Tuesday , March 26 2019
Home / Sosial & Politika / 3 Marsu, Loron Morador Oho Governador Kolonial Alfredo de Lacerda Maia
Rate iha foto ne'e deskonfia nudar rate governador Alfredo Delacerda Maia, ne'ebe mate iha loron 3 Marsu 1887

3 Marsu, Loron Morador Oho Governador Kolonial Alfredo de Lacerda Maia

“Toba iha Cemeteriu Santa Cruz, fatin nakloke no loron naroman los, Governador Alfredo de Lacerda Maia,” Navigador Alain Gerbault ho naran kompletu Alain Jacques Georges Marie Gerbault hakerek iha nia nota kona ba Governador Lacerda nia rate.

3 Marsu 1887 Governador Alfredo de Lacerda Maia asasinadu iha Dili. Ema hirak ne’ebe oho governador ne’e mak membru hosi forsa irregular Portuguese nian ka bolu naran Moradores. Razaun oho Governador ne’e tanba injustisa sira mak governo colonial halo, liu hosi ninia ajente sira.

Istoria oho Governador ne’e iha versaun rua, maibe versaun rua ne’e hotu liga ho injustisa mak Governo kolonial halo iha Timor-Leste. Versaun ida relasiona ho hahalok Governador Lacerda nian rasik ba morador sira mak hasan iha andor tun hosi Palacio Nobre, Lahane, ba Palacio Governo, no mos hasan nia fila hikas ba Palacio.

Tuir istoria mak konta hosi Domingos Pinto de Araujo Moniz (Atai), Subrino hosi Morador ida hosi Moradores seluk mak hasan Governador, Manuel Augusto, katak morador sira oho Governador Lacerda iha besik Gedung Kebudayaan Indonesia agora dadaun ne’e.

Atai konta dehan, dadersan morador nain 8 tenke ba hasan ona Governador tun hosi Palacio Nobre mai Dili hodi servisu. Tuku 2 lokraik, sira tenke hasan lori fila Governador ba Palacio. Bainhira hasan tun mai Dili no fila ba Lahane, sempre para dala 4. Parajen dahuluk mak besik ba Kantor Pos (Koreu) nian, besik tanki bee iha Lahane. Parajen tuir fali iha kurva fahe malu Lahane no ba Taibesi nian (agora dadaun Rotunda Lahane). Parajen datoluk iha kruzamentu Polisia Militar (tempu Indonesia nian). Parajen ikus mak Merkado Tuan (agora CCD) nian.

Iha loron 3 fulan Marsu 1887, moradores lori tiha Governador ba servisu fatin. Buat hotu lao diak hanesan babain. Maibe iha tempu ne’e Governador sai servisu tarde, liu tiha oras rua nune’e. Morador sira komesa hamlaha ona. Sira hasan Governador iha andor leten ho Palacio ba to’o Merkado Tuan nian. Governador hirus tanba sira para kleur liu. Entaun Governador komesa trata sira ho liafuan ladiak. Iha momentu ne’e kedas, morador sira oho Governador Lacerda, bainhira hakat liu uituan deit hosi fatin parajen.

Oho tiha Governador, morador sira halai fahe malu ba subar. Sira tauk karik Governo Kolonial sei buka tuir sira, Manuel Augusto, nudar morador ida mak involve iha oho Governador ne’e halai ba foho, ba Kaimauk, fatin ida besik ba Lequidoe ho Remexio. Manuel Augusto halai hamutuk ho ninia kolega nain 2 hosi Alas, Manufahe. Hosi morador nain 8 ne’e, nain 4 konsege entrega an fali, ida mak naran Kapitaun Leandro.

Hosi foho Kaimauk, Manuel Augusto tuir nia maluk sira basar iha Manatuto. Iha Manatuto nia ajuda peskador sira dada rede. Ema bolu nia ajuda tanba haree ba nia fiziku diak. Nune’e Manuel mos koinese malu ho ema Lira mak fan minarai iha Manatuto. Hosi koinese malu ne’e mak Manuel halai tutan ba Lira, depois ba liu Alor.

Tuir informasaun hosi Atai, Manuel Augusto ninia kaben konsege mai Dili hodi buka tuir ninia kaben nia familia sira no hetan malu duni ho Felix Moniz, Atai nia aman, iha 1994.

Feliz Moniz nia aman Antonio Moniz mak Liurai Suku Santa Cruz iha tempu ne’eba. Antonio Moniz mak haruka Manuel Augusto ba sai morador hodi hasan Governador Lacerda. Razaun haruka Manuel Augusto tanba Manuel Augusto nia isin diak no nia mos mak ema ida nakar ka koalia la rona. Bainhira rona katak Manuel Augusto ho morador sira seluk oho Governador Lacerda, Liurai Santa Cruz, Antonio Moniz, haruka atu kaer Manuel Augusto hodi ba entrega ba Governo, maibe Manuel Augusto konsege halai liu.

Istoria hirak ne’e Atai rona tutan hosi nia aman Felix Moniz, primo hosi Manuel Augusto. Istoria konta ba sira bainhira Manuel Augusto nia kaben hetan malu ho Felix Moniz.

Versaun istoria ida seluk relasiona ho oho Governador Lacerda mak diskontentamentu Moradores sira nian relasiona ho abuzu de poder no hahalok la respeitu mak hatudu hosi Sekretariu Governador nian. Moradores sira halibur malu iha loron ne’eba iha parte Loromonu hosi ukun Liurai Motael nian. Liurai Motael ikus mai hetan akuzasaun no haruka ba rai seluk tanba diskonfia fo apoio ba oho Governador Lacerda.

Hosi istoria Amo Teixeira nian, iha ninia nota importante kona ba Macau e a Diocese de Timor (1974) hakerek istoria mak konta hosi Hermengildo Martins, oan hosi Liurai Ermera, kona ba Ana Eduarda, oan la lejitimu hosi Komandante Portuguese Duarte Leao Cabreira, ema ne’ebe hapara revolta sira mak akontese iha Timor, iha tinan 1960 nian.

Sekretariu Governador, Fransisco Ferreira mak sai nudar Komandante ba kapital Dili nian, ka nudar Walikota. Komandante Ferreira husu atu halo Dili sai furak, ema hotu labele husik fahi lao ba mai iha Dili laran. Ana Eduarda, la hatene kona ba regulamentu ida ne’e ka nia hanoin tanba nia mak parseira Komandante nian entaun nia bele hetan exempsaun ida ne’e, ka nia bele husik nia fahi lao ba mai iha Dili laran. Milisia sira, halo tuir orden Komandante nian, oho fahi sira ne’ebe husik deit, inklui fahi hosi Ana Eduarda nian. Bainhira Komandante fila mai uma hosi residensia Governador nian, Ana hato’o ba nia kona ba saida mak akontese. Komandante ne’e bolu kedas milisia sira no trata at los sira, no hatete ba milisia sira katak bandu ida ne’e la inklui Ana Eduarda nia fahi. Sira hakruk no hatan katak sira halo tuir orden ne’ebe Komandante ne’e fo.

 Komandante trata sira ho liafuan asu. Bainhira Komandante fila tiha, milisia sira enkontru iha sira nia fatin no sira koalia kedas kona ba atu likida ka oho Komandante ne’e. Komandante ne’e rona tiha planu milisia sira nian katak sira atu halo ataka ba nia iha loron 3 fulan Marsu. Iha loron ne’e, Komandante halo finji moras tiha, no nia la ba residensia Governador nian. Governador, ema ida ne’ebe la hatene buat ida, tun hosi Palacio Nobre atu mai Dili. Iha postu milisia nian, iha tanki bee Balide nian agora ne’e, Governador haree ema barak mak halo ataka ba nia ho katana.

 Hakfodak ho ataka ne’e, Governador kontinua nafatin tun mai Dili, to’o iha kraik uituan, Governador hetan tan ataka ida, hodi oho nia iha kompania Lai Juman nia oin.

 Iha surat ida hosi Liurai Motael ne’ebe husik hela ninia testimonia, hodi hatete katak nia inosente no koalia sai buat barak kona ba abuzu colonial nian. Karta ne’e hetan iha Arquivo Histórico Ultramarino.

 Sekretariu ne’ebe mos nudar Komandante Dili nian halo abuzu de poder makas hasoru Liurai Timor mak influensiadu liu, inklui ba Liurai Lucas Barreto, Liurai Motael, ne’ebe hakerek katak:

Iha 23 Fevereiru, Liurai Luis ba Governador nia servisu fatin, hodi husu ba Komandante Fransisco Ferreira atu fo liberdade ba ema Arabi nain rua mak hetan kastigu semana rua ona. Liurai Luis too iha ne’eba no Komandante Ferreira husu nia tur no husu kedas dehan Liura hakarak saida? Liurai Luis hatan dehan katak nia husu atu liberta ema Arabi nain rua mak kastigu iha Posto Sica. Komandante ne’e la hatan ba Liurai ne’e maibe husu fali se Liurai ne’e mak Liurai ba ema Arabi sira ne’e. Liurai Luis hatan dehan nia laos Liurai ba ema Arabi sira ne’e maibe Liurai Motael. Arabi sira mak mai hela iha Dili sai nudar sujeitu ba Motael tuir kustumi tuan nian. Komandante ne’e hatan dehan, “keta hanoin katak o Liurai be hau labele kastigu ita kanga, hau hatama ona liurai barak ba kastigu fatin kanga ne’e, keta hanoin o tau gravata be’e o la serve tama ba kanga laran”?

Komandante Moradores nian, José da Cunha, mos halo alegasaun hasoru Governador nia hahalok ladiak sira, inklui halo violensia no halo moe Timor-oan. Iha karta ida ne’ebe José da Cunha hakerek, arkivo hela iha Arquivo Histórico Ultramarino konta tuir katak, “Hau iha tan akuzasaun hasoru Governador. Governador husu milisia sira, nain 8, truka malu ho servisu espesifiku hodi lori Governador tun sae no halo sira hanesan kuda. Bainhira Governador dehan halai kuda halai, milisia tenke halai. Se halai Governador baku ho sikote. Hau mos hakarak hatete sai katak milisia sira mos ba hili ai no kuru bee ba Governador nia dapur. Governador mos haruka milisia sira lori feto ba Palacio, se sira la lori sei hetan baku ho sikote.”

José da Cunha mos hato keixa hasoru Sekretariu Ferreira maibe maibe Governador la halo asaun ruma. Nia halo protesta hasoru Governador kona ba kazu baku milisia sira maibe José da Cunha hetan demisaun. Depois nia ba halo protesta hamutuk ho Komandante milisia sira seluk maibe Governador hatan hodi hatun sira.

Governador husu ba José da Cunha karik nia hakarak buat ruma. José da Cunha hatan ba Governador katak nia mai halo petisaun hosi husu justisa tanba Governador baku ona milisia ida. Governador hatan kedas dehan, “O (José da Cunha) lori milisia sira mai iha ne’e (Palacio Nobre) hodi halo tauk hau?”. Governador hatan, “Haree, imi sai hosi ne’e, sai kedas”. Governador tama fali ba Palacio laran la hatete tan buat ida ona.

Maibe tuir Liurai Luis Barreto nia istoria katak nia mos ba hotu iha tempu José da Cunha halo protesta. Iha tempu ne’eba Governador hatete dehan, “Senhor Cunha, hau laos o nia labarik, ne’e mak o lori forsa mai atu halo tauk hau. Hau hatete ona ba o horiseik, hau fo justisa bainhira hau hakarak fo. Imi sai kedas hosi ne’e.”

Diskonfia mos katak prezensa milisia hosi Maubara iha Dili fo influensia ba eventu oho Governador Lacerda. Maubara kleur tiha moris iha Olanda nia ukun, no sira halo rebeliaun hasoru Portugal dala barak. Sira iha Dili tanba atu prepara ba seremonia ida hodi halo submisaun ba Portugal.

Tuir José da Cunha, liu tiha oras ida, nia fila mai Dili, rona fali katak Governador mate tiha ona. Violensia hasoru Governador halo hosi ema sira ne’ebe lakon ona respeitu ba Governo Kolonial.

Livro istoria The Portuguese Colonisation of Timor: Final Stage, 1850 – 1912, hatete, hanoin katak eventu oho Governador atu halo panik no atu hamosu revolta barak liutan iha Dili, maibe ne’e la akontese. Maski nune’e morador sira kontinua sai servente diak nafatin ba governo Portugal. Maibe istoria ne’e mos hatete katak, hafoin akontesementu oho governador, protesta hasoru governo colonial buras ba bebeik.

Governador Alfredo de Lacerda Maia ukun Timor hosi loron 26 fulan Setembru 1885 – no mate iha loron 3 fulan Marsu 1887. Manuel Ferreira, antropologu Portuguese ida hatete katak Governador Alfredo de Lacerda Maia nudar “Um Governador Ignorado”. * [Ato ‘Lekinawa’ Costa | TAFARA.TL | 02.03.2019 ]

Referensia:

Janet Panda (https://raiketak.wordpress.com/2008/02/18/assassination-1887-part-1)

  1. Paulino http://www.historyanthropologytimor.org/ Dictionary of Biographies

About Fernando Antonio da Costa

Fernando António da Costa, konhesidu ho Ato "Lekinawa", iha TAFARA.TL nudar General Manager & Editor, no mos hamutuk ho Metódio Caetano Moniz & Zevonia Vieira funda media online TAFARA.TL.

Check Also

Kursu Promosaun Ofisial Inspetor PNTL, FM: Sei Hamosu Deskonte Barak

Ministeriu Interior hasai Diploma Ministerial N.o 35/2018 de 29 de Novembro hodi halo promosaun ba …

Leave a Reply

Your email address will not be published. Required fields are marked *