Home Sosial & Politika Virus Hamate Fahi, African Swine Fever Infektada Timor-Leste

Virus Hamate Fahi, African Swine Fever Infektada Timor-Leste

249
0
SHARE
Virus Hamate Fahi, African Swine Fever Infektada Timor-Leste

Caption: Siklu Transmisaun Virus African Swine Fever (Source: www.ringbio.com)

Timor-Leste hanesan nasaun ba dala sanulu iha paizez Aziatiku mak infektada hosi virus African Swine Fever (ASF), neébe konfirmadu hamate ona fahi hamutuk 405 iha Dili, diskonfia hadaet hosi China, maibe la fo impaktu ba ema nia saude.

Paizes Aziatiku seluk neébe virus ASF neé hadaet mak Mongolia, Vietnam, Cambodia, Laos, Burma, Filipina, Korea do Norte, no Korea do Sul, haktuir ba notisias mak fo sai iha media online theepochtimes.com, edisaun 29/09/2019.

Media neé haktuir, Chen Chi-chung, Ministru Konsellu Agrikultura Taiwan hasai avigo de viagem (travel warning) atraves ninia pajina Facebook iha dia 28 de Setembro de 2019 katak surtu (wabah) iha Timor-Leste neé grave, anota hodi numeru kazu neébe mak Governo Timor-Leste relata ba World Organization for Animal Health (WOAH).

Autoridade Timor-Leste relata ba WOAH iha dia 27 de Setembro katak konfirmasu virus ASF neé hamate ona fahi hamutuk 405 iha kapital Dili, no oras neé dadaun Australian Animal Health Laboratory halao sample test.

Chen hatutan nia duspeita virus ASF neébe espalha iha Timor-Leste mai hosi China, tanba numeru populasaun China iha Timor-Leste serka de 40 Mil, neébe diskonfia lori hahan mak hadaet ona ho virus ASF tama ba Timor-Leste.

Sidade Shenyang, Provinzia Liaoning, China rejista katak surtu ASF espalha ba dala uluk iha dia 1 de Agosto de 2018, antes hadaet ba provinsias no munisipiu sira seluk iha China. China rasik konhesida hanesan konsumidor no prudutor naán fahi bot liu iha mundu.

Maske la fo amesa ba ema nia saude no moris, maibe ate a data ladauk iha vasina ruma hodi prevene ka kura fahi neébe infektada hosi virus ASF refere, theepochtime.com realsa.

Governo Timor-Leste anunsia atraves sitiu ofisial Governo ninian, edisaun 27 de Setembro de 2019 katak sei serbisu hamutuk ho Governo Australiano para toma medida oi-oin hodi limita propagasaun virus ASF.* (Metodio Caetano Moniz | TAFARA.TL | 30.09.2019).


Source: theepochtimes.com