja joven sira atu promove konaba protesaun direitus humanus no habelar liutan konaba norma no prinsipiu konaba prevensaun konflitu no violensia to iha rejiaun Pasifiku.

Iha enkontru refere halo mos diskusaun konaba oinsa atu uza media sosial atu halo advokasia liga ho direitus umanus, oinsa respeita ema ida nia relijiaun, ras, promove igualdade jeneru, no kontra diskriminasaun.

Enkontru ne’e halao durante loron rua, iha Jakarta ne’ebe hetan partisipasaun hosi nasaun sira hosi sudeste aziatiku, Sul Korea, India, Bangladesh no Fiji.

Resultadu hosi enkontru sei produs deklarasaun hodi nune’e kontinua esforsu an hodi servisu hamutuk entre membru sira, hodi halao servisu iha area prevensaun konflitu no violensia, hodi fo hanoin ba estadu no mos Nasoens Unidas. * [Zevonia Vieira | TAFARA.TL | 28.08.2019]