Home Sosial & Politika Mari: Mandatu Remata Maibe Mehi Sedauk Remata, Atu Halo Oe-Cusse Sai Referensia

Mari: Mandatu Remata Maibe Mehi Sedauk Remata, Atu Halo Oe-Cusse Sai Referensia

2,010
0
SHARE
Mari: Mandatu Remata Maibe Mehi Sedauk Remata, Atu Halo Oe-Cusse Sai Referensia

Caption: Sesante Prezidente RAEOA-ZEESM halo konferensia imprensa ho jornalista sira iha aeroporto Prezidente Nicolao Lobato. [Foto: Zevonia Vieira | 31.07.2019]

"Hau labele husik Estadu. Interese Estadu defini ona iha Konstituisaun no iha Lei, laiha ema ida iha estadu nia leten. Hau nia kombate hosi ne’e ba oin atu halo Fretilin manan, atu defende estadu". Marí Alkatiri

Dr. Mari Alkatiri remata ona nia mandatu nudar Prezidente Autoridade Rejiaun Administrativa Espesial Oe-Cusse Ambeno no Zonas Espesial Ekonomia Social Merkadu [RAEOA - ZEESM], iha loron 31/07 Mari Alkatiri fila hikas mai Dili, hodi kontinua halo servisu ba partidu Fretilin.

Liu hosi konferensia imprensa, iha aeroporto Prezidente Nicolau Lobato, hatan ba TAFARA.TL liga ho mandatu ne’ebe mak remata ona, Mari Alkatiri hateten sei nungka husik partidu no mos sei la husik estadu.

“Hau ema ne’ebe nungka husik partidu, maibe nungka mos husik estadu. Hau hanoin katak partidu Fretilin ne’e partidu ne’ebe defende liu estadu iha rai ida ne’e, tanba ne’e hau labele husik estadu. Interese estadu defini ona iha Konstituisaun no iha Lei, laiha ema ida iha estadu nia leten. Hau nia kombate hosi ne’e ba oin atu halo Fretilin manan, atu defende estadu”, hateten Mari, 31/07.

Mari Alkatiri afirma mos katak ona maske mandatu remata, maibe mehi sedauk remata. Mehi konaba atu halo Oe-Cusse sai laboratoriu, atu halo Oecusse sai referensia ba Timor-Leste tomak, “se deit mak ba iha ne’eba sedauk konsege halo. Bolu hau arogante, bolu deit ba maibe se deit mak sei ba sedauk konsege halo”.

Liga ho planu estrategia ZEESM nian ne’ebe prepara ona iha tempu kotuk liu ba, karik sei kontinua implementa ba Prezidente RAEOA foun? ba TAFARA.TL Mari Alkatiri hateten, “durante kampanna hau dehan ona, saida mak hau halo ona, imi bele hadau, saida mak sei iha hau nia kakutak laiha ema ida hadau”.

Lider nasional ne’e mos konfesa katak preokupa ho kualidade ema ne’ebe sei ba lidera Oe-Cusse tanba tuir observasaun hosi Mari Alkatiri esplika katak servisu iha nivel nasional la hatudu kualidade.

“Ita hotu iha atensaun hare katak laiha kualidade, se nasional rasik laiha kualidade, sira atu lori kualidade ba Oecusse halo oinsa”, tenik Mari Alkatiri.

Tuir planu ne’ebe mak sei desidi iha Comite Central da Fretilin [CCF], Sekretariu Jeral Fretilin, Mari Alkatiri sei simu mandatu hosi CCF hodi halo dialogu.* [ Zevonia Vieira | TAFARA.TL | 31.07.2019 ]