Tuesday , May 21 2019
Home / Sosial & Politika / AJTL Kondena Lalaok Ameasadu Hosi Xefe Gabinete SEKOMS Ba Jornalista, Julio: Hau Lakoi Fo Komentariu
Jornalista hosi insitituisaun media tomak iha Timor-Leste organiza asaun selensiu hodi kontra lalaok ne'ebe komesa hamate liberdade imprensa iha TImor-Leste.[Foto: Zevonia Vieira | TAFARA.TL | 29.05.2017].

AJTL Kondena Lalaok Ameasadu Hosi Xefe Gabinete SEKOMS Ba Jornalista, Julio: Hau Lakoi Fo Komentariu

Relasiona ho impase politika ne’e laos deit afeita ba dezenvolvimentu ekonomiku pais nian, maibe afeita dadauk on aba librdade imprensa no liberdade espresaun rai laran.

Liu hosi konferensia imprensa Asosiasaun Jornalista Timor Lorosa’e [AJTL] hatoo statementu relasiona ho politizasaun ba instituisaun mdia publiku nudar forma estratejia politika ida atu hodi intervene politika redasaun RTTL E.P no ajensia Tatoli nian.

“Pesoal balun iha instituisaun estadu no governu nian hahu ameasa no bandu jornalista sira atu labele espresa sira nia hanoin no pensamentu konaba asumtu sira ne;ebe relasiona ho interese publiku nian iha plataforma sira midia sosiak. Ameasa ne’ebe Xefe Gabinete, Sekretariu Estadu Komunikasaun Sosial [SEKOMS] halo hasoru jornalista RTTL E.P Constancio Vieira iha loron 11/01/2019 nudar hahalok ditadura ne’ebe la afavor ba prinsipiu liberadade imprensa no liberdade espresaun iha nasaun demokratiku ida ne’e. Xefe Gabinete ne’e ameasa atu hasai jornalista Constancio Vieira hosi nia knaar nudar jornalista RTTL E.P”, hateten portavos AJTL, Acacio Pinto, 30/01.

Liu hosi konferensia imprensa jornalista no nudar membru AJTL, Constancio esplika konaba lalaok akontesementu ne’ebe nia hasoru.

“Hau koalia no publika status iha sosial media iha loron 11/01. Iha status hau nen temi ema ida no la ameasa ema ida maibe hau espresa tuir saida mak hau sente, liu-liu iha hau nia status hau tau ‘tanba sa la kria politika aumenta emisaun sosa ekipamentu ne’ebe modern maibe kria politika hodi hasae ka ezenora ema tan deit koor politika’ ida ne’e hau liberdade espresaun ne’ebe hau koalia. Ba situasaun ne’ebe akontese, iha loron ne’ebe hanesan iha oras tuku 12.00 Xefe Gabinete SEKOMS, Julio Goncalves telefone hau haruka hau atu ba hasoru nia katak nia atu fo eru ne’ebe mak Prezidente RTTL Naldo Rei halo ne’e hodi hatudu mai hau, maibe bainhira hau to iha gabinete nia hatete mai hau katak kuandu hau koalia bebeik sira nia problema ka desizaun governu nian, sekarik hau kritika nafatin sira, entaun sira sei hasai hau hosi RTTL. Ida ne’e limita hau nia liberdade espresaun ne’ebe mak preve iha KRDTL artigu 40. Hau sente preokupadu tanba hau nia liberdade espresaun ne’e hahu menus. Hau nia status hau la hatun ema nia privasidade maibe hau koalia konaba asumtu instituisional, no ba ida ne’e hau la tauk atu koalia, rende sei la rende, so tesi deit hau nia kakorok”, esplika Constancio ba jornalista sira.

Hatan ba perguntas hosi jornalista, konaba ho situasuan ne’ebe akontese karik agora moris iha situasaun ameasadu?

Constancio hatan katak Xefe Gabinete dehan atu hasai hau hosi RTTL ne’e signifika ameasa no limita atu labele koalia saida deit mak akontese, “ohin bele hasai hau hosi RTTL maibe hau la nonok atu koalia saida mak at no akontese iha RTTL”.

Bazea ba situasaun no faktu sira ne’e AJTL nudar organizasaun mahon ba jornalista Timoroan hotu hakarak hatoo nia pozisaun katak kondena makaas aktu ka hahalok ameasa hosi Xefe Gabinete SEKOMS Julio Gonçalves hasoru jornalista Constancio tanba ne’e nudar hahalok arogante no ditadura ne’ebe la afavor ba valor demokrasia, liberdade imprensa no espresaun iha nasaun demokratiku.

Liu hosi press statement AJTL hatoo pozisaun katak husu ba Xefe Governu, Primeiru Ministru Taur Matan Ruak atu hasai Xefe Gabinete SEKOMS hosi nia kargu tanba nia attitude la apoiu dezenvolvimentu media no liberdade imprensa no liberdade espresaun iha Timor-Leste.

Husu ba politiku sira ka governu iha future atu para ona halo politizasaun ba instituisaun media publiku RTTL E.P, Tatoli no media professional sira seluk, tanba instituisaun media hirak ne’e laos instituisaun politika atu ema ka grupu ida politiza tuir sira nia hakarak. Kanal media sira ne’e nudar instituisaun media professional atu halo kontrolu sosial, hodi garante transparensia no kontabilidade iha pais demokratiku ida ne’e.

AJTL mos husu ba Konselho Imprensa nudar instituisaun estadu independente ida ne’ebe promove no defende liberdade imprensa no espresaun iha nasaun ne’e atu hare situasaun ne’e tanba liberdade imprensa no espresaun iha pais ne’e hahu ameasadu.

Iha tempu hanesan TAFARA.TL koko halo konfirmasaun ho Xefe Gabinete SEKOMS, Julio Gonçalves iha nia servisu fatin maibe Julio Gonsalves lakoi fo komenatrio refere.

Hau lakoi fo komentariu relasiona ho kazu jornalista RTTL tanba razaun privadu”, hateten Julio ba TAFARA.TL. * [ Zevonia Vieira | TAFARA.TL | 30.01.2019 ]

 

 

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Governu Japaun Inagura Renovasaun Eskola Hospitalidade no Turismo, Minami: TL Presija Rekursu Umanu Kualifikadu Iha Area Turismo

“Atu bele atrai turista internasional, Timor-Leste presija investe maka’as liu iha setor infrastrutura, atu bele …

Leave a Reply

Your email address will not be published. Required fields are marked *