Agustina: Kampus UNTL Hetan Tiru Hosi Polisia, Bainhira Iha Prosesu Aprendizajen

Estudante ne’ebe involve iha Movimentu hodi halao manifestasaun kontra membru Parlamentu Nasional sira, liga ho problema lelaun kareta Prado, hamosu konfrotasaun entre polisia ho manifestante sira tanba hetan tiru gas lakrimojeniko (gas air mata, red).

Prezidente Movimentu Estudante Juventude Universiade Timor-Leste, Sebastiao da Costa ba jornalista sira katak problema lelaun kareta nudar problema nasional, tanba durante kamapaña sira tun sae foho hodi bosok ferik katuas sira, hodi fo esperansa konfiansa ba  sira  hodi ba tur iha Uma fukun Parlamentu nasional, to ikus  sira hasai resolusaun hodi lelaun kareta  ne’ebe ho folin 60 ribu maibe lelaun ho deit 8 Ribu, ho ida ne’e Hhnesan jerasaun patriota ida ne’e ami la simu.

Sebastiao afirma katak, ohin ami mai lori bikan, kanuru, tasu mai iha manifestasaun ne’e, tanba konstituisaun RDTL ho nia  konseitu dehan mai husi ba povu, ba povu no fila fali ba povu.

Estudante UNTL fakuldade Edukasaun, Agustina Martina hateten iha  manifestasaun ida ne’e, kampus UNTL hetan tiru hosi polisia, bainhira estudante sira halo hela prosesu aprendizajen.

“Ami nia kampus hetan tiru husi policia sira, hodi halo ami nia prosesu aprendizazen la la’o, tanba policia sira tiru gas air mata, tama ba ami nia aula hodi rezulta kolega balun ba baisa iha ospital”, dehan Agustina

Estudante ne’e husu ba orgaun komponente sira, atu koko resolve, hodi nune’e bele hapara ona manifestasaun ida ne’e, tanba estudante barak mak trauma rona kilat lian, “ami sente triste hanesan joven husu ba nai ulun sira tenki responde lalais ba ida ne’e tanba ida ne’e bele impaktu ba situasau rai laran:.

Manifestante Estudante UNDIL, Abilo Ximes Belo ne’ebe mak sai vitima liu hosi demonstrasaun refere ne’ebé hetan baku husi Policia sira, sente triste tebes tanba, nu’udar estudante lori aspirasaun povu nian no lori joventude Timor-Leste.

“ami hakilar hafoin ami muda espasu ba oin besik ba parlamentu nasional derepente policia baku hau, hau mai laos interese privadu hau mai ne’e hakilar hodi hato interese komun ba ema hotu no povu nia di’ak” dehan Estudante Abilio

Tuir objerbasaun jornalista Tafara.TL hatudu katak liu hosi manifestasaun ne’e, resulta katak barak Policia sira tiru ho gas lakrimojeniko (gas air mata, red)  no estudante balun trauma no lori ba ospital,liu-liu estudante feto sira, bainhira prosesu aprendizazen la la’o. * [Virginha Pereira|  TAFARA.TL | Editor: Zevonia Vieira | 21.08.2017].

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.