Saturday , April 20 2019
Home / Sosial & Politika / 178 Membrus PNTL Foun Hetan Graduasaun, PM Marí: Tenke Sai Ezemplu Diak Hametin Paz no Estabilidade
178 Membrus PNTL foun hetan graduasaun. [Foto: Virginia Pereira | 22.01.2018]

178 Membrus PNTL Foun Hetan Graduasaun, PM Marí: Tenke Sai Ezemplu Diak Hametin Paz no Estabilidade

Juventude hamutuk 178, hetan graduasaun hodi sai membru Polisia Nasional Timor-Leste. Graduasaun ne’ebe halao iha loron 22/01, halao sira nia juramentu hodi kumpri ba Lei no ordem.

Comandante Centro da Formasaun da PNTL, Arquimino Ramos, liu hosi deskursu hateten katak, marka historia foun ba Centro Formasaun PNTL, tanba ohin loron ema hotu asiste seremonia graduasan no juramentu ba joven sira ne’ebe remata ona sira nia kursu formasaun ajentes ba dala lima, hodi aumenta numero efetivu, hodi garante seguransa iha rai doben ida ne’e.

Arquimo Ramos informa katak graduasaun refere ba dala 68, sura hamutuk ho graduasaun iha tempu ONU, ne’ebe hahu klase premeiru to klase 63, hosi tinan 2000 to 2006, no hahu fila fali iha tinan 2012.

“Prosesu formasaun atu muda mentalidade sidadaun sivil ba policia, presiza liu husi sistema politika formasaun kurikulum ida ne’ebe diak ho relavante situasaun no kondisaun ne’ebe Timor-Leste iha no la haluha norma sira ne’ebe aplika universal. Formasaun ba policia foun sira nivel ajente, nudar formasaun prinsipal hodi forma karakter kompetensia ajente policia, hodi servi no proteze ita nia povu ne’ebe sira sei servi ba, ne’e duni iha sistema formasaun ne’ebe adekuadu no iha kualidade, hodi hare karakter individu sai ema ne’ebe ho karakter, nudar membru policia ho filosofia policia komunitaria , maibe nia organizasaun estrutura formasaun no disiplina identiku ho militar, tuir lei organika PNTL dekretu lei 2009”, hateten Arquimo.

Iha tempu hanesan Primeiru Ministru, Dr. Marí Alkatiri hateten Joven hamutuk 178, mai husi sira nia familia rasik, mai husi sira nia komunidade rasik no mai husi nia povu rasik, agora fila fali ba sira familias, ba komunidade no ba povu, maibe wainhira sira to iha familia nia leet no povu nia leet, sira too ho misaun no ho vizaun foun, presiza familia komunidade komprende katak, sira tau ona hanesan policia.

“Sa misaun no sa visaun atu servi povo, servi estadu de direitu demokratiku, vizaun atu haburas tan instituisaun PNTL, atu dezenvolve instituisaun ida ne’e, atu sai ezemplu ba direita halo ita nia relasaun ho povu, bainhira ita hakbesik an ba povu, tenke sai ezemplu atu buka dalan atu hametin paz no estabilidade no haburas iha rai doben Timor-Leste, ne’e mak funsaun PNTL nian. Sai policia laos deit hanesan hetan servisu, servisu hanesan policia signifika atu servi povu lor-loron, atu povu bele iha konfiansa ba imi, atu povu bele tur hakmatek, hatene katak iha instituisaun ida sei tau matan ba sira,l aos iha instituisaun ida sai ameasa”, hateten Marí

Iha parte seluk, Membru PNTL foun, Agustinho Guteres hateten ba jornalista TAFARA.TL sente orgullo tanba aprende buat foun iha centro formasaun.

“Ami aprende buat barak e hanesan mos nasaun foun ida mai ami nia vida tomak, atu nune ami bele hatene kona ba oinsa mak proteze povo Timor sira husi tentasaun oioin. Defende povu, hakuak povu tomak iha rai doben Timor-Leste”, tenik Agustinho

Seremonia graduasaun ne’e hala’o iha loron 22/01, iha academia polisia Comoro, Dili Timor-Leste, hetan partisipasaun masimu hosi membrus PNTL foun, membru governu, no media tomak.*[Virginia Pereira | Editor: Zevonia Vieira | TAFARA.TL | 22.01.2018]

About Virginia Pereira

Check Also

Bankada Fretilin Sauda no Respeita PR nia Desizaun Promulga OJE 2019

Relasiona ho Prezidente da Republika, Francisco Guterres Lú Olo promulga Orsamentu Jeral Estadu [OJE] 2019, …

Leave a Reply

Your email address will not be published. Required fields are marked *