Home Ekonomia & Business Parlamentu Australia Aprova Ona Akordu Petroliu no Gas ho Timor-Leste

Parlamentu Australia Aprova Ona Akordu Petroliu no Gas ho Timor-Leste

138
0
SHARE
Parlamentu Australia Aprova Ona Akordu Petroliu no Gas ho Timor-Leste

Caption: Ministru Agio Pereira no Ministru Negosius Estranjeirus Australia Julie Bishop asina tratadu iha New York, tinan kotuk. Akordu ida neé iha Segunda-feira (29/7) semana neé ratifika hosi Parlamentu Australia. (Photo: ABC.NET.AU)

Parlamentu Australianu aprova ona tratadu fronteira maritima ho Timor-Leste, neébe regula mos konaba oinsa hafahe benefisiu hosi petroliu no gas entre nasoens rua neé, haktuir notisias neébe publika iha sbs.com.au, edisaun 30/07/2019.

Tratadu refere asina ona entre Australia no Timor-Leste iha fulan Marsu tinan kotuk, hakotu disputa sobre fronteira maritima neébe diskuti iha tempu naruk, hatutan sbs.com.au.

Lejislasaun ida neé Parlamentu Federal aprova iha Segunda-feira (29/7) para kria rejime foun hodi kompartilha petroliu no gas iha Tasi Timor, area neébe konhesida ho Greater Sunrise.

Tuir akordu refere, benefisiu sei hafahe ba 80 - 20 se gas kanaliza no prosesa iha Australia ka 70 - 30 se kanaliza ba Timor-Leste.

Primeiru Ministru Australianu Scott Morrison hateten Governu Australia koopera ho Governu Timor-Leste no operadores petroliu offshore para fornese seguransa komersial.

"Ho aprovasaun lejislasaun konaba implementasaun tratadu neé, Australia agora dadaun prontu halo parseira ho Timor-Leste hodi dezenvolve hamutuk kampu gas Greater Sunrise para lori benefisiu ba paizes rua", Morrison hatoó iha ninia deklarasaun hamutuk ho kolegas gabinete sira seluk. 

Greater Sunrise sei kria oportunidade foun ba Timor-Leste hodi hetan reseitas, nomos dezenvole aspetus komersial no industria iha Timor-Leste, neébe importante teb-tebes hodi dezenvolve ekonomia Timor-Leste iha futuru.

Entretantu Parlamentu Nasional Timor-Leste mos aprova ka ratifika ona tratadu mak hanesan iha loron 23 Julho 2019, ho votus afavor 42 no kontra 23.* (Metodio Caetano Moniz | TAFARA.TL | 31.07.2019)


Fontes: sbs.com.au