Wednesday , June 19 2019
Home / Sosial & Politika / ACbit: Organiza Sorumutu Hodi Hametin Komitmentu Luta ba Dereitu Vitima no Sobrevivente
ACbit halo sorumutu kona ba situasuan feto vitima no sobrevivente sira hosi konflitu 1974-2017. [Foto: Ato 'Lekinawa' Costa | 20.12.2017}

ACbit: Organiza Sorumutu Hodi Hametin Komitmentu Luta ba Dereitu Vitima no Sobrevivente

Asuntu vitima no sobrevivente seidauk hetan atensaun seriu hosi estadu parte rua, Indonesia ho Timor-Leste. Estadu rua fasil liu koalia kona ba fronteira tereste, dezenvolvimenu infraestrutura duke asuntu vitima no sobrevivente. Sorumutu ne’ebe Acbit halo hodi kontinua hametin komitmentu luta ba dereitu vitima no sobrevivente nian.

ACbit organiza sorumutu hodi koalia kona ba situasaun vitima no sobrevivente hosi konflitu 1974 – 1999, iha Hotel JL Vila, ohin (20/12). Diretora Acbit, Manuela Leong iha ninia lia makloke ba sorumutu ne’e hatete katak, “Acbit hili halo sorumutu iha tinan ikus 2017 nian hodi halo reflesaun tinan naruk servisu Acbit nian ne’ebe hahu kedas hosi 2009. Iha sorumutu ida ne’e, sei lori Membru Parlementu nia reprezentante, reprezentante governo no Centro Chega! atu koalia kona ba situasaun vitima nian. Diretora ne’e mos hatete katak, tinan ba tinan atensaun ba asuntu vitima menus bebeik. Enkontru ne’e mos atu hametin hikas komitmentu hodi luta ba asuntu dereitu vitima no sobrevivente nian”.

Iha parte seluk, Provedor Dereitus Humanus no Justisa (PDHJ), Silveiro Baptista, hatete katak asuntu vitima no sobrevivente ne’e asuntu ida ne’ebe seidauk hetan atensaun seriu hosi parte estadu rua, Indonesia no Timor-Leste. Silveiro mos akresenta katak, “Asumtu vitima laos prezente ne’ebe estadu tau iha bandeza fo ba ita. Ita luta mak hetan. Tan ne’e tenki luta, koalia nafatin, tenki hahu hosi ita, hodi koalia bebeik asuntu ne’e.”

Provedor ne’e mos hatete katak iha dezafiu bot iha luta ba vitima no sobrevivente nia dereitu. Asuntu seluk ne’e fasil, hanesan fronteira entre estadu rua, no merkadu iha fronteira. Maibe asuntu vitima no sobrevivente, liga ho ema lakon, tanba seidauk hetan konkordansia hosi parte Indonesia no Timor-Leste.

Koordenador Sosiedade Civil, Joaquim Freitas, iha ninia lian ne’ebe hato’o hodi loke sorumutu ne’e hato’o katak fasil atu koalia ba infraestrutura ka asuntu dezenvolvimentu nian. Maibe susar ba bo’ot sira atu koalia kona ba asuntu vitima no sobrevivente. Nia expresa ninia haksolok ho servisu Acbit nian, no husu atu kontinua halo servisu diak ne’e ba oin.

Husi dadus data baze ACbit to’o tinan 2017, rekolha ona 482 kompostu husi feto 427 no mane 55. Husi tipu violensia ne’ebe vítima no sobrevivente sira hetan iha tempu pasadu, iha tipu violasaun tortura 129, violasaun seksual 136, Atan seksual 39 no kaben obrigatoriu 25. Husi dadus iha leten, husi feto maluk hamutuk 221 mak ACbit halo peskiza klean iha tinan 2013-2016, no deskobre katak maioria husi feto maluk sira ne’e, sei moris iha mukit, hetan moras akut tanba esperiensia hetan tortura; problema saude reprodutivu ne’ebe la halo tratamentu antes, idade aumenta tan, lakon suporta husi familia, lakon rai no riku soi, afeta ba sira nian moris diak no saude mental no kapasidade atu buka moris ba sira nian nesesidade, inklui mos lakon kapasidade atu servisu tanba aleija fizikamente ka hetan marginalizasaun sosial.

Ministeriu solidariedade sosial atu fo apoiu orsamentu ba ACbit hodi tau matan ba vitíma no sobrevivente husi konflitu pasadu desde tinan 2010 to’o agora, ne’ebe bele ajuda vitíma no sobrevivente hamutuk 178 ne’ebe kompostu husi asesu ba tratamentu saude (43), apoiu ekonomia (84), hadia ka hari uma (31) no sira seluk (24). Maski nune’e vitima no sobrevivente barak mak seidauk hetan apoio hosi estadu no sira nia kondisaun sei mukit nafatin.*[Ato ‘Lekinawa’ Costa | TAFARA.TL | 20.12.2017]

 

About Fernando Antonio da Costa

Fernando António da Costa, konhesidu ho Ato "Lekinawa", iha TAFARA.TL nudar General Manager & Editor, no mos hamutuk ho Metódio Caetano Moniz & Zevonia Vieira funda media online TAFARA.TL.

Check Also

PR Apresia Servisu Jornalista nian Hosi 1975-1999: Barak Mate, hakarak Garante Direitu Povu TL Ba Autodeterminasaun

“Ho sira nia barani, determinasaun no kompromisu, sira fo sai informasaun ne’ebe real no atual …

Leave a Reply

Your email address will not be published. Required fields are marked *