Home Sosial & Politika Loron Direitus Humanus, RBR Husu Estadu Tenke Garante Povu nia Rai no Hela Fatin

Loron Direitus Humanus, RBR Husu Estadu Tenke Garante Povu nia Rai no Hela Fatin

380
0
SHARE
Loron Direitus Humanus, RBR Husu Estadu Tenke Garante Povu nia Rai no Hela Fatin

Caption: Koordenador Rede Ba Rai Hortencio Pedro Vieira

"Ita nia estadu seidauk garantia nia sidadadaun sira nia direitu baziku sira hanesan rai no hela fatin, direitu ba edukasaun ne’ebe diak, no direitu ba saude". Hortencio Vieira 

Loron 10 de Dezembru nudar loron internasional direitus humanus, sosiadade mundu tomak hamutuk hodi komemora loron importante ne’, hodi hakilar ba direitu povu nian ne’ebe mak to’o ohin loron sei viola.

Relasiona ho loron importante ne’e Rede Ba Rai [RBR] nu’udar Rede husi Organizasaun 24 ne’ebe luta ba povu nia direitu, liu-liu Direitu ba Rai no hela fatin realiza konferensia imprensa ho tema “Loron Internasional ba Violasaun Direitus Umanus”.

Liu hosi konferensia imprensa, Koordenador Nacional Rede ba Rai, Hortencio Pedro Vieira deklara katak situasaun direitus umanus iha Timor-Leste, persija tau atensaun seriu.

“Ohin loron iha komemorasaun ida ne’e ita mai ho tema loron internasional ba violasaun direitus umanus tamba ita nia estadu seidauk garantia nia sidadadaun sira nia direitu baziku sira hanesan rai no hela fatin, direitu ba edukasaun ne’ebe diak, no direitu ba saude”, hateten Hortencio, 11/12.

Hortencio mos hateten  nu’udar Rede husi organizasaun 24 ne’ebe serbisu ba asuntu rai no hela fatin mai ho ezijensia no rekomendasaun ba estadu Timor-Leste atu nafatin tau matan ba asuntu sira ne’ebe liga ho povu sira nia direitu baziku.

Ba iha komemorasaun loron internasional direitus humanus ne’e, Rede Ba Rai hatoo sira nia ezijensia ne’ebe liga direitamente ho komunidade sira nia direitu ba rai no hela fatin hanesan implementasaun ba Lei Espropriasaun, Rejime Espesial ba Definisaun Titularidade Bens Imoveis, Lei Baze Ordenamentu Territorial no aselera kriasaun ba Lei komplementar sira, atu bele reforsa implementasaun husi Lei ba rai, no hapara kontratu ho kompanha (GMN Holding & ARM APPRIZE), ne’ebe serbisu ba rejistrasaun rai iha Timor-Leste, tamba bazea ba peskiza anliza impaktu husi sistema rejistrasaun iha Timor-Leste ho naran Sistema Nacional De Cadastru mosu violasaun barak ba povu nia direitu ba rai.

Rede Ba Rai mos rekomenda ba governu, hodi reforsa institusaun estadu hanesan Diresaun Nasional Terras Propriedades, atu bele halao servisu ne’e, atu nune’e bele iha sustentabilidade no redus gastus husi Orsamentu Jeral do Estadu ne’ebe selu ba kompanha.

Iha fatin seluk estudante ne’ebe lakohi hatoo nia naran, hateten nudar ema humanu iha direitu nebe hanesan no trata ho dignu.

“Iha kontestu Timor-Leste ohin loron uza demokrasia, hodi haburas no promove ema hotu, atu asesu ba justisa, edukasaun, saude, nebe gratuita no fo liberdade ba ema hotu, hodi espresa sira nia opiniaun iha publiku. Timor Leste mesmo sei iha dezafiu balun, maibe nafatin iha kolaborasaun ho entidades hotu inklui governo, CSO, NGO, seitor privadu, hodi sei hametin no proteje diak liutan ema hotu nia direitu no ita nian lian mak ita direitu”, nia espresa. * [ Zevonia Vieira | TAFARA.TL | 12.10.2019]