Home Sosial & Politika Komunidade Luroboro, Uatulari Susar Asesu ba Merkadu

Komunidade Luroboro, Uatulari Susar Asesu ba Merkadu

77
0
SHARE
Komunidade Luroboro, Uatulari Susar Asesu ba Merkadu

Caption: Fotografia Ilustrasaun (EPA Photo, taken from www.nst.com.my)

“Iha loron Tersa no Sexta ami lori sasan ba fa’an iha merkadu Suku Laisorulai, Postu Administrativu Quelecai, la’o ain deit, kuandu iha tempu bai loro kareta ruma tula rai henek entaun ami sa’e tuir, maibe, kareta laiha entaun la’o deit”.

Deklarasaun ne’e hato’o husi membru komunidade aldeia Loroboro, Suku Makadiki, Postu Administrativu Uatulari, Munisipiu Viqueque, Luis do Rego bainhira dada lia ho Jornalista Tafara.tl iha Luroboro (05/09/2019).

Membru komunidade ne’e esplika katak, iha fatin refere maioria komunidade moris hanesan ema agrikultor, nune’e atu sustenta sira nia familia tenke ba fa’an produtu ne’ebé sira kuda iha to’os. Atu ba fa’an sira nia produtu hirak ne’e, komunidade sira tenke ba fa’an iha merkadu Laisorulai, la’o ain kuaze horas lima to’o neen ekivale distansia kilometru 25 to’o 30 hodi to’o iha merkadu refere.

Luis akresenta, kuandu iha tempu bai loron, kareta pribadu tula rai henek ruma iha entaun komunidade sira sa’e tuir, maibe, kareta laiha entaun la’o deit. Bainhira tempu udan komunidade sira sai husi uma 12 horas kalan to’o iha merkadu Laisorulai tuku neen dadersan. Hafoin merkadu, tuku 12 meiudia fila fali to’o iha Lurobor tuku neen lae tuku hitu kalan. Nune’e, membru komunidade nee husu ba Governu atu hadia estrada nune’e bele fasilita komunidade sira hodi asesu ba merkadu hodi fa’an sira nia produtu mak iha. Luis mós afirma, to’o oras ida ne’e, komunidade refere ladauk asesu ba eletrisidadde, nune’e nia husu ba governu atu rezolve problema refere.

Entretantu, Chefe Aldeia Luroboro, Mariano do Rosario hateten, parte autoriedade hato’o ona preokupasaun hirak ne’e ba autoriedade nasional, maibé to’o oras ida ne’e laiha resposta.

“Ne’e area rural, ponte mós laiha, estrada ladiak, nune’e komunidade sira tenke la’o dok hodi fa’an sira nia produtu hodi bele hetan osan. Hanesan autoriedade lokal, ami perna halo proposta kona-ba estrada, eletrisidade, dala barak ona, maibé to’o oras ne’e laiha resposta. Uluk ami hato’o direta ba Prezidente Republika Taur Matan Ruak, foin dadauk ne’e mós halo tan, maibé nafatin ladauk iha resposta. Ami lahatene, tanba saida mak seidauk resposta, faillansu iha ne’ebé karik! ami sei ejize nafatin ba iha Suku, Postu, Munisipiu no Nasional, para bele atende lalais ami nia problema ne’e”, dehan Chefe aldeia Luroboro.

Populasaun Aldeia Loroboro hamutuk ema 261, kompostu husi feto 137 no mane 124. Aldeia Loroboro baliza ho Postu Administrativo Quelecai, Munisipiu Baucau.* [Martinho Moniz | Tafara.tl | 08.09.2019]