Friday , August 17 2018
Home / Opini / 20 Milloens ba Desportu, Prestasaun Dook Hosi Minimu
Ato ‘Lekinawa’ Costa, nudar Ativista RENETIL. [Foto: Dokumentu privadu | 06.08.2018]

20 Milloens ba Desportu, Prestasaun Dook Hosi Minimu

Karik publik la sente no la hatene, maibe iha tinan 10 nia laran, hahu hosi 2007 to’o oras ne’e, Estadu gasta ona 20 Milioens resin ba dezenvolvimentu desportu. Maski nune’e, publiku akompanna diak tebes dezenvolvimentu desportu hosi kedas tempu Indonesia to’o ba tempu ukun rasik an nian. Maibe dala barak liu publik hatene katak desportu ne’e relativamente refere deit ba kompetisaun. Bainhira sira haree jogu desportu ida, nasional ka internasional, mak atleta ita nian la hetan prestasaun diak, sira hahu dehan katak, ‘ne’e tanba ladun iha kompetisaun’. Karik publik nia hanoin los, kompetisaun bele hasa’e mentalidade atleta hodi hasoru ninia adversariu sira. Maibe prestasaun atleta nian la depende deit ba kompetisaun, depende mos dezenvolvimentu fiziku, tekniku, kognitivu, psikolojia, no nutrisaun atletas nian. Labele haluha, aspeitu external seluk mos kontribui ba dezenvolvimentu ateltas, liliu dezenvolvimentu sosial (saude, edukasaun, relasaun familia/ho kolegas, etc) iha ambiente ne’ebe atelta hela no treinu ba, fator ekonomia no dezenvolvimentu siensia desportu.

Ba Timor-Leste, loloos ne’e mapa atinjimentu desportu hatu’ur tiha ona, sira ne’e mak Lei Baze Desportu nian, Politika Nasional Juventude no Politika Nasional Desportu. Konsiderasaun importante liu ba dezenvolvimentu desportu mak Politika (Kebijakan) ne’ebe existi ona. Politika Nasional Desportu defini desportu nudar atividade fíziku no mental ne’ebé halo ho objetivu hodi espresa no hadi’ak liután kondisaun fíziku, dezenvolve personalidade no relasaun sosiál ka hodi atinje rezultadu iha kompetisaun sira. Politika ne’e defini mos katak desportu mak atividade kompetitivu no institusionalizadu sira ne’ebé involve ezersísiu fíziku ne’ebé rigorozu (involve mos mental) ka utilizasaun skill fíziku ho motivasaun atu hetan prazér pesoál no mos kompensasaun external. Politika Desportu ida ne’e mos temi katak desportu mak forma hotu-hotu hosi atividade fíziku ne’ebé kontribui ba saúde no aptidaun fíziku, saúde mental no interasaun sosiál.

Politika Nasional Desportu mos halo ho vizaun atu, “Sidadaun Timor-Leste Saudavel, Iha Karákter Lutadór, Ativu no Produtivu, no Iha Prestasaun.” Politika Nasional Desportu ne’e ninia hakarak dahuluk mak sidadaun saudavel, sidadaun lutador (berkarakter pejuang), Sidadaun Ativu no Produtivu, no Sidadaun mak iha Prestasaun. Politika ne’e foin establese iha tinan 2016, entaun sedu liu atu sukat ninia atinjimentu. Maski nune’e bainhira posivel, Governo bele dezenvolve stratejia dezenvolvimentu sistematizadu ida ho indikadores klaru hodi sukat atinjimentu iha tinan hirak tuir mai.

Ba oras ne’e dadaun, susar tebes atu liga dezenvolvimentu desportu ho faktus ka indikador saude nian, tanba ita labele tetu eskala atividade desportu mak kontribui tiha ona hodi hatun numeru ema moras, no numeru importasaun aimoruk mak menus. Susar mos atu sukat se atividade desportu halo ona ema iha karakter lutador, ativu iha sosiedade no produtivu liutan iha sira nia moris lor-loron. Maibe buat ida ne’ebe bele sukat mak prestasaun. Iha desportu, sasukat ba prestasaun mak ranking, no medalla. Sasukat kik balun bele inklui mak golu, pontus, akurasi ba to’o ka kona alvu, oras ka minutus hodi kompleta kompetisuan, kresimentu hosi nivel ida ba nivel seluk, valores, no sel-seluk tan. Internalmente iha fator sira hanesan ambisaun ba atinjimentu, servisu maka’as, persistente, independente, komitmentu, intellijente, and auto-kontrol mak determina susesu individual alteta nian. Externalmente iha fator seluk mak kontribui mos ba prestasaun atleta, inklui progresu dezenvolvimentu siensias, no progresu dezenvolvimetu sosial no ekonomia.

Entaun, tanba sa mak ita nia desportu seidauk hetan prestasaun ida diak ka aas, iha modalidade desportu hotu-hotu? Ita hetan ona medalla osan mutin no osan metan iha SEA Games maibe ita seidauk hetan medalla osan mean iha SEA Games? Ita seidauk hetan medalla iha jogu Asian Games, no seidauk hetan medalla iha Jogus Olimpiku. Maski nune’e, ita hetan prestasaun iha jogu sira seluk ne’ebe ninia kategoria ne’e la bo’ot hanesan SEA Games, ka jogus sira mak iha nivel hanesan ho SEA Games nian. Total medalla ne’ebe mak ita hetan iha jogu internasional sira hamutuk 55 (to’o 2016). maibe maioria laos mai hosi jogus olimpiku nian, ka mai hosi jogus sira mak ninia klasifikasaun ne’e ladun iha prestijiu aas.

Dadus survey kik ne’ebe hau halo ho kolega sira servisu iha SEJD iha tinan 2 liuba nota katak dezenvolvimentu desportu sei dook la halimar hosi vizaun politika dezenvolvimentu desportu no mos dook demais hosi vizaun dezenvolvimentu mak temi iha PEDN atu halo Timor-Leste sai nasaun ida dame no prosperu iha 2030 ho rendementu mediu-alto. Bainhira ekipa survey ne’e husu kona ba treinador ho qualifikasaun internasional (hetan formasaun hosi Federasaun Internasional no qualifikasaun nasional (sertifikadu mai hosi Federasaun Nasional sira) iha deit ema nain 151, nain 17 deit mak feto. Serifikadu ne’ebe iha sei jeral hela deit, ka treinador 1 bele hanorin aspeitu hotu-hotu hosi dezenvolvimentu atletas ida/ekipa/klube ida. Iha desportu bele bolu treinador ida hanesan ne’e naran Treinador ba Dezenvolvimentu Atleta. Treinador hanesan ne’e hanorin buat hotu-hotu hodi tulun dezenvolvimentu kareira atleta nian. Ita seidauk iha treinador ho ninia spesializasaun rasik. Purezemplu, iha modalidade volibol, alein de treinador jeral iha mos treinador spesializadu sira ne’ebe fokus prepara atleta ba kompetisaun, spesialziadu ba treina labarik ka feto, spesializadu ba service, block, spike, libero no sel-seluk tan.

Ita mos seidauk iha treinador ne’ebe hos iha spesialidade hodi prepara atleta ba tuir kompetisaun ida. Politika Nasional Desportu hatete katak, “Desportu alta kompetisaun mak desportu kompetitivu ne’ebe domina ho hakarak ida atu demonstra kbi’it fiziku, hatudu saida mak diak liu iha atletas ida nia-an, ka manan iha kompetisaun ida, nudar individual ka ekipa.” Nune’e treinamentu ba atleta sira ka atleta ida atu ba kompetisaun ne’e diferente duni ho atleta sira seluk. Treinador hanesan ne’e presija hatene kona ba nutrisaun, sistema enerjia, treinamentu fiziku, aptidaun atletas, saude no seguransa atleta, psikolojia atleta no maturidade atleta. Atu halo buat sira ne’e hotu modalidade desportu ida presija iha planu periodizasaun ba treinamentu atleta, sistema selesaun mak apropriadu, fasilidade (infraestrutura), ekipamentu, rekursu umanu (inklui treinador qualifikadu no spesializadu), sistema IT, lejislasaun no regulamentu sira, no sistema jestaun ida diak. Loloos ne’e, iha tinan 10 nia laran ho osan US$ 20 milioens resin ita tau tiha ona ba hasae ita nia kapabilidade hodi hetan prestasaun diak iha jogus internasional sira, maibe Governo seidauk halo ida ne’e.

To’o oras ne’e dadaun, ho US$ 20 miloens mak gasta ona, ita seidauk iha ema ne’ebe iha matenek spesilizadu hodi tulun dezenvolve desportu ba hetan prestasaun nian. Ita seidauk iha psikolojista desportu, mediku desportu, nutrisionista, trainador spesializadu ba atletas hodi ba tuir kompetisaun, masajista, no administrador/jestor qualifikadu. Seidauk tan ita sura fasilidade no ekipamentu sira mak iha hodi prepara atletas.

Infelizmente, iha tinan 10 nia laran, Governo gasta osan US$20 milioens resin maibe la tau konsiderasaun ba dezenvolvimentu ida mak sistematizadu no struturadu/organizadu iha level ida-idak. Dezenvolvimentu desportu ida sistematizadu no struturadu mak dezenvolvimentu desportu ida ne’ebe tau konsiderasaun ba ligasaun hosi etapa ida-idak, hahu hosi desportu baziku ka publik nian, desportu ba atletas no desportu ba halo atletas sai exelente iha sira nia modalidade. Dezenvolvimentu ho sistema no strutura ida diak tau konsiderasaun mos ba organizasaun ne’ebe organiza pratika desportu, inklui klube sira, organizasaun komunidade nian sira, asosiasaun desportu, no federasaun desportu sira. Maibe ne’e deit mos la to’o, tenke haree mos ligasaun dezenvolvimentu desportu ho dezenvolvimentu seitor privadu nian. Halo seitor privadu tulun dezenvolvimentu desportu, no halo desportu sai katalizador hodi promove kresimentu ekonomia.

Buat diak ida hosi gasta US$ 20 milioens dolar resin ne’e mak konsege lori duni situasaun hakmatek iha komunidade no kontribui duni ba situasaun seguransa ida diak iha komunidade nia let. Tanba ne’e mak osan barak liu ne’ebe aloka ba desportu gasta deit kompetisaun, inklui jogus ba loron nasional, jogu komunitaria, festival desportu, jogus fronteira, jogus federative nian, liga sira, no mos partisipasaun iha jogus regional no internasional nian. Iha duni osan mak alokadu ba dezenvolvimentu rekursu umanu, maibe laos sistematikamente planeadu atu lori Timor-Leste ba hetan prestasaun. At liutan, organizasaun atividade sei sentralizadu iha SEJD, iha Dili. Hosi SEJD mak distribui tutan rekursu mak iha ba munisipiu, bainhira iha atividade mak halao iha munisipiu. Munisipiu seidauk iha nia planu rasik ba dezenvolvimentu desportu no seidauk hetan rekursu rasik hosi governo iha nivel nasional hodi dezenvolve desportu ida sira nia munisipiu ida-idak.

Situasaun dezenvolvimentu desportu hanesan ne’e mak lao hela dadaun. Presija rekoinese katak bainhira kontinua hanesan ne’e susar tebes ba Timor-Leste atu hetan prestasaun diak iha jogus internasional sira, se prestasaun mak sai nudar fokus. Mudansa dahuluk ne’ebe presija halo mak mudansa de pensamentu kona ba dezenvolvimentu desportu. Dezenvolve desportu ba atinji saida? Ba saude diak deit ka hodi hetan prestasaun? Ba ka ba buat rua ne’e hotu? Atu hatan ba perguntas sira ne’e presija tetu ho aprosimasaun dezenvolvimentu mak iha ona ka mak ita hakarak aplika. * [ Ato ‘Lekinawa’ Costa | Ativista RENETIL, la reprezenta instituisaun mak hau servisu ba. | TAFARA.TL | 06.08.2018 ]

 

About Fernando Antonio da Costa

Fernando António da Costa, konhesidu ho Ato "Lekinawa", iha TAFARA.TL nudar General Manager & Editor, no mos hamutuk ho Metódio Caetano Moniz & Zevonia Vieira funda media online TAFARA.TL.

Check Also

Polêmika Datoluk Rua (2/3) Ho Votu Konfirmasaun Bainhira Prezidente Repúblika Veta Lei Orsamentu Jeral Estadu

Rezultadu Eleisaun Antesipada 12 Maiu 2018 Tribunal Rekursu ofisialmente proklama ona iha loron 28 Maiu …

Leave a Reply

Your email address will not be published. Required fields are marked *