Home Sosial & Politika Kazu 143 Projetu no Ro Haksolok, Sosiadade Sivil Sira Dezafia CAC ATu Hare Asumtu Nee

Kazu 143 Projetu no Ro Haksolok, Sosiadade Sivil Sira Dezafia CAC ATu Hare Asumtu Nee

128
0
SHARE
Kazu 143 Projetu no Ro Haksolok, Sosiadade Sivil Sira Dezafia CAC ATu Hare Asumtu Nee

Caption: imajen karikatur konaba antikorupsaun. [Foto: copyright google | 16.12.2019]

Korupsaun nudar problema boot ne’ebe akontese iha nasaun barak, aktu hosi korupsaun mak sei fo ameasa boot ba futuru nasaun nian, tanba sei fo todan ba jerasaun tuir mai sira hodi moris iha kiak no mukit laran, tanba grupu balun uza salah povu nia osan ba necessidade privadu ka hariku an.

Korupasaun ne’ebe akontese iha Timor-Leste, hafanun organizasaun sosiadade sivil nia néon hodi fo hanoin ba Comisaun Anti Korupsaun, hodi halo servisu makaas liutan iha prevensaun ba aktu korupsaun iha Timor-Leste.

Iha loron 16/12, organizasaun sosiedade sivil sira  hala’o vizita ba Comisaun Anti Corrupsaun (CAC) ho objetivu atu  dezafia Servisu CAC nian, tanba espetasaun ka esperanca povo nia ba CAC bo’ot tebes,  nune’e oinsa mak bele kombate no prevene korupsaun iha Timor-Leste, reprezentante sosiedade sivil reprezenta povo, hatete ba CAC atu haforsa prevensaun ba aktu korupsaun.

Direitor FONTIL, Daniel Santos do Carmo iha nia intervensaun hatete hatama ema ba kadeia ne’e laos solusaun, nune’e mak mai atu fo hatene ba sira katak, oinsa mak atu prevene mak haforsa iha prevensaun ba aktu korupsaun-

“ Ita bo’ot sira hatene ema ba kadeia, estadu tenke aprova tan osan hola hahan, hola kulusaun ba ema toba, signifika estadu lakon nafatin, entaun ita koko oinsa mak atu dezafia sira atu servisu makas hodi prevene korupsaun ne’e diak liu, koalia mos kona ba kazu 143 projetu no mos Ro Haksolok ne’e kazu ida ne’ebe prezuijo, ita aprova miliaun ba miliaun hodi ba sosa Ro no ikus Ro ne’e la mai,  atu dezafia CAC oinsa mak atu halo servisu ruma atu hare ba asuntu ida ne’e”, hateten Diretor FONGTIL iha Farol, 16/12.

Daniel haforsa liu tan kona ba  kazu 143 projeitu ne’e,  husu ba CAC atu hahu halo servisu ruma atu buka hatene tanba sa projetu sira ne’e sai ho legal ka lae, maibe ida ne’e segredu justica sira no la fo hatene ba iha sosiedae Sivil.

“Korupsaun ne’e moras bo’ot at ida, sei hamate sidadadaun nasaun nia futuru, atu luta ba korupsaun ita laos hein deit CAC, Sosiedade halo vizita ida ne’e atu alerta ba ema hotu katak kombate no prevene korupsaun ita hotu tenke assume responsabilidade”, hateten Daniel, iha edifisiu CAC Farol, 16/12.

Entertantu Comisariu Comisaun Anti Corupsaun, Sergio Ornai iha intervensaun hateten CAC nia servisu mak atu halo prevensaun, no halo sensibilizasaun, nune’e bele prevene ba iha pratika korupsaun, potensia krimi korupsaun sira ne’ebe mak atu mosu, no mos halo investigasaun kriminalidade

“Desizaun hotu ne’ebe komisaun Anti Korupsaun sei foti, hare ba iha nia kompentensia atu hare kona ba legalidade,  ne’e signifika katak karik iha investigasaun, karik iha krimi ruma ne’ebe mak mosu iha ambitu krimi korupsaun ninian, ne’ebe mak uja poder ka uja osan ka ba uja la tuir ninia dalan propio CAC,  sei halo desizaun,  servisu hamutuk ho prokurador Geral da Republika, ho Prokurador titular sira, para atu halo investigasaun ba iha problema sira ne’ebe mak mosu, bele mos ba iha Ro haksolok, bele mos ba krimi seluk ne’ebe mosu liu dalan finansiamentu”, hateten Sergio.

Sergio realsa tan konaba investigasaun ne’e mai ho forma rua, bele iha rekerimentu ka denunsia sira ne’ebe mak mai hosi instituisaun sira, iha ofiziosamente bele mai ho razaun maibe tuir Lei Polisia, PSIK, CAC, laos nain ba iha prosesu  criminal, maibe sempre iha koordenasaun ho Ministerio Publiku nudar hanesan nain, atu hare ba kazu ne’ebe lao hela iha ambitu investigasaun kriminal nian. * [ Francisco JDA  | Editor: Zevonia Vieira | TAFARA.TL | 16.12.2019 ]