Home Sosial & Politika Foinsae 132 Hetan Posse Ba Membru PFN Periodu 2019-2022

Foinsae 132 Hetan Posse Ba Membru PFN Periodu 2019-2022

87
0
SHARE
Foinsae 132 Hetan Posse Ba Membru PFN Periodu 2019-2022

Caption: Membru PFN Periodu ba dahat lee termu de posse nudar komprimisiu durante asume hanesan membru PFN 2019-2022. [Foto: Martinho Moniz | 20.09.2019]

Programa Paralementu Foinsa’e Nian kria bazeia ba rezolusaun governu no. 23/2009, 18 Novembru ho alterasaun dahuluk rezolusaun governu no. 47/2017, 16 Agustu, nu’udar espasu ba foinsa’e sira hodi aprende ba lideransa kualidade iha futuru.

Loron 20 fulan Setembru tinan 2019, foinsa’e ho idade 12-17 nain 132 husi Postu Administrativu 61, sub rejiaun 4 no reprezentante foinsa’e ho defisiente ne’ebé eleitu nu’udar membru PFN simu tomada de posse husi Kordenador PFN periodu 2019-2022, observa direta husi primeiru ministru RDTL mak reprezenta husi Sekretáriu Estadu Juventude Desportu, Nelio Isaac Sarmento, inan aman no komvidadu sira.

Iha sesaun solene refere, Sekretáriu Estadu Juventude Desportu, Nelio Isaac Sarmento afirma, “Parlamentu Foinsa’e Nian [PFN] mai la’os atu kontenti, mai atu aprende, mai atu hatutan no fó valor ba sakrifisiu luta nain sira nian ba rai ida ne’e”, afirmasaun Sekretáriu Estadu Juventude Desportu, Nelio Isaac Sarmento iha serimonia tomada de posse ba membru PFN periodu dahat (2019-2022).

Entretantu, Remigia Aleixo Soares Belo reprezenta membru PFN periodu datoluk hato’o agradese ba avô José Ramos Horta, Avô Kay Rala Xanana Gusmão, pai Miguel Gonçalves Manetelo, Leovigildo da Costa Hornai, hamutuk ho ema hotu iha Sekretaira Estadu Juventude Desportu, Concelho Nacional Juventude Timor-Leste no UNICEF ne’ebé apoiu programa PFN nian hahu husi periodu dahuluk to’o oras ida ne’e.

Remigia Aleixo Soares Belo afirma, “ami la matenek, ami enkorajadu atu aprende, ami aprende buat lubuk ida iha Parlamentu Foinsa’e Nian, maibe ladauk naton ba ami hodi sai nudar futuru lider ne’ebé kualidade, hodi kontribui ba rai doben Timor-Leste”.

Membru Parlamentu Foinsa’e Nian husi Posto Administrativu Laga, Munisipiu Baucau, ne’e akresenta, “programa PFN motiva no enkoraja ami atu kontinua aprende, haka’as-an ho espiritu voluntarismu, sivismu no ativismu, sai joven ne’ebé síviku no responsivu”, tenik Remigia, iha nia intervensaun.

Purtantu Remigia deklara, iha sira nia mandatu atividade formasaun ladun efetivu, nia husu ba parte kompetente sira atu bele kontinu fó formasaun liu husi atividade saida deit. Hatan ba kestaun ne’e, Sekretáriu Estadu Juventude Desportu esklarese, kestaun ne’e tanba impase polítika ne’ebé akontese iha rai laran. Purtantu governante ne’e husu ba membru PFN periodu datoluk atu kontinu aprende hamutuk iha Alumni Parlamentu Foinsa’e Nian.

“Hau husu ba membru PFN labele lakon esperansa, tanba imi mak fini no esperansa. Joven tenke ativu, kontinua nafatin aprende ho Alumni Parlamentu Foinsa’e Timor-Leste, aprende, kontrinua aprende, tanba ho koñesimentu nebe ita iha laiha ema ida mak atu muda ita, maibe  iha ema barak mak atu mai parseiru ho ita,” dehan Nelio Isaac Sarmento.

Nelio Isaac Sarmento husu ba foinsa’e sira atu uza media sosial ho tempu, halo inan aman sira orgullu, hodi valoriza sira nia esforsu ne’ebé kuidadu imi to’o ohin loron, orgullu nudar timor-oan, kiak maibe iha dignidade, kiak maibe fuan bo’ot.

Governante ne’e salienta liu tan ba foinsa’e sira atu hahu kuda buat diak hodi bele atinje mehi ne’ebé mak sira iha. Nia husu parseiru hotu-hotu mak servisu iha area juventude atu hamutuk ho governu hodi implementa politika nasional juventude ne’ebé preokupa ho foinsa’e iha area rural.* [Martinho Moniz | TAFARA.TL | 20.09.2019].