Home Sosial & Politika Kooperasaun Entre KI ho PNTL no CNC, Gill: Jornalista Tenke Komesa Hakerek Istoria Pasadu

Kooperasaun Entre KI ho PNTL no CNC, Gill: Jornalista Tenke Komesa Hakerek Istoria Pasadu

306
0
SHARE
Kooperasaun Entre KI ho PNTL no CNC, Gill: Jornalista Tenke Komesa Hakerek Istoria Pasadu

Caption: Konselho Imprensa iha loron atribuisaun karteira profesional ba jornalista sira. [Foto: Santina Lucia da Costa | 20.12.2019]

“Povu Timor ninia moris desde ezisti to’o mai agora, liu-liu tinan 40 no 50 liu ba, nakonu ho trajedia no luta, istoria barak mak ema seluk de’it mak hakerek, agora tempu ona maluk jornalista sira atu kontribui ba rekolla informasaun sira ne’e, hodi ikus mai bele sai dokumentus istoriku ne’ebé bele husik hela jerasaun tuir mai, tanba ida ne’e mós inklui jurnalizmu nia papel”. Prezidente KI

Konselho Imprensa [KI] asina nota de kooperasaun ho Polisia Nasional Timor-Leste [PNTL] no Centro Nacional Chega! [CNC]. Liu hosi asina nota kooperasaun ne’e Prezidente KI, Virgilio da Silva Guterres, hateten liu hosi kooperasaun ne’e bele hametin entendimentu hosi parte rua, atu idak-idak hatene ninian papel, rekoñese mos ida seluk nia papel iha sosiedade, ho nune’e bele reduz dezentendimentu ne’ebé dalaruma mosu entre profisaun rua ne’e iha kampu serbisu.

“Haksolok tebes ohin Konsellu Imprensa bele asina nota de koperasaun ho PNTL no mós ho Chega, iha ambitu ne’ebé ke jeralmente hanesan oinsa atu garante liberdade asesu ba profesional jornalista sira no mós oinsa atu garante profesional jornalista ne’ebé fahe informasaun ba publiku, informasaun ho kualidade, informasaun ne’ebé la’os koalia de’it kona-ba situasaun real, prezente ninian hodi haree ba future, maibé mós atu fahe ba jerasaun foun saida mak akontese iha pasadu”, katak Prezidente KI.

Prezidente KI mos hateten povu Timor ninia moris desde ezisti to’o mai agora, liu-liu tinan 40 no 50 liu ba, nakonu ho trajedia no luta, istoria barak mak ema seluk de’it mak hakerek, agora tempu ona maluk jornalista sira atu kontribui ba rekolla informasaun sira ne’e, hodi ikus mai bele sai dokumentus istoriku ne’ebé bele husik hela jerasaun tuir mai, tanba ida ne’e mós inklui jurnalizmu nia papel.

“Asina Nota kooperasaun ho Centro Nasional Chega! ne’e mós importante teb-tebes, tanba ita koalia kona-ba liberdade espresaun, liberdade informasaun, jerasaun foun sira mós hakarak hatene ideias sira, razaun mak sira nia avo sira , tiu sira balun mate to’o agora rate laiha. Kooperasaun ida ne’e, nu’udar kontribuisaun ba prosesu naruk ida, ema barak seidauk hatene, entaun kooperasaun ida ne’e bele fasilita mós jornalista sira la’os de’it lor-loron husu ba publiku sira ho di’ak, bele mós rekolla dokumentus istoria sira ne’e, atu bele fahe mós ba publiku, atu nune’e fó hanoin ba jerasaun foun sira katak liberdade sira ne’ebé ohin loron sira goza”, hateten Virgilio Guterres.

Iha parte seluk, Reprezentante PNTL, José Soares hateten instituisaun rua ne’e boavontade ne’ebe mak diak, hakarak estabelese kooperasaun ne’ebé mak di’ak hodi serbi povu.

José Soares hateten PNTL orgulhu tanba bele serbisu hamutuk ho Konselho Imprensa no media mak sai espasu merkadu ida, atu bele promove produtu, estadu nia produtu, atu fó sai ba sidadaun sira saida mak ita halo.

Iha fatin hanesan Diretor Ezekutivu CNC, Hugo Fernandes hateten CNC, relatoriu Chega! iha rekomendasaun ida hodi rekoñese esforsu susar boot sira ne’ebé mak jornalista sira halo durante tinan 24 nia laran, para depois atu informa kona-ba saida mak akontese.

“Jornalista timoroan sira iha baze ida ne’ebé forte kona-ba direitus umanus, iha baze ida forte kona-ba ita nia istoria nasaun, hatene didiak instituisaun saida de’it mak ita tenke tau matan ba, tanba instituisaun sira ne’e labele husik fali eransa aktu violentu sira ba iha instituisaun foun sira”, hateten Hugo Fernades

Hugo espera katak nota entendimentu ne’ebe asina ho Konselho Imprensa hein katak bele fo hanoin katak iha padraun ne’ebe dignu atu bele reseponde ba situasaun krizi sira.