Home Opiniaun INSIDENTE NEEBE AKONTESE IHA AEROPORTUPREZIDENTE NICOLAU LOBATO TANSA SEGURANCA LA KONTROLA MAXIMO?

INSIDENTE NEEBE AKONTESE IHA AEROPORTUPREZIDENTE NICOLAU LOBATO TANSA SEGURANCA LA KONTROLA MAXIMO?

120
0
SHARE
INSIDENTE NEEBE AKONTESE IHA AEROPORTUPREZIDENTE NICOLAU LOBATO TANSA SEGURANCA LA KONTROLA MAXIMO?

Caption: Hakerek nain Alumni: Universidade da Paz, (UNPAZ) 2008 Moises Vicente. [Foto: Dokumentu Privadu | 22.10.2019]

“Ha’u sei investiga kazu ne’e ho didiak, ne’e sinal ida, portantu dala ita hanoin dehan ema ne’e atu ba para deit iha liur, afinal ema ne’e ho motor tama liu ba iha aeroportu laran. Ohin ha’u temi tiha ona kona-bá krimi organizadu kona-bá terorizmu buat sira ne’e bele halai ba iha ne’ebá, sé aviaun la’o hela mak ida ho motor ba atravesa ne’e fó dezastre boot ida”, Esplika Ministru Defeza no Ministru Interior Interinu, Filomeno Paixão de Jesus, hafoin partisipada grande entrevista iha studio 2 GMN TV Bebora Dili, Segunda (14/10/2019). (Jornal Nacional Diário, 16 Outubru 2019). Iha ne’ebé insidente kazu ne’e akontese iha loron Segunda, 14 Outubru 2019, tuku 13:40 OTL, momentu ne’ebá aviaun Sriwijaya Air mai husi Bali-Indonesia tula pasajeiru 100 kompostu husi pilotu rua, aeromosa na’in-ne’en inklui Embaixador Estranjeiru na’in-rua.

Aeroportu Internacional Prezidente Nicolau Lobato ou tempu uluk liu Aeroporto Internacional Comoro, aeroportu ida ne’ebé lokaliza iha Dili, kapital nasaun República Democrática de Timor-Leste (RDTL) nian. Iha ne’ebé aeroportu Internacional Prezidente Nicolau Lobato odomatan bo’ot ba bainaka Internasional tama no sai mai iha país Timor-Leste. Se kuandu seguransa la seguru ka seguransa ladiak ema internasional sira atu mai investe iha ninia negosiu ruma, Corpo Diplomatiku, Turista sira, membru sira husi Comunidade dos Países de Língua Portuguesa (CPLP), no neineik ba beik Timor-Leste sei tama planu adeasaun Timor-Leste nia ba membru Associations of South East Asian Nations (ASEAN), ema internacional sira tauk atu tama mai sa’e ho aviaun sira ne’ebé nia rute mai iha Dili. Ida ne’e hatudu katak insidente ka frazilidade husi seguransa rede krime organizadu bele sobu Aeroportu Internacional Prezidente Nicolau Lobato iha tempu futuru. No tansa seguransa sira hanesan Polícia Nacional Timor-Leste husi Unidade Patrulhamentu Fronteira (UPF), seguransa Komandu PNTL Munisipiu Dili, Seguransa Sívil sira iha Aeroportu Internacional Prezidente Nicolau Lobato la kontrola ho Maximo?. Kazu ida ne’e seriu, liu-liu ameasa ida ba ita nia Estadu República Democrática de Timor-Leste. 

Nudar lalokar ema husi rai liur tama mai no husi rai laran ba iha rai liur, aeroportu Internacional Prezidente Nicolau Lobato iha papel importante. Tanba ne’e iha tinan 2008, bainhira Governu Aliansa Maioria Parlamentar (AMP) kaer ukun, Primeiru Ministru (PM), Kay Rala Xanana Gusmão tau Aeroportu Internasional Presidente Nicolau Lobato, Dili nudar prioridade prinsipal atu konstrui ho diak tuir standar Internasional. Iha fulan Abril nia rohan tinan 2008, bainhira vizita traballu ba Jakarta, Indonezia, Primeiru Ministru Xanana Gusmão ba jornalista nasional sira ne’ebé akompaña vizita ne’e, hatete Governu iha ona planu atu harii Aeroportu Internasional Presidente Nicolau Lobato Dili no mos portu Dili nudar xave ba dezenvolvimentu ekonomia. Kontratu espesialista seguransa aeroportu nian hodi halo avaliasaun iha fatin aeroportu nian no esplika oinsa terorista ida bele aproveita pontu fraku sira ne’ebé oras ne’e iha sistema seguransa atu halo atake ruma. Aleinde ne’e, grupu ida ne’e bele fornese enkuadramentu ida ba reforma legal kona-bá Dekretu Lei Nú. 6/2006, no rekomendasaun sira hodi mellora ekipamentu nesesariu sira. Hasai fila-fali kuadru lejislasaun foun ida kona-bá regulamentu seguransa ba aeroportu (Dekretu Lei Nú. 6/2006/) klarifika definisaun ba zona restrita sira, zona rezervada sira, lokalizasaun aero nian, no lokalizasaun rai nian. Aleinde ne’e halo klaru iha dekretu lei ne’e nia laran kona-bá sidadaun sivil sira (pasajeiru no laos pasajeiru sira) ne’ebé bele tama iha area sira ne’e tuir tempu ne’ebé determina ona. Treinu fila-fali pesoal seguransa sira ne’ebé eziste ona tuir norma internasional kona-bá protokulu seguransa aeroportu nian, atualiza Dekretu-Lei relasiona ho seguransa aeroportu, no konsekuensia sira karik sira la halo tuir prosedimentu sira seguransa nian. Iha garante katak unidade patrullamentu aeroportu 24/7 espesifikamente treinadu ba seguransa aeroportu nian, no kompriende nesesidade monitorizasaun.

Iha parte seluk, hakerek na’in husu ba VIII Governo Konstitusional liu husi Ministru Interior Interinu (MII), Filomeno Paixão de Jesus tenke fó ona orientasaun ba Komando Jeral Polísia Nacional Timor-Leste (PNTL), Comisario Polícia Faustino da Costa atu halo investigasaun klean ba pesoal Unidade Polísia Fronteira (UPF) iha Aeroportu Internacional Prezidente Nicolau Lobato Dili. Hakerek na’in nia monitorizasaun ema ne’ebé tama ba aeroportu Internacional Prezidente Nicolau Lobato ne’e lisaun bo’ot ida ba ita Timor-oan hotu. Suspeitu oras ne’e dadaun la’o hela prosesu investigasaun husi Polisia Nacional Timor-Leste/Polisia Nacional Servisu Investigasaun Kriminal (PNSIK). Hakerek na’in mos husu ba Komandu Polisia Nacional Timor-Leste katak hakarak kontinua investigasaun seriu teb-tebes ba membru Unidade Polisia Fronteira (UPF) ne’ebé halo seguransa iha aeroportu Internacional Prezidente Nicolau Lobato ne’ebá. Perguntas mak ne’e tamba saida mak ema bele tama liubá laran ho motor hodi korta ka hakarak xoke aviaun Sriwijaya Air?. Ida ne’e hatudu katak frazilidade husi parte seguransa Aeroportu Internacional Prezidente Nicolau Lobato nian. Problema ne’e iha ne’ebé los? Parte seguransa sira la halo monitorizasaun iha CCTV?. Ka CCTV maka at ona? Ka CCTV mak seidauk tau iha kampu aeroportu laran? Ka pagar rede sira iha Aeroportu Internacional Prezidente Nicolau Lobato nia mak tohik ka at ka malahok tiha ona? ka parte seguransa sira nia mak la halo patrulhamentu?.

Ikus liu, rekomendasaun husi hakerek na’in ne’ebé husu ba Komando Jeral Polisia Nacional Timor-Leste (PNTL) hamutuk ho ministeriu relevante sira seluk ba oin presiza seguransa ida rigorozu iha area Aeroportu Internacional Prezidente Nicolau Lobato atu garante ambiente seguru ba pasajeiru Internacional no Nacional sira. Aleinde ne’e husu ba Autoridade Navegasaun Aérea Timor-Leste (ANATL, E.P) atu ko’opera ho Polícia Nacional Timor-Leste (PNTL) husi Unidade Patrulhamentu Fronteira (UPF), Komandu PNTL Munisipiu Dili no Seguransa Sívil sira atu asegura Aeroportu Internacional Prezidente Nicolau Lobato ho rigorozu. Úniku solusaun maka hametin seguransa hodi hein politika VIII Governu Konstitusional nian atu ekipa husi linha ministerial ne’ebé hahu halo planu master plan ba konstruksaun Aeroportu Internacional Prezidente Nicolau Lobato ho padraun Internacional.  

*Artigo ida ne’e larepresenta institusaun ne’ebé hakerek na’in haknar ba, maibé idea no argumentu sira ne’ebé lekar iha artigu ne’e nudar opinião pesoál. Hakerek na’in Alumni: Universidade da Paz, (UNPAZ), 2008. Iha sujestaun ruma bele haruka iha e-mail: moisesvicente.mahein@gmail.com.