Saturday , May 26 2018
Home / Sosial & Politika / 3 Maiu Loron Liberdade da Imprensa, Luta Jornalista Nian Laiha Rohan
Jornalista sira selebra loron liberdade da imprensa hodi refleta fila fali jornalista Sander Stone ne'ebe mate iha 1999 iha Becora. [Foto: copyright Media KI | 03.05.2018]

3 Maiu Loron Liberdade da Imprensa, Luta Jornalista Nian Laiha Rohan

“Sander mai ho aviaun semo ho oras 15 hodi too iha Dili, maibe tanba nia profesionalizmu, nia dedikasaun, nia mai mate iha fatin ida ne`e, ita la bele haluhan sira nia sakrifisiu”. Virgillio Guterres

Ohin loron 3 Maiu jornalista sira iha mundu tomak hakilar nafatin, hakilar la para hodi hateten sai katak respeita servisu jurnalismu nian, defende liberdade imprensa hodi hatoo informasaun ne’ebe los, hapara oho ka halakon jornalista nia vida.

Iha Timor-Leste Konselho imprensa, hamutuk ho jornalista sira hosi instituisaun media hamutuk, hodi selebra loron mundial liberdade da imprensa. Liu hosi loron liberdade imprensa, Prezidente Konselho Imprensa, Virgilio Guterres ba jornalista tomak hateten 3 de Maio ne`e loron importante ita komemora atu hanoin fila fali ita nia maluk jornalista sira ne`ebe tanba sira nia profisaun tenke mate iha kampo, mate iha terenu, “ida ne`e mak ita atu hanoin, ita hanoin hodi valoriza sira nia sakrifisiu ne`e, liu husi ita nia servisu ne`ebe profisional, entaun ita kontinua hatutan sira nia misaun hodi fahe informasaun ba Publiu”.

Liu hosi atividade long march ne’ebe organiza hosi konselho imprensa ne’ebe hahu hosi rotunda Francisco Xavier do Amaral, hodi lao to semiteriu jornalista Sander Robert Thoenes nian iha Becora. Iha fatin refere Prezidente Virgilio hatutan katak ba Timor ita hotu hamrik iha fatin ne’ebe Sander Robert Thoenes hakotu nia vida iha tinan 1999. Virgillio hateten ho Sander mai ho aviaun semo ho oras 15 hodi too iha Dili, maibe tanba nia profesionalizmu, nia dedikasaun, nia mai mate iha fatin ida ne`e, ita la bele haluhan sira nia sakrifisiu.

Iha fatin hanesan Prezidente Asosiasaun Jornalista Timor-Lorosa’e [AJTL], David Hugo liu hosi deskursu hateten katak husu ba jornalista sira katak hamutuk kontra nafatin diskriminasaun hasoru jornalista, konta agresaun fiziku, kontra intervensaun hasoru media, intervensaun politika no intervensaun oioin iha sala redasaun. Iha tempu agora kontinua kontra informasaun falsu ne’ebe konnesidu ho naran Hoax.

Hanoin hanesan mai hosi Prezidente Timor-Leste Press Union [TLPU], Francisco Simoes Belo katak husu ba jornalista sira kontinua hala`o servisu ho profisional, luta kontra diskriminasaun hasoru jornalista sira, hamutuk luta kontra dizigualidade social ne`ebe akontese ba jornalista sira, liu-liu kontra intervensaun ne`ebe la favorese ba editorial no nia independensia editorial.

“Hahu husi loron Liberdade da Imprensa ne`e, ita hotu hamutuk luta atu garante duni liberdade ida ne`e iha Timor-Leste, no liberdade ida ne`e tenke tau iha ita nia pratika, ita kontra diskriminasaun hotu hasoru jornalista Timor oan sira no jornalista iha mundu tomak”, hateten Francisco

Negosiante kiik ne’ebe loke loza iha Becora, ne’ebe nia kios tau naran Sander Robert Thones, kios ne’ebe nia distansia la dook hosi fatin mate Sander, konfesa ba jornalista sira katak konsidera jornalista sira, tanba jornalista ne’e [Sander] nia luta laiha rohan, hanesan jornalista sira tempu agora, “hau mos agradese tanba ohin loron, ita boot sira bele mai marka prezensa iha fatin ida ne`e, tanba nia hosi rai dook ida no mai mate iha Timor, tanba halao nia atividade nuudar jornalista”.

Tuir relatoriu hosi AJTL ne’ebe aprezenta iha Southeast Asean Press Alliance [SEAPA] konaba liberdade imprensa iha Timor-Leste hatudu katak maske iha liberdade imprensa ne’ebe lao diak iha nasaun Timor, maibe iha parte balun konsege lori jornalista Raymundus Oky no Xefe Redasaun Lourenco Martins ba iha tribunal tanba kazu defamasaun no fake news tuir reklamasaun hosi Dr. Rui Araujo ne’ebe hatoo keixa ba Tribunal. Jornalista hosi Business Timor ne’ebe hetan baku hosi aknum Polisia bainhira hasai atividade polisia nian iha fatin publiku, diskriminasaun entre media elektronik no print mos sei akontese iha instituisaun importante balun.*[Emanuel Andrade de Araujo | Editor: Zevonia Vieira | TAFARA.TL | 03.05.2018]

About Emanuel Andrade

Check Also

Ran Ema Ida nian, Sei Salva Ema Ida nia Vida

Importante ida ba hau, e hau bele salva hau nia an mos no mos bele …

Leave a Reply

Your email address will not be published. Required fields are marked *