Home Sosial & Politika KI Detekta Kanal Media Balun Ladauk Promove Jurnalismu Paz & Sensibilidade Jeneru

KI Detekta Kanal Media Balun Ladauk Promove Jurnalismu Paz & Sensibilidade Jeneru

Rezultadu Monitorizasaun no Analize Media Fulan Janeiru – Junu 2019

165
0
SHARE
KI Detekta Kanal Media Balun Ladauk Promove Jurnalismu Paz & Sensibilidade Jeneru

Caption: Diretor Diresaun Dezenvolvimentu Analize Media [DDAM], Alberico da Costa

KI halo Monitorizasaun ba kanal media mak hanesan TVTL, RTL, GMNTV, Diario Nacional, Timor Post, STL, Independente, Tatoli, Tempo Timor, Dili Post no tafara.tl ba nutisia hosi fulan Janeiru to’o Junu 2019.

Liu hosi rezultadu monitorizasaun ne’ebe hatoo hosi Diretor Diresaun Dezenvolvimentu Analize Media [DDAM], Alberico da Costa katak liu media mainstreaming balun nian kobertura sedauk promove jurnalismu ba paz no laiha sensibilidade ba jeneru.

“Infrasaun barak liu ne’ebe meus komunikasaun sosial ka jornalista sira komete mak infrasaun hasoru kodigu etika pontu 6 no prinsipiu universal jurnalis, tanba meuis komunikasaun sira ka jornalista sira laiha konfirmasaun ho parte seluk konaba notisia ne’ebe sira publika, kanal balun mos publika la iha sensivel jeneru tuir prinsipiu hanesan gender sensitive reporting ka gender perspective journalism”, hateten Albrico da Costa, iha salaun Yayasan HAK, 30/07.

Alberico mos reafirma katak meu komunikasaun sosial balun mos viola kodigu etika pontu 2 tanba hatama mos sira nia opiniuan iha nutisia laran no hatoo informasaun ho ezaru, viola pontu 5 tanba jornalista ka meu komunikasaun sosial halo julgamentu (trial by the press_Red.) ba ema ka instituisaun seluk.

Monitorizasaun ba kanal media mak hanesan TVTL, RTL, GMNTV, Diario Nacional, Timor Post, STL, Independente, Tatoli, Tempo Timor, Dili Post no tafara.tl ba nutisia hosi fulan Janeiru to’o Junu 2019.

Membru Konselho Imprensa, Jose Ximenes iha enkontru ho Xefe Redasaun no Editor sira hateten katak objetivu hosi monitorizasaun ne’e katak atu fo hanoin ba media sira atu bele kontinua aprende no hadia an diak liutan iha servisu jurnalismu nian.

“Ekipa monitorizasaun halo analize ba kontiudu nutisia ne’ebe hakerek la tuir kodigu etika jurnalistika, sei kontinua fo feedback para iha future bele hakerek diak liutan”, hateten Jose Ximenes.

Metodolojia ne’ebe monitorizasaun uza mak KI uza formatu ne’ebe hare liu ba kontiudu nutisia, prinsipiu jurnalistika, aspeitu legal no valor nutisia sira. Hare mos iha parte kualitativu no kuantitativu, KI mos uza kodigu etika jurnalistika, Lei Komunikasaun Sosial no Prinsipiu Jurnalistiku  nian, hodi analize ba produtu jurnalista ne’ebe kanal media sira publika.

Liu hosi enkontru refere KI husu ba kada instituisaun media presiza iha konsellu redasaun ida ne’ebe forte no independente hosi influensia hotu, iha kada kanal media, atu garante lia los no publiku ninia direitu ba asesu informasaun. KI mos husu atu iha espasu igual ba parte hotu, ne’ebe sai objetu ba produtu jornalistika kanal media sira nian, atu kumpri prinsipiu universal jurnalistika, presiza iha kontinuasaun hodi sosializa kodigu etika jurnalistika no Lei Komunikasaun Sosial ba jornalista Timor oan sira, nune’e bele evita konsekuensia no risku legal sira iha future no kanal media sira presiza kria editor club.* [Zevonia Vieira | TAFARA.TL | 30.07.2019]