Home Ekonomia & Business Xefe Suku Fahilebo: Membru Grupu UBSP Kuaje 100 Resin no iha Osan Besik USD 50,000.00

Xefe Suku Fahilebo: Membru Grupu UBSP Kuaje 100 Resin no iha Osan Besik USD 50,000.00

67
0
SHARE
Xefe Suku Fahilebo: Membru Grupu UBSP Kuaje 100 Resin no iha Osan Besik USD 50,000.00

Caption: Xefe Suku Fahilebo: Marcelino da Cruz, hasai foto hafoin dadalia ho tafara.tl iha edifisiu suku Fahilebo. [Foto: Martinho Moniz | TAFARA.TL | 12.02.2020].

Grupu Usaha Bersama Simpan Pinjam (UBSP) estabelese iha suku Fahilebo iha tinan 2013, oras ne’e nia membru kuaje 100 resin no iha ona osan besik Dollares Americano Rihun Lima Nulu [USD 50,000.00].

Prezidente Grupu UBSP, Marcelino da Cruz hateten lia ne'e ba tafara.tl iha nia knar fatin. Atual Xefe Suku Fahilebo ne'e mos afirma, grupu UBSP estabelese ho objetivu ajuda nesesidade ekonómia familia nian. Nune'e kada fulan membru grupu sira rai osan no iha tempu ne’ebé sira presiza bele empresta fali hafoin hatama ho funan pursentu tolu (3%) husi total emprestimus.

“Kada fulan membru sira hatama osan depende ba sira nia forsa. Iha ne’ebá iha simpanan sukarela nomós simpanan wajib. Simpanan wajib USD 3.00 no simpanan sukarela ne’e depende sira nia kbi’it”, hateten Marcelino.

Autoriedade ne’e esplika, membru hotu bele foti ka empresta osan, maibé depende ba nia durasaun envolivmentu iha grupu nomós montante osan ne’ebé mak nia rai.

“Minimu liu husi fulan hat, depende ba nia buku anggota, iha buku anggota ne’e nia hatama osan USD 200.00/fulan, entaun 200 x 4 = 800, signifika ita bele fó kreditu ba nia máximu USD 800.00. Depois hatama fali ho funan 3%. Hatama depende ba nia, fulan ida hakarak hatama hira,” Xefe Suku Fahilebo esplika.

Purtantu, oras ne’e membru grupu balu foti/empresta ona osan ho montante USD 1,000.00. Osan ne’ebé sira foti maioria ba halo negósiu, balu hola motor no balu halo uma.

entretantu, membru UBSP, Maria Xavio afirma, grupu ne’e ajuda tebes nia. Lia hanesan hato’o mós husi membru UBSP Margarida Gonçal katak, “hosi grupu ida ne’e ami foti osan hodi halo ami nia uma, motór ruma at ami hadia, nomós dalabarak liu mak presiza urjente sira hanesan selu oan sira nia osan eskola,” dehan Margarida.

Membru komunidade ne’e salienta, antes sira empresta osan iha grupu ne’e presiza hato’o proposta antes ba gestor grupu, exemplu fulan oin hanesan ne’e hakarak empresta osan hodi fila liman, halo uma ka ba oan nia eskola, entaun tenke hatama ona proposta antes, nune'e fulan oin bele foti osan no simu kompleitu. Hafoin mak fulan-fulan hatama  fali komforme membru sira nia forsa. Maibé tinan ida fulan rua ka fulan hat tenke finaliza ka kompleta, hodi nune’e fó oportunidade ba membru seluk empresta fali.

Maske suku ne'e iha ona atividade ekonomiku hirak ne’e, maibe to'o oras ida ne'e komunidade Fahilebo seidauk asesu ba eletrisidade, maske tinan-tinan autoriedade suku refere levanta bebeik kestaun ne'e ba autoriedade kompetente sira. nune'e eletrisidade sai nu’udar dezafiu ba dezenvolivmentu sosio-ekonómiku iha area refere.

“Ami hakarak hato’o ba governu katak, ita nia komunidade iha ona inisiativa ba hasa’e rendimentu ekonómia hodi sustenta sira nia moris, ha'u hanesan lider komunitaria husu ba governu atu tau matan primeiru mak ahi, nune’e bele fasilita ami hodi buka moris, segundu mak oinsa bele ajuda komputador ba grupu ida ne’e hodi fasilita serbisu administrasaun ni-nian,” tenik Xefe Suku Fahilebo, Marcelino da Cruz.

Sani na’in tafara.tl sira, suku Fahilebo pertense ba postu administrativu Bazartete, munisipiu Liquiçaa ho total populasaun 1,618 no uma-kain 300. atu asesu ba suku ne’e besik liu bainhira liu-hosi postu administrativu Railaco, munisipiu Ermera, no nia distansia husi Capital Dili kuaze kilometru 30 ho durasaun tempu minutu 60.* [Martinho Moniz | TAFARA.TL | 12.02.2020].