Home Sosial & Politika Komemora Loron Interfet Ba Tinan 20, Lu Olo: Misaun Interfet Hodi hari Fali Paz no Estabilidade

Komemora Loron Interfet Ba Tinan 20, Lu Olo: Misaun Interfet Hodi hari Fali Paz no Estabilidade

193
0
SHARE
Komemora Loron Interfet Ba Tinan 20, Lu Olo: Misaun Interfet Hodi hari Fali Paz no Estabilidade

Caption: tropas interfet kaer liman ho labarik ida iha tinan 1999. [Foto: Copyright media embaixada Australia iha Timor | 20.092.109]

Nasaun Timor-Leste tama ona tinan 20 ba hodi comemora Interfet tama ain iha Timor-Leste, depois de loron votasaun ne’ebe monu iha loron 30 Agustu 1999.

Iha loron komemorasaun, Prezidente da Republika, Dr. Francisco Guterres Lú Olo, hatoo deskursu katak Forsa Internasional ba Timor-Leste [Interfet], hodi lori comunidade internacional nia naran tama iha Dili, hodi kumpri Rezolusaun 1264 Nasoens Unidas nian.

Prezidente Lú Olo hateten misaun ida ne’e nia prioridade mak atu harii fila fali pas no estabilidade iha Timor-Leste. Forsa internacional ne’ebe lidera hosi Australia, ho Komando Jeneral Peter Cosgrove, ne’ebe ikus mai sai Governador Jeral Australia nian.

“Ohin ita selebra loron importante ida ne’ebé halo parte ita-nia prosesu luta ba autodeterminasaun no independénsia. Ita-nia mehi atu kore an husi domíniu estranjeiru nakfila ba realidade iha loron 30 fulan-Agostu tinan 1999, bainhira ita-nia Povu, ho barani no laran-metin, hala’o ita-nia direitu ba autodeterminasaun liu husi sufrájiu universál, sekretu no diretu, ne'ebé rekoñesidu iha mundu tomak. Ho supervizaun Nasoins Unidas nian, ita-nia populasaun besik pursentu ualunulu rejeita autonomia ho Indonézia no nune’e, hili ukun-rasik an”, hateten Lú Olo iha palácio governu, 20/09.

Prezidente Lú Olo afirma katak mehi ne’e povu hetan duni maibé,  Povu timoroan selu ho folin  aas tebes. Bainhira ONU fó-sai  rezultadu Konsulta Populár nian, mosu klima tensaun ne’ebé ikus mai kria laloran violénsia no terrór husi milísia pró-Indonézia hamutuk ho membrus balun husi TNI.

“Polítika “sunu rai” harahun ita –nia territóriu   katoluk rua, inklui ita-nia patrimóniu kulturál lubuk boot ida, ita-nia memória institusionál. Haktuir relatóriu husi Komisaun Lia-Loos, Simu Malu no Rekonsiliasaun, ema hamutuk rihun ida atus haat to’o rihun ida atus lima mak hetan oho ka lakon iha períodu tinan 1999 nia laran, no maizumenus ema rihun atus rua limanulu sai refujiadu iha Timor Osidentál”, hateten Lú Olo

Situasaun ne’ebe akontese iha tinan 20 kotuk liuba, Prezidente da Republika relembra fila istoria ne’e, hodi hateten katak situasaun harahun no hata’uk ita-nia ema, hamosu protestu iha fatin barak iha mundu.

“Impaktu husi kordaun umanu sivíl katak kaer liman metin, iha rai oin-oin, hodi tulun lesuk  Timor-Leste. Ema rihun ba rihun marxa iha liurón-públiku no ezije husi sira-nia governu, atu halo buat ruma hodi kontribui ba harii fila fali pás no estabilidade iha Timor-Leste”, esplika Lú Olo

Organizasaun Nasois Unidas, haree ba Kapítulu VII Karta Nasoins Unidas nian,  aprova Rezolusaun 1264, iha 15 setembru 1999, ne’ebé autoriza harii forsa multinasional ida atu mai Timor-Leste, rai sira ne’ebé halo parte INTERFET maka hanesan Austrália, Nova Zelândia, Estados Unidos da América, Reino Unido, Tailândia, Brasil, Canadá, Fiji, França, Alemanha, Irlanda, Itália, Jordânia, Kenya, Malásia, Noruega, Paquistão, Filipinas, Portugal, Singapura e Coreia do Sul.

Enkuantu INTERFET buka estabiliza situasaun, ita-nia Forças Armadas de Libertação Nacional de Timor-Leste (FALINTIL) halibur an iha fatin akantonamentu iha Waimori-Laleia, Atelari-Baucau no mós iha Nahareka no Osolekimeta iha Ossú.  Situasaun runguranga no raan-fakar ne'e iha territóriu laran tomak hamosu sentimentu oin-oin  kahur-malu Iha akampamentu sira-ne'e.

Maski nune'e, FALINTIL konsege hakmatek an  iha sira-nia hela fatin tanba hatene tiha ona katak dalan naruk luta nian habadak tiha ona. Sira la halo retaliasaun ida. Iha akantonamentu sira ne’e,  gerrileiru sira hakru'uk nafatin ba orientasaun husi  komandu superior atu mantein  dixiplinadu, armadu no kumpre Akordu 5 Maiu asina iha Nova Iorke entre Portugál no Indonézia: katak autoridade indonézia sira mesak de’it mak kaer responsabilidade ba seguransa.

Xefe Estadu ne’e mos hatoo katak, ba faze luta daruak ne’e, ita konta nafatin ho solidariedade husi ita-nia belun hori uluk sira husi rede internasionál ne’ebé ita hametin to’o ohinloron, no mós ho kooperasaun  bilaterál no multilaterál. * [Zevonia Vieira | TAFARA.TL | 20.09.2019]