Home Sosial & Politika PR Lu Olo Agradese Ba Apoiu Solidariedade Internasional Ba Referendu 1999

PR Lu Olo Agradese Ba Apoiu Solidariedade Internasional Ba Referendu 1999

171
0
SHARE
PR Lu Olo Agradese Ba Apoiu Solidariedade Internasional Ba Referendu 1999

Caption: povu Timor sira partisipa iha loron votasaun iha 30 Agostu 1999 hodi determina povu nia ezijensia ba ukun rasik an. [copyright google | 31.08.2019]

"Ita la haluha País sira ne’ebé ko’alia lian portugés, iha Áfrika,  ne’ebé sai retaguarda estratéjika ba ita-nia luta diplomátika, iha ita-nia luta libertasaun nasionál. País sira ne’e mak tanen ita-nia mehi Ukun-an husi kedas 1974, bainhira ita hahú organiza-an”. Lú Olo

Prezidente da Republika, Dr. Francisco Guterres Lú Olo apresia ba apoiu solidariedade internacional ne’ebe mak fo ba povu Timor durante iha okupasaun ilegal Indonezia.

Liu deskursu Prezidente da Republika, iha loron komemorasaun tinan 20 Referendu, Lú Olo hateten presaun internacional aumenta ba kestaun Timor-Leste no iha mudança politika iha Indonezia rasik konjuntura ida ne’e tomak mak loke dalan ba Referendu iha Timor-Leste, nu’udar instrumentu ida hodi hetan solusaun pasífika ida, no salvaguarda interese husi parte hotu-hotu.

“Ita konsege Referendu 1999 ho esforsu husi ita rasik, timoroan,  no mós husi komunidade internasionál, iha área diplomátika, liuliu husi saudozu Kofi Annan, Sekretáriu Jerál Nasoins Unidas, iha tempu ne’ebá, no husi Portugal, nu’udar poténsia administrante. Ita la haluha País sira ne’ebé ko’alia lian portugés, iha Áfrika,  ne’ebé sai retaguarda estratéjika ba ita-nia luta diplomátika, iha ita-nia luta libertasaun nasionál. País sira ne’e mak tanen ita-nia mehi Ukun-an husi kedas 1974, bainhira ita hahú organiza-an”, hateten Lú Olo

Lú Olo hatutan ho esforsu sira ne’e hotu,  haforsa mós husi grupus solidariedade oioin, liuliu iha tinan 1999, mak  kestaun Timor-Leste tama fila fali iha  Nasoins Unidas, ho kbiit boot liután.

Organizasaun Nasoins Unidas, hatuir nia Karta Magna rasik, hetan solusaun pasífika ba kestaun Timor-Leste, ho Portugal no Indonézia, liuhusi, Akordu  5 Maiu 1999, asina iha Nova Iorke, Amérika.

Timor konsege duni afirma fila fali nu’udar Povu Timor-Leste, ho identidade rasik, bainhira ita harii segunda Repúblika, husi 20 maio 2002.  Ita hetan rekoñesimentu husi komunidade internasionál, husi ONU.

“Ita aproveita loron ohin hodi fó onra boot ba memória Kofi Annan ne’ebé husik hela ita tinan ida ona ba ita-nia belun di’ak Sérgio Vieira de Mello ne’ebé mate trajikamente iha Bagdad, Irake, tinan sanulu-resin-neen ona, ita fó mós omenajen ba ita-nia kompatriota sira, funsionáriu, voluntáriu no kolaboradór internasionál-sira husi ONU, ne’ebé lakon sira-nia moris iha momentu istóriku ida importante tebes ba ita-nia istória. Carolina Lariera, faluk Señor Sérgio Vieira de Mello nian, hamutuk ho ita ohin, no bele sente oinsá ita haksolok ninia memória, ne’ebé naran tama mós iha ita-nia istória Ukun-Rasik an”, esplika Lú Olo

Hosi luta ne’ebe povu Timor, povu internacional no nasoen unidas apoiu, Lú Olo o haksolok hateten povu Timor simu dignísimu  reprezentante sira husi parte tolu ne’ebé halo parte Akordu 5 Maiu, akordu ida ne’ebé hametin dalan ba Referendu 99.

Prezidente da Republika lori povu nia naran hatoo agredese ba Portugal, Indonezia no ONU tanba buka dalan ba timoroan hili rasik destinu. * [ Zevonia Vieira | TAFARA.TL | 31.08.2019 ]