AJTL Hamutuk ho Jornalista Timoroan Relembra Akontesimentu BALIBÓ FIVE

Asosiasaun Jornalista Timor-Leste (AJTL) ho jornalista Timoroan hanoin hikas akontesimentu BALIBÓ FIVE ne’ebé mak rezulta jornalista Australianu nain lima mate.

Tinan 42 liu-bá jornalista Australianu nain lima ne’ebé kompostu husi Malcolm Rennie (29), Gary Cunning (28), Greg Shackleton (28), Brian Peters (29), Tony Stewart (21) ne’ebé mai hala’o misaun jornalizmu nian hodi halo kobertura ba akontesimentu 1975 iha Balibó.

Infelizmente jornalista nain lima ne’e labele hala’o misaun to’o remata tanba hetan ataque husi militar Indónezia no hakotu kedas I’is iha loron 16/10/1975, hafoin jornalista nain lima ne’e hetan tiru husi military Indónezia, no sira kontinua sunu kedas mate isin hamutuk dokumentasaun jornalista nian, haktuir filme Balibo 5.

Objetivu hosi atividade refere katak hanoin hika fali maluk jornalista Australianu ne’ebe mak fo ona kontribuisaun ba harii estadu ida ne’e. Iha eventu ida ne’e Prezidente AJTL, David Hugo esplika katak  hanoin hika jornalista nain lima nia mate, tanba fo sai informasaun ba rai liu. Ema hotu hatene katak Timor mos nu’udar nasaun ida ne’ebé mak hakarak indenpendente iha tempu ne’eba.

“Sira mate ba rai ida ne’e duni, no sira nia maluk jornalista nain ida ne’ebé mak mai tuir fali hodi buka sira nain lima, maibé to’o ikus nia mós mate hotu iha Portu Dili, 7 Dezembru 1975,” hateten David.

Iha sorin seluk, marka mós prezensa husi Secretario Estado Conselho Ministro da Comunicação Social, Matias Boavida, iha atividade refere. Matias afirma katak hamutuk ho AJTL halo asaun solidariedade ba maluk jornalista nain lima ne’ebé mak mate ona.

“Situasaun sira ne’ebé memoriavel, AJTL sei iha laran kma’an ida atu bele komemora maun alin sira nain lima mai husi Australia. Isto é signifika katak solidariedade entre jornalistas la’os ita iha rai laran de’it, maibé ita mós iha solidaria ba maluk sira ne’ebé iha rai liur tanba misaun ne’ebé ita halo,” afirma Matias iha kalan reflesaun ne’ebé halo iha Balibó, 21/10

Nia salienta liu tan katak jornalista nia misaun de facto importante ba nasaun ida mak hala’o sira nia kna’ar iha roda ida demokrasia. It abele ko’alia buat barak demokrasia maibé kna’ar jornalista wainhira ita haklo’ot sira nia lala’ok ikus mai demokrasia mós la halo buat ida.

Jornalista Timor Post, Cesaltina Ximenes ne’ebé mak partisipa iha atividade ne’e mós hatoo nia sentimentu katak liu husi atividade ne’e bele aumenta tan mentalidade nu’udar jornalista nian no bele sai jornalista ne’ebé ativu no kualidade liu tan.

Relasiona ho asaun solidaridade ne’ebé mak AJTL no Jornalista Timoroan halo ba jornalista Autralianu nain lima, Cesaltina Ximenes afirma katak hanesan jornalista Timor oan iha obrigasaun duni atu hala’o asaun sira hanesan ne’e, tenki hamoris  espiritu voluntarismu oinsá mak bele la’o no hakat tuir dalan ne’ebé mak jornalista nain lima halo ba mundu, liu-liu ba nasaun ida ne’e rasik.

Komemorasaun kada tinan jornalista Timoroan sempre halo, iha tinan ida ne’e, AJTL hamutuk ho jornalita Timor oan sira vizita jornalista nia mate fatin (Museum), fatin ne’ebé jornalista Australianu nain lima halo dokumentasaun (Hotel Balibó) no halo mós asaun solidaridade ba familia ida  ne’ebé kbi’it la’ek, iha aldei Fatuk Laran.

Atividade ida ne’e tuir lolos selebra iha 16/10 maibé tanba monu iha loron serbisu nune’e muda fali ba 21-22/10. Atividade ne’e mós partisipa husi media oi-oin iha Timor-Leste mak hanesan, RTTL ep, Timor Post, Matadalan, Investigativu, Timor Roman, Tafara.Tl, RTM, Rebenta Group no media seluk ne’ebé mak la mensiona ida-idak.* [Maria do Ceu |TAFARA.TL| Editor: Zevonia Vieira | 21.10.2017].

 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.