Saturday , November 17 2018
Home / Eleisaun Parlamentar / Aban Enkontru Determinante Entre FRETILIN Ho PLP
[Foto Edit: Zinho MD | TAFARA.TL | 09.08.2017].

Aban Enkontru Determinante Entre FRETILIN Ho PLP

Aban loron determinante ba partidu mais votadu Fretilin hodi hasoru malu ho PLP, buka solusaun hamosu koligasaun ba governasaun tinan 5 tuir mai. Karik PLP sei aseita ho konviti koligasaun hodi ukun hamutuk. karik lae?

Ho situasan ida ne’e, TAFARA.TL koko akumula opiniaun hosi observador no sidadaun sira, atu fo sira nia hanoin kona ba situasaun politika liu hosi negosiasaun ne’ebe partidu Fretilin halo dadaun.

Prezidente Conselho Imprensa (CI), Virgilio da Silva Guterres ba TAFARA.TL hateten katak, konkorda ho hanoin balun katak CNRT nia pozisaun klaru ona, mesmu enkontru ne’ebe mak Fretilin halo ona ho CNRT, ne’e hanesan aspetu poltiika hosi Fretilin nian katak hakarak respeita CNRT hanesan partidu segundu lugar mais votadus.

“Enkontru save hau hanoin aban ho partidu sira seluk ba PD, PLP ho Khunto tanba bele dehan sira nia pozisaun mak savi atu kontribui ba formasaun governu foun. Hau nia esperansa katak, molok aban atu enkontru ne’e, komunikasaun informal sira lao tiha ona, entre lider sira hosi partidu mais votadu, entre Fretilin ho lideransa partidu nain tolu ne’e lao ona. Hosi deklarasaun publiku hatudu katak,  partidu tolu ne’e hatene sira nia an, katak la priense kondisaun sira ne’e atu kaer governu, maibe sira mos nakloke ba aprosimasaun ne’ebe mai hosi partidu mais votadu. Hein katak aban Fretilin bele hetan votus de konfiansa ruma hosi partidu tolu hodi forma governu”, hateten Prezidente CI.

Prezidente CI hatutan liutan katak, preokupasaun hosi Sekretariu Jeral Partidu Fretilin, Dr. Mari Alkatiri ,kona ba figura Xanana nian, ida ne’e laos Dr.Mari deit maibe ema hotu preokupa, tanba nia (Xanana,red) mesak deit mos sai hanesan konsiderasaun ba kualker dezenvolvimentu politika iha Timor, tanba ne’e mak Fretilin buka nafatin meus atu aprosima Xanana, atu koalia kona ba garantia estabilidade governativa. Povu hotu hein aban bele rona informasaun ne’ebe enkoraja publiku atu bele iha governu ne’ebe forte.

Iha parte sorin ativista feto, Yasinta Lusina ba TAFARA.TL via telephone ho esperansa boot hato’o katak, forma governu foun klaru, katak partidu hetan votus maioria halo koligasaun ho partidu nebe deit, kualker partidu nebe deit atu forma governu ho Fretilin.  Hanesan servisu ba asumtu feto no igualdade, importante asegura nafatin asumtu nebe mak durante ema hotu hakarak halao, hodi hetan objetivu igualdade generu no sustentavel iha ita nian servisu ida ne’e.

“Hau rekomenda ba seitor baziku hanesan asumtu edukasaun, ekonomia, saude hodi haforsa feto no labarik sira nian moris hosi mukit”, Yasinta ho hatete ho esperansa boot.

Yasinta Lusina hatutan katak, partidu idak-idak mai ho sira nian politiak rasik,  sira tenke tau interese nasaun as liu. Aban partidu Fretilin hasoru malu ho PLP,  sira bele hatudu sira nian maturidade politika nebe diak hodi hatudu ba povu.

Ativista Pedro Vieira, mos expresa nia komentariu kona ba enkontru entre Fretilin ho PLP ne’ebe sei akontese aban. Tuir Pedro Vieira nia komentariu katak, durante Fretilin ho CNRT kaer governu, reazen makas liu mak hosi PLP, sempre halo kritiku makaas ba partidu rua ne’e, tanba entermus ba projetu dezenvolvimentu, prozemplu ZEESM nian, maibe derepente  Fretilin halo negosiasaun ho PLP atu iha posibilidade hodi halo koligasuan ida ne’e intersante boot.

“Sekarik PLP mak hamutuk ho Fretilin harii governu foun ne’e interasante boot ida,  maibe hau nia perguntas katak iha tempu pasadu kritika sira ne’ebe PLP halo ne’e kontinua koalia ka lae, se la lao nafatin hanesan uluk, entaun hau mos duvida oituan ba partidu PLP, tanba hau tauk hetan tiha kargu dala ruma idealismu ne’e bele lakon, maibe hau espera katak idealismu PLP ne’e labele lakon”, hateten Pedro Vieira ba TAFARA.TL iha loron 9/08, iha Café Natureza.

Pedro Vieira mos esklarese katak, se partidu rua ne’e hamutuk duni, laos situasaun foun ida ba Timor, tanba iha pasadu CNRT no Fretilin kontra malu, maibe ikus sira hamutuk hodi harii governu fali.

Aban mak sai sasukat ba partidu Fretilin hodi determina governasaun foun ne’e atu lao oinsa. Povu sira, hanesan votanes, ne’ebe mak fo ona sira nian votus ba partidu sira ne’ebe hetan asentu parlamentar, sei toba la dukur, tanba hakarak hatene desizaun hosi lideransa partidu sira atu bele determina votantes sira nian mehi. Ita hein.* [Zevonia Veira, Ato ‘Lekinawa’ Costa | TAFARA.TL | 09.08.2017].

 

About Equipa Tafara

Artigu ida ne'e kobertura no hakerek konjunta/hamutuk entre Jornalistas no/ka kontribuidor TAFARA.TL.

Check Also

Lú Olo: Juventude La Hakarak Promesas no Hakribi Atitude Koruptu

Hau fiar katak joven sira iha talentu atu hamosu no habelar idea foun no tau …

Leave a Reply

Your email address will not be published. Required fields are marked *