Saturday , April 20 2019
Home / Sosial & Politika / AJTL Ho Komunidade Holanda Iha Timor Sunu Lilin Ba Jornalista Sander Thoenes
Monumentu Jornalista Holandez, Sander Thoenes iha Becora, Dili. [Foto: Brishen | 21.09.2017].

AJTL Ho Komunidade Holanda Iha Timor Sunu Lilin Ba Jornalista Sander Thoenes

Sander Robert Thoenes moris iha Ensched, Helanda loron 7 Novembro 1968, oan ikun husi maun alin nain tolu. Sander Thoenes hahuu nia careira servisu hanesan hakerek nain no editor husi ‘school paper’ wainhira nia sei tur iha kadeira eskola sekundaria no nia gradua iha tinan 1987.

Iha asaun solidariedade ne’e prezidente AJTL, David Hugo hatete halibur malu ida ne’e ninia objetivu hodi hanoin hikas loron mate maluk jornalista Sander nian.

”Ita mai relembra fila fali de’it kolega ne’ebé mate, mate tanba ba Timór, tanba atu fó sai nutisia ba Timór kona-ba saida mak akontese lolos iha Timór. Kazu violasaun Direitus Humanos, kazu violensia sira ne’ebé hasoru Timoroan sira depois rona rezultadu 4 de Setembru 99. Tanba de’it lia los, buat sira ne’e mak nia mai fakar ran iha ne’e,” hateten David Hugo iha fatin memoriál Sander, Becora Dili.

Sander Robert Thoenes hetan bolsu estudu hodi ba eskola iha Massachusetts, USA. Depois graduasaun, Sander muda ba fali nasaun Russia no serbisu iha Moscow Times no sai reportajen ba Ducth Weekly Vrij Nederland. Nia halo reportajen husi Chechenya iha 1995.

Iha Setembru 1997, Sander muda ba Jakarta hodi sai korespondente ba Financial Times. Nia aprende ko’alia lian Indónezia no hakerek ona artigu 608 iha tinan rua nia laran. Alende servisu ba Financial Times, Sander mós kontribui ba reportajen ba media seluk hanesan; Christian Science Monitor (USA), Vrij Nederland (Netherlands) no Radio Deutsche Welle (Germany).

Iha 21 de Setembru 1999, Sander to’o iha Dili ho misaun halo reportajen. Iha tempu ne’e kedas, nia hetan asasinadu ho ran malirin ‘mudered in cold blood’ husi militar Indónezia nain rua hosi kompi 744, iha Becora, Dili. Hafoin oho tiha Sander, sira rasta nia isin mate ba iha kampu ida no sabir nia oin.

Tinan-tinan jornalista Timoroan sira hamutuk ho komunidade Becora no maluk Holanda balun halibur hamutuk iha fatin memorál Sander nian hodi sunu lilin no kari aifunan atu hanoin hikas fali ba kontribuisaun ne’ebé mak nia halo mai Timor.

Iha serimónia kari aifunan ne’e komunidade Holandez, Léonie Venroij ba jornalista sira dehan atividade ne’e importante los, senti kontenti teb-tebes tanba tinan-tinan jornalista Timoroan no ema komunidade Timor sira bele hanoin hikas fali Sander Robert nia loron mate.

“Ha’u senti importante los no ha’u hanoin Timoroan no jornalista sira sei bele hanoin kona-ba Sander Thoenes. Ha’u hanoin familia sira kontenti los, jornalista sira remembra (relembra.red) Sander tinan-tinan no halo rememoriál hanesan ne’e. Ha’u hanoin importante los tanba Sander nia mate, nia buka ba truth (lialos.red),” dehan Léonie Venroij iha dadalia ho jornalista sira.

Molok fahe malu, Prezidente AJTL, David Hugo husu ba jornalista hotu hodi kontinua hala’o didi’ak misaun ne’ebé mak maluk jornalista ne’ebé mak mate ona husik hela, sai profesionál liu tan no halo kontrolu social ba iha sosiedade ida ne’e.

Tuir observasaun jornalista TAFARA.TL nian, jornalista husi akademikas no mídia oi-oin mak halo rememoriál ida ne’e. * [Maria do Céu | TAFARA.TL | Editor: Zevonia Vieira | 21.09.2017].

About Maria do Ceu Gusmao

Maria do Ceu J.O. Gusmao, Jornalista, Webmaster no Marketing Officer iha TAFARA.TL desde tinan 2015 ate a data.

Check Also

Bankada Fretilin Sauda no Respeita PR nia Desizaun Promulga OJE 2019

Relasiona ho Prezidente da Republika, Francisco Guterres Lú Olo promulga Orsamentu Jeral Estadu [OJE] 2019, …

Leave a Reply

Your email address will not be published. Required fields are marked *