Home Siensia & Teknolojia Empreza Privada Core Magic Solutions,Lda Kontinua Fornese Formasaun Kontabilidade ba Publiku

Empreza Privada Core Magic Solutions,Lda Kontinua Fornese Formasaun Kontabilidade ba Publiku

77
1
SHARE
Empreza Privada Core Magic Solutions,Lda Kontinua Fornese Formasaun Kontabilidade ba Publiku

Caption: Partisipante Formasaun Kontabilidade Bazika Nivel Dahuluk tuir hela pre-test kona-ba karakteristika no konteudu kontabilidade. [Foto: Martinho Moniz | 03.02.2020].

"Timor-Leste nasaun ida ne’ebé hala’o daudaun nia dezenvolvimentu nesesita tebes rekursu humanu ho kualifikasaun oin-oin ne’ebé inklui kontabildiade. Nune’e CMS hanoin katak, liu husi atividade formasaun kontabildiade baziku ne’e bele kontribui ba aumenta rekursu humanu iha area kontabilidade.”

Deklarasaun ne’e hato’o husi Executive Secretary Core Magic Solutions, Lda (CMS), Maria do Ceu, bainhira hatan ba mahusuk husi TAFARA.TL kona-ba fornesimentu formasaun kontabilidade baziku ne’ebé CMS oferese ba foinsa’e sira iha Culu-Hun, Dili, Timor-Leste.

Maria do Ceu akresenta, iha kontabildiade koalia barak kona-ba rikusoin, tanbá ema hotu-hotu nomós organizasaun sira hotu iha rekursu so diferente mak nia kualidade no kuantidade, nune’e ho formasaun ida ne’e bele hanorin oinsá kontrola, hatene fontes rikusoin hirak ne’e no nia utilizasaun.

Enretantu iha fatin hanesan, atual partisipante formasaun kontabildiade, Lucia F.R. da Silva ne’ebé oras ne’e haknaar-an iha Centro Nacional Chega! I.P hateten, nia hakarak tuir formasaun kontabilidade tanbá kontabilidade ne’e iha ligasaun ho area ne’ebé nia serbisu ba. Iha parte seluk Lucia hanoin hafoin aprende kontabilidade ne’e bele ajuda nia hodi hatene kona-ba oinsa atu kredit osan iha banku.

Iha fatin hanesan, Ricardina de Jesus, nu’udar mós partisipante formasaun deklara, “ha’u hakarak atu hatene kle’an liu tan kona-ba kontabilidade nune’e karik loron ida loke kompania ka harii bisnis ruma ha’u bele kontrola iha parte finansa,” dehan Ricardina.

Purtantu, atual Diretor Comoro Child and Youth Center (CCYC), Zito Isodoro Freitas, ne’ebé tuir mós formasaun kontabildiade iha fatin refere hateten, “ha’u hakarak hasa’e ha’u nia koñesimentu diak liu tan iha area kontabilidade hodi bele halo kontrolu ba orsamentu organizasaun nian.”

Diretor CCYC afirma liu tan, CMS mak kompania ida ne’ebé fornese formasaun kontabilidade bazeia ba pratika rill ne’ebé akontese iha organizasaun sira. Nune’e nia espekta, hafoin termina formasaun ne’e nia sei aplika/pratika koñesimentu ne’ebé nia hetan iha nia serbisu fatin.

Oras ne’e formasaun kontabildiade bazika iha CMS tama ona ba periodu dahat, ne’ebé periodu dahuluk ema nain hitu (7) mak gradua (2018-2019), periodu daruak nain hitu (7) iha (2019), periodu datoluk na’in lima (5) mak gradua (2019), no oras ne’e estudante na’in 10 mak aprende hela. Formasaun ne’e hala’o iha loron Segunda-feira, Quarta-feira no Sexta-feira, husi 18h00-20h15 horas Timor-Leste. Tuir horariu formasaun kontabildiade bazika nivel dahuluk sei termina iha fulan ida ne’e.

CMS nu’udar empreza privada existe hodi kontribui no orienta liu ba servisus dezenvolvimentu kapasidade institusional no rekrusus humanus ho alvu mak hanesan instituisoens públiku, seitor privada, entidades sein fins lukrativus nomós ba estudantes, universitarius iha areas, maibe la limita ba audit consulting and trainig, formasaun kontabildiade, estabelese sistema kontabilidade inklui fornese accounting software, fasilita elaborasaun no/ka treinamentu konaba strategic planning, organizational development, elaborasaun Job Descriptions no Strandard Operating Procedures (SOP) ba organizasaun sira, ne’ebe hari iha loron 25 fulan Janeiru tinan 2018 no rejistadu iha Serviço de Registo e Verificação Empresarial [SERVE] ho numeru úniku empreza nian (NIF/TIN) 1284362. * [Martinho Moniz | TAFARA.TL | 12.02.2020].