Home Sosial & Politika Tuir Informasaun Nicolau Hakoi iha TMP Seroja, Luis: Cruz Rate Hakerek Ema Seluk nia Naran

Tuir Informasaun Nicolau Hakoi iha TMP Seroja, Luis: Cruz Rate Hakerek Ema Seluk nia Naran

136
0
SHARE
Tuir Informasaun Nicolau Hakoi iha TMP Seroja, Luis: Cruz Rate Hakerek Ema Seluk nia Naran

Caption: Luis Lobato familia hosi Saudozu Prezidente Nicolau Lobato. [Foto: Zevonia Vieira | 31.12.2019]

Nicolau Lobato nia isin mate hakoi iha Taman Makam Pahlawan Seroja Dili, maibe ninian crus ne’e hakerek ema seluk nia naran, nia rasik [Abaty] mak hateten mai hau”. Luis Lobato

Ohin loron povu Timor komemora loron Heroi Nasional, ne’ebe monu iha loron 31 Dezembru. Iha data no fulan ne’ebe hanesan saudozu Prezidente Nicolau Lobato hetan tiru no mate hosi military Indonezia iha tinan 1978.

Liu hosi komemorasaun ne’e, familia hosi Nicolau Lobato ba Neon Metin hateten katak bainhira iha familia ida mate tenke halot ho dignu, tenke iha rate ida, Nicolau Lobato hanesan heroi nasional, tenke iha negosiasaun diak, liu-liu governu tenke iha interese nafatin atu koalia, halo oinsa mak bele hetan Nicolau Lobato nia ruin.

“Hanesan familia ami iha esperansa katak ruin ne’e sei bele hetan tanba ema ne’ebe uluk oho Nicolau Lobato sei moris hela, hanesan komandante Muhamad Yunus Yosfiah, Dadin Kalbuady, Prabowo Subianto sira sei moris, entaun fasilmente Timor-Leste hanesan nasaun independente iha relasaun diak ho Indonezia, halo oinsa mak bele estabele komunikasaun ne’ebe diak, atu bele lori fila Nicolau Lobato nia isin mate para mai Timor hodi bele halot tuir kultura”, tenik Luis Lobato, iha rotunda Nicolau Lobato, 31/12.

Ba TAFARA.TL Luis Lobato mos informa katak , iha 2002, senhora Abaty, Prezidente UDT Francisco Lopes da Cruz nia kaben, hasoru malu ho Luis Lobato iha nia rezidensia, hodi informa konaba mate isin saudozu Nicolau Lobato katak hakoi iha Taman Makan Makam Pahlawan Seroja [TMPS]

“Iha tinan 2002, Senhora Abaty, Prezidente UDT Francisco Lopes da Cruz nia kaben hasoru hau iha uma, iha hau rezidensia hateten katak Nicolau Lobato nia isin mate hakoi iha Taman Makam Pahlawan Seroja Dili, maibe ninian crus ne’e hakerek ema seluk nia naran, nia rasik [Abaty] mak hateten mai hau. Taman Makam Pahlawan Seroja ne’e propriodade Indonezia nian ita labele tama arbiru iha ne’eba, informasaun ne’e mos relevante tanba senhora Abaty Siku Lopes nia kaben laos ema kualker, ema ne’ebe nia kaben uluk hamutuk ho Indonezia ukun Timor no sira bele hateten nune’e, mesmu nia laos military, maibe mais menus informasaun ne’e pertinente para ita bele hatene no bele uza hodi buka nia ruin.  Agora governu mak tenke assume papel importante ida ne’e”, hatene Luis Lobato.

Hatan ba TAFARA.TL liga ho informasuan konaba mate isin ne’ebe karik hakoi iha TMPS iha Dili, familia Lobato informa on aba estadu no governu atu buka tuir? Luis Lobato  hatan katak familia sedauk hatoo ba governu, maibe nia hateten ema sira ne’ebe hatene ne’e sei moris

“Ami sedauk hatoo ba governu maibe ema ne’ebe hatene liu ne’e sei moris liu mak hanesan Prabowo, Yunus Sofian no Dadin Kalbuady sira barak sei moris hela. Ami mos admira tanba sa to’o agora sedauk bele hetan Nicolau nia ruin, se ema sira ne’e sei moris no labele hetan, se aban bainrua mak sira mate hotu ona, se tan mak bele hatudu nia ruin iha ne’ebe. Ita nia kultura ezije ba ita isin lolon laiha mos rate tenka iha para bele tau nia naran. Governu nia servisu tenke ne’e heroi nasional no figura nasional, ami familia la lakon esperansa atu bele hetan nia ruin”, tenik Luis.

Ba TAFARA.TL Luis Lobato hateten katak haksolok tanba estadu Timor bele komemora loron nasional heroi kada tinan, atu bele fo hanoin fila fali halo nusa mak bele valoriza herois sira nia luta, Nicolau Lobato nia ruin tenke halot, nasaun ne’e tenke ba oin, povu tenke moris diak hanesan objetivu hosi luta ba ukun rasik an. Governu iha papel importante atu garante katak atu kleur ka lalais povu Timor tenke moris diak.

Iha fatin hanesan Jose Lobato oan hosi saudozu Nicolau Lobato, la fo komentariu ba TAFARA.TL bainhira husu konaba ezijensia ba estadu Indonesia ho Timor-Leste, hodi buka mate isin Nicolau Lobato, "Hau sei la koalia iha momentu ida ne'e, maibe hau sei koalia iha tempu seluk oin mai". * [ Zevonia Vieira | TAFARA.TL | 31.12.2019]