Tuesday , March 26 2019
Home / Sosial & Politika / 7 de Dezembru, Lú Olo: Memoria Kolektiva Mak Sei Hametin Ita Nudar Povu No Nasaun
Prezidente da Republika, Dr. Francisco Guterres Lú Olo hatoo deskursu iha enkontru annual FONGTIL iha Salao Paraquial São José. [Foto: Media PR | 19.11.2018]

7 de Dezembru, Lú Olo: Memoria Kolektiva Mak Sei Hametin Ita Nudar Povu No Nasaun

Tinan 43 povu Timor komemora loron invasaun ne’ebe ne’ebe iha tempu ne’eba military Indonesia iha loron 7 Dezembru 1975 invade Timor ho ro ahi funu Indonezia nian tiru morteur no kainaun durante oras ida nia laran, liu tiha ida ne’e forsa parakedista Indonezia nian semo tuun mai Dili nia klaran no forsa marineiru Indonezia nian mos sadere ona no tuun iha Kamping Alor [Dom Aleixo, Dili].

Liu hosu loron komemorasaun ne’ebe organiza hosi Centro Nasional Chega! iha Portu Dili [Pelabuhan. Red] , Prezidente da Republika, Dr. Francisco Guterres Lú Olo nian deskursu ne’ebe hatoo liu hosi Xefe Casa Sivil Francisco Maria de Vasconselos hatoo katak Prezidente da Republika husu ba idak-idak no ba hotu-hotu atu hanoin klean ba loron 7 Dezembru ne’ebe konsagra ona iha Lei nudar loron memoria.

“Lia fuan memoria iha relasaun ho ita nia kakutak. Ita nia kakutak iha kbiit atu rai metin hanoin, hahalok no akontesimentu ne’ebe deit, iha tempu badak no naruk. Nudar ema, ita idak-idak iha kbiit natural atu hanoin ba kotuk no haree ba oin, ho matenek ba ita nia future. Ita bele hanoin hetan, iha ne’ebe deit, iha momentu ne’ebe deit. Hanoin hetan sira ne’e hotu, halo parte ita idak-idak nia memoria”, informa Xefe Casa Sivil 7/12

Prezidente Lú Olo hatutan liutan katak jerasaun ohin loron mak bele hatutan memoria pasadu nian ba jerasaun aban bainrua nian. Ida ne’e signifika katak jerasaun ohin loron mak sai ponte entre jerasaun hori uluk no jerasaun aban bainrua.

Tuir Lú Olo katak jerasaun ohin loron tenke hatene harii ponte diak atu liga pasadu ho future. Ligasaun metin ne’e mak kaer metin ita, nudar povu no nasaun ho identidade ida ne’ebe mundu rekonnese nudar uniku, katak ita la hanesan ho povu no nasaun sira seluk

“Importante tebes hamoris nafatin iha ita nia memoria konba ita nia eroi sira hosi luta libertasaun nasional. Rihun ba rihun fo sira nia an tomak too mate. Sira sakrifika sira nia moris diak no sakrifika sira nia familia, hodi luta atu hetan povu toma nia mehi no hakarak, Estadu Timor-Leste iha dever haburas nafatin ita idak-idak nia memoria no memoria kolektiva liu hosi atividade oin-oin”, tenik Lú Olo

Prezidente Lú Olo hateten katak estadu Timor tenke fo onra nafatin ba eroi sira liu hosi komemorasaun data istoriku sira, harii monument ka sinal ruma ne’ebe fo hanoin bebeik ba idak-idak no ba ema hotu konaba istoria brane

Memoria kolektiva ne’e mak sei hametin ita nudar povu no nasaun”, hateten Lú Olo

Total populasaun capital Dili iha 1975 hamutuk rihun 28.000 bainhira akontese invazaun Forsa Armada Falintil, unidade balun nafatin iha Dili hodi satan invazaun, lidernasa Fretilin no populasaun sivil balun komesa evakua ona ba Aileu. Populasaun sivil barak mos lakohi evakua ba Aileu, situasaun ne’e hamate populasaun barak durante loron tolu invazaun iha Dili. * [ Zevonia Vieira | TAFARA.TL | 07.12.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Prezidente da Republika Promulga OJE 2019

Prezidente da Repúblika, Dr. Francisco Guterres Lú Olo, ohin, promulga Lei N. 5/V-Orsamentu Jerál Estadu …

Leave a Reply

Your email address will not be published. Required fields are marked *