Home Sosial & Politika Jornalista Barak Mate Tanba Garante Direitu Povu TL Ba Autodeterminasaun

Jornalista Barak Mate Tanba Garante Direitu Povu TL Ba Autodeterminasaun

PR: Apresia Servisu Jornalista nian Hosi 1975-1999

56
0
SHARE
Jornalista Barak Mate Tanba Garante Direitu Povu TL Ba Autodeterminasaun

Caption: Presidente da Republica, Dr. Francisco Guterres "Lu-Olo" (Photo: TATOLI.TL)

“Ho sira nia barani, determinasaun no kompromisu, sira fo sai informasaun ne’ebe real no atual konaba saida mak akontese iha ita nia rai laran”. Lú Olo

Prezidente da Republika, Dr. Francisco Guterres Lú Olo, ne’ebe partisipa iha sesaun enseramentu ba Dili Dialogu Forum [DDF] ne’ebe organiza hosi Konselho Imprensa [KI] ba daruak nian, ba reprezenttante Konsleho Imprensa hosi rejiaun, media no estudante sira, Prezidente da Republika hateten katak Timor-Leste iha experiensia naruk ida, moris iha rejime totalitariu nia okos. Durante luta ba libertasaun hosi ita nia patria, media no jornalista sira iha knaar ida ne’ebe importante tebes, hahu kedas hosi tinan 1975 to 1999.

“Jornalista sira lubun ida hatudu sira nia kompromisu ho barani involve-an no buka transmite informasaun konaba violasaun direitus umanus iha ita nia rai, hosi Australia, Holanda, Portugal, Indonesia no nasaun sira seluk iha Europa, Amerika no Asia. Barak mate tanba hakarak garante direitu povu Timor-Leste nian ba autodeterrminasaun, hahu kedas iha 1975”, hateten Lú Olo, 10/05, Salao Sao Jose Catedral.

Iha Outubro 1975 iha Balibo, Greg Shakleton ho nia kolega nain haat hetan tiru no mate, iha Dezembru 1975, iha Ponte Cais, Borja da Costa no Roger East hetan tiru no mate. Iha tinan 1991, jornalista ka ativista Kamal Bamadhaj hetan tiru mate iha Kuluhun, Sander Thoenes mate iha Becora no Agus Mulyawan mate hamutuk ho madre sira iha Lautem.

Prezidente Lú Olo mos konta tuir katak durante tinan barak nia laran jornalista, sindikatu no federasaun jornalista sira nian kontribui ba prosesu liberta ita nia Patria, hanesan Denis Freney, Jill Joliife, Adelino Gomes, Antonio Sampaio, Paulo Nogueira, Rui Araujo, Manuel Acacio, Robert Domm, Aboeprijadi Santoso, Ammy Goodman, Allan Nairn, Max Stahl no Saskia Kouwemberg.

“Ho sira nia barani, determinasaun no kompromisu, sira fo sai informasaun ne’ebe real no atual konaba saida mak akontese iha ita nia rai laran. Ita labele haluha katak Masakre Sta. Cruz hamosu mudansa boot ida iha mundu, tanba jornalista sira ne’ebe hau temi, halo akompañamentu ba eventus ne’ebe akontese iha Dili laran”, hateten Lú Olo.

Xefe Estadu hatutan Max Stahl ne’ebe sei moris no hela iha Timor-Leste, servisu hamutuk ho ita to’o ohin loron, mak lori imaken hosi massacre Sta.Cruz ba mundu tomak. Imajen sira ne’e mak loke liuta opiniaun publika jeral kona ba rejime ne’ebe ita hasoru iha Timor-Leste no hasa’e rekoñesementu internasional ba vontade povu Timor-Leste, atu ukun rasik an. * [ Zevonia Vieira | TAFARA.TL | 11.05.2019]