Home Sosial & Politika Lu Olo: Referendu 1999 Akontese Tanba Povu Hakarak Hakotu Konflitu Ho Indonezia

Lu Olo: Referendu 1999 Akontese Tanba Povu Hakarak Hakotu Konflitu Ho Indonezia

48
0
SHARE
Lu Olo: Referendu 1999 Akontese Tanba Povu Hakarak Hakotu Konflitu Ho Indonezia

Caption: Prezidente da Republika Timor-Leste, Dr Francisco Guterres Lu Olo hatoo deskursu ofisial

“Hau tenke fo liafuan espesial ba ita nia joven sira ne’ebe ho matenek no aten barani, transfere ita nia luta ba Indonezia no loke frente ida tan, bainhira sira harii RENETIL, ho lideransa hosi sauduzu Fernando Lasama de Araujo, FECLETIL no organizasaun sira seluk ne’ebe moris iha Indonezia”. Lú Olo

Povu Timor komemora loron konsulta popular ba tinan 20, povu tomak hanoin hikas fila fali akontesementu no tragedia ne’ebe akontese iha Timor laran tomak, ne’ebe halo husi grupu milisia pro Indonesia no tropas Indonesia nian.

Liu hosi komemorasaun refere Prezidente da Republika, Dr. Francisco Guterres Lú Olo hatoo deskursu iha Tasi Tolu, katak Povu selebra ho aten barani hakaat ba fatin votasaun no vota ba independensia. Loron ida ne’e nudar loron reafirmasaun ba korajen no dedikasaun ita nia povu, loron ba povu tomak fo memoria no omenajen ba eroi sira, loron ba ukun rasik an

Hau hakarak fo hanoin katak, referendu 1999 akontese tanba timoroan mos hakarak hakotu konflitu ho Indonezia, liu hosi dalan dialogu, ita buka solusaun negosiada. Hahalok uluk liu ne’ebe rezistensia Timorense hatudu vontade ida ne’e, akontese iha tinan 1988, bainhira Komandante Xanana Gusmao hasoru malu ho Komandante Purwanto iha Ossue Lariguto no asina akordu hatun kilat, iha 23 Marsu 1983. Akordu hatun kilat la lao ba oin tanba parte ida hakotu tiha iha fulan Agostu, maibe lideransa Timorese buka nafatin solusaun negosiada. Iha tinan hanesan, Fretilin hatoo planu de paz ba komunidade internasional ho supervizasaun Nasoens Unidas nian”, hateten Lú Olo, 30/08

Lú Olo mos fo hanoin hikas fali katak iha tinan 1989, Amu Bispu D. Ximenes Belo haforsa liutan rezistensia no povu tomak nia hakarak, bainhira hakerek ba Nasoins Unidas no husu ba organizasaun internasional halo referendu iha Timor-Leste. Iha 1992, CNRM hatoo mos planu de paz ba komunidade internasional. Kauza Timor-Leste nian sei konnesidu liutan hafoin imajen Maskre Santa Cruz to’o iha rai liur iha tinan 1999.

Ba konvidadus internasional no povu tomak, Xefe Estadu mos fo hanoin katak fator seluk ne’ebe fo dalan ba mudansa mak krize asiatika no evolusaun hosi politika iha Indonezia laran rasik.

Hau tenke fo liafuan espesial ba ita nia joven sira ne’ebe ho matenek no aten barani, transfere ita nia luta ba Indonezia no loke frente ida tan, bainhira sira harii RENETIL, ho lideransa hosi sauduzu Fernando Lasama de Araujo, FECLETIL no organizasaun sira seluk ne’ebe moris iha Indonezia”, tenik Lú Olo. * [ Zevonia Vieira | TAFARA.TL | 31.08.2019 ]