Home Sosial & Politika Covid-19, AJTL-TLPU Husu MS Tenke Koopera Diak Ho Media, Fo Espasu Ba Jornalista Husu Perguntas

Covid-19, AJTL-TLPU Husu MS Tenke Koopera Diak Ho Media, Fo Espasu Ba Jornalista Husu Perguntas

202
0
SHARE
Covid-19, AJTL-TLPU Husu MS Tenke Koopera Diak Ho Media, Fo Espasu Ba Jornalista Husu Perguntas

Caption: AJTL ho TLPU halo konferensia imprensa. [Foto: Caileg Pinto | 26.03.2020]

Virus Korona sai ona pandemia ba mundu tomak, no komesa afeta ona Timor-Leste. Situasaun ne’e halo públiku preokupa tamba moras aat ne’e globalmente amesa dadauk vida umana. Iha kontestu publikasaun mídia nian, públiku ezije mídia atu toma nia papél nu’udar ajente informasaun atu hakunu públiku nia direitu asesu ba informasaun. Maibé iha periódu propagasaun COVID 19 nian, jornalista sira hasoru bareira oioin atu hetan informasaun ida-ne’ebé loloos no kredível, liuliu atu hetan informasaun ofisiál husi Komisaun Covid 19 ne’ebé lidera husi Ministériu Saúde no Organizasaun Mundiál Saúde.

Asosiasaun Jornalista Timor Lorosa’e h Timor Leste Press Union [TLPU] eziji ba Ministeriu Saude ka Komisaun Covid-19, atu kria  sentru mídia ba COVID-19, atu nune’e bele fornese informasaun loloos no klean ba mídia iha periódu propagasaun COVID 19 nian.  Komisaun COVID 19 tenke koopera ka kria relasaun di’ak ho jornalista sira hodi fó espasu nakloke ba jornalista sira atu husu pergunta kona-ba asuntu COVID 19 ne’ebé daet ona mai iha Timor-Leste.

“Komisaun COVID 19 ne’ebé lidera husi Ministériu Saúde tenke halo tratamentu justu ba jornalista ka mídia hotuhotu, tantu mídia públiku ka mídia privadu bainhira realiza konferensia imprensa ruma.  Respeitu independénsia redasaun kanál mídia hotuhotu no labele orienta fali kanál mídia sira atu halo-tuir interese seluk nian”, deklara portavoz, AJTL-TLPU, Zevonia Vieira

AJTL ho TLPU mos husu ba Midia ka meu komunikasaun social atu ho seriu prepara ekipamentu protesaun ba jornalista sira, bainhira halo kobertura iha espasu públiku, hodi nune’e la bele fó risku ba sira nia moris no fo nafatin kondisaun di’ak ba jornalista sira bainhira halo ninia knaar jornalizmu iha terenu, liuliu iha periódu propagasaun moras COVID-19 nian.

Ba jornalista AJTL ho TLPU mos husu jornalista sira tenke kumpri nafatin kódigu Étika jornalisitiku, bainhira halo kobertura ba asuntu virus korona. Ba redasaun no jornalista sira hotu halo Konfirmasaun no verifikasasaun ba informasaun hotu-hotu, tantu informasaun ofisiál hosi governu nomós informasaun sira ne’ebé publika iha mídia sosiál antes publika. Atu labele fiar deit ba fonte ofisiál sira, maibé halo mós peskiza no halo investigasaun, nune’e bele publika informasaun ne’ebé dieferente husi fonte ofisiál sira. Redasaun no jornalista sira atu kontinua publika ka tranzmite notisia sira ne’ebé iha relasaun públiku nia interese, liuliu notisia sira kona-ba COVID 19 no dezastre naturál.

Relasiona ho informasaun falsu ne’ebe espalha iha social media, AJTL ho TLPU husu publiku atu labele fiar informasaun falsu ne’ebé ema iresponsavel sira sempre tranzmite iha rede mídia sosiál hodi kria sitauasaun la hakmatek no pániku iha sosiadade nia leet no atu labele fahe tutan informasaun falsa ka hoax no fake news ne’ebé espalla iha mídia sosiál relasiona ho COVID 19. AJTL ho TLPU nia esforsu kontinua hakilar no promove Liberdade imprensa no espresaun iha Timor-Leste. * [ Adroaldo no Francisco JDA | Editor: Zevonia Vieira | TAFARA.TL | 26.03.2020 ]