Home Sosial & Politika MEDSOS Sai Obstaklu ba Servisu Jurnalismu

MEDSOS Sai Obstaklu ba Servisu Jurnalismu

Akara: Tenke Halo Edukasaun Sivika Konaba Internet Saudavel

92
0
SHARE
MEDSOS Sai Obstaklu ba Servisu Jurnalismu

Caption: Mericio Juvenal Akara, daruak hosi karuk (Photo: PRESIDENCIAREPUBLICA.TL)

“Kna’ar importante hosi jornalista professional sira atu fo informasaun ne’ebe los, kredibel ba publiku, no fo hanoin ba publiku katak informasaun ne’ebe fo sai media sosial sedauk sai informasaun ne’ebe los”. Prof. Dr. Shahbaz Khan

Konselho Imprensa Timor-Leste realiza Konferensia internasional Dili Dialogue Forum [DDF] ba daruak ho tema Media Sosial: Obstakulu sira ba Jornalista no Privasudade iha Sosiedade Modernu”.

Prezidente Konselho Imprensa, Virgilio Guterres hatoo intervensaun loron dahuluk katak DDF ba tinan ida ne’e Konselho Imprensa [KI] hili topiku konaba Media Sosial [MEDSOS] nudar obstaklu ba servisu jurnalismu nian tanba iha tempu agora Media Sosial famouza iha era digital agora, maioria sidadaun hotu iha mundu uza sosial media hanesan facebook hodi asesu informasaun.

“Liu hosi dialogu ida ne’e ita atu hetan esperiensia foun oinsa media sira uza plataforma ida ne’e [MEDSOS] ho diak no responsabilidade”, hateten Presidente KI, 09/05 iha Salaun Sao Jose, Catedral Dili.

Iha tempu hanesan Direitor no Reprezentante edifisiu UNESCO iha Jakarta, Prof. Dr. Shahbaz Khan hateten katak programa UNESCO nian agora foka konaba media sosial ne’ebe liga ho servisu jurnalismu professional, ne’ebe sai obstaklu boot ba media professional.

“Kna’ar importante hosi jornalista professional sira atu fo informasaun ne’ebe los, kredibel ba publiku, no fo hanoin ba publiku katak informasaun ne’ebe fo sai media sosial sedauk sai informasaun ne’ebe los, la kredibel tanba la tuir kodigu etika jurnalistika no prinsipiu jurnalismu”, hateten Shahbaz Khan.

Ho era digital ne’ebe fo obsatklu boot ba servisu jurnalismu nian, karik presiza kria regulamentu ba uza media sosial iha Timor-Leste, ba TAFARA.TL Ministru Reforma Lejislativa no Asuntu Parlamentár, Fídelis Magalha?s ne’ebe partisipa iha forum refere hateten, bainhira koalia konaba regulamentu liga ho social media, regulamente ne’e rasik labele kontra direitu fundamental sidadaun sira nian atu espresa sira nia hanoin bainhira sira hakarak espresa iha social media

“Saida mak tenke hare didiak mak konaba privasidade ho dever hirak ne’ebe ezerse kargu publiku no direitu sidadaun nian ba nia naran diak. Ida ne’e mak tenke iha diskusaun klaru no buat sira ne’e, ami sei la halo mesak, tanba regra legislativa foun ne’ebe mak rezolusaun fo sai katak, Lei sira antes governu aprova no lori hanesan proposta ba iha Parlamentu Nasional, tenke iha estudu no impaktu regulatoriu”,esplika Fidelis.

Iha hanoin hanesan hosi Sekretariu Estadu Komunikasaun Sosial, Mericio Akara ba TAFARA.TL liga ho media sosial ne’ebe maioria sidadaun uza hodi fahe informasaun tuir sira nia espresaun, hateten iha tempu agora tenke hare vantazen no desvantazen uza social media, “kuandu ita to’o ona konkluzaun katak desvantazen as liu, tanba viola fali ita nia sidadaun nian direitu, atu asesu informasaun los, estraga fali sidadaun nia karakter atu koalia buat los no honestidade, maibe tanba sira uza social media hodi halo hoax no dezenvolve news falsu, kuandu ameasa ona direitu sidadaun nian, ita sei tama to iha hanoin atu dezenvolve Lei konaba informasaun no transasaun elektronika maibe sekarik iha nesesidade”.

Akara hatutan katak prioridade SECOMS nian agora mak atu dezenvolve uluk media literacy no edukasaun sivika konaba internet sehat [Internet saudavel. Red], oinsa promove informasaun los, labele uza sosial media para fahe informasaun falsu, halo propaganda falsu. Buat hotu tenke resolve ho Lei no buat balun bele resolve ho aprosimasaun seluk.

DDF ne’ebe sei halao durante loron rua, hetan partisipasaun hosi Konselho Imprensa no organizasaun media nian hosi nasaun sira iha Rejiaun Sudeste Aziatiku hanesan Indonesia, Thailandia, Filipina no inklui Australia. * [Zevonia Vieira | TAFARA.TL | 09.05.2019]