Saturday , May 25 2019
Home / Eleisaun Parlamentar / Alberto: Ritual Tradsional Hatudu Sikun Balun Sedauk Los, Maibe EA Sei Lao Diak
Lia Nain Sira iha seremonia asina Paktu Unidade Nasional hosi ParPol no koligasaun partidaria sira. [Foto: Maria do Ceo | 07.04.2018]

Alberto: Ritual Tradsional Hatudu Sikun Balun Sedauk Los, Maibe EA Sei Lao Diak

“Iha animal rua ne’e fo hatudu aten bubu ne’e, hatudu buat ruma seidauk loos, maibe ita sei halo loos sikun-sikun ne’ebe ladiak, ne’e bainhira eleisaun hotu no ita fo obrigado ba fatin ne’e, hadia no ita bele hetan diak fila-fali”. Lia Nain Liquisa

Comisaun Nasional Eleisaun [CNE] realiza seremonia Paktu Unidade Nasional, hodi asina kumprimisiu eleisaun antesipada pasifika, hametin paz no unidade nasional iha eleisaun antesipada parlamentar 2018.

Reprezentante lia nain hosi municipio 12 no RAEOA hamutuk hodi halo seremonia ritual tradisional ne’ebe halo ona iha loron 6/04. Bainhira TAFARA.TL halo konfirmasaun ho lia nain hosi municipio Liquisa, Alberto Rodrigues esplika, iha ritual ne’ebe halo ona hatudu sinal katak animal fahi no bibi ne’ebe oho hodi halo matak malirin ba partidus politikus no mos ba nain ulun sira, hetan rezultadu ne’ebe ladiak.

“Ami kua animal, manu, bibi no mos fahi e hare’e manu nia rezultadu ne’e diak, manu ne’e ita fanu rai nain. Iha fahi no bibi hatudu rezultadu aat tanba, balun iha nia fuan soke sala malu. Animal fahi no bibi ne’ebe oho hodi halo matak malirin ba partidus politikus no mos ba nain ulun sira, hetan rezultadu ne’ebe ladiak, iha animal rua ne’e fo hatudu aten bubu ne’e, hatudu buat ruma seidauk loos, maibe ita sei halo loos sikun-sikun ne’ebe ladiak, ne’e bainhira eleisaun hotu no ita fo obrigado ba fatin ne’e, hadia no ita bele hetan diak fila-fali”, esplika Alberto

Lia Nain Alberto hosi SUku Hatu Kesi ne’e esplika mos ba partidu sira katak iha tinan ne’e ita foka liu ba eleisaun antisipada loron 12 de Maio, sei lao normal, buat hotu sei lao diak, buat balun ne’ebe hatudu iha sinal sira ne’e mak, karik partidu politiku balun mak ibun sei koalia sala ba malu.

Lian Nain ne’e hatoo lia menon ba povu hosi lorosa’e to loromonu katak durante kampanna partidus politiku no koligasaun sira hala’o, labele halo situasaun sai manas, kria paz, estabilidade matak malirin rai Timor, tanba ne’e ema hotu tenke kontribui, halo dezenvolvimentu ba iha rai doben ne’e”, dehan Alberto ba TAFARA.TL

Iha fatin hanesan Lia Nain hosi municipio Lautenu Wacumura, Armindo Benezato hatoo esperansa ba partidu politiku no koligasaun sira katak ohin marka prezensa iha Paktu Unidade Nasional no asina komprimisiu, garante katak estabilidade bele lao ho di’ak.

“Matak malirin ne’ebe komesa hosi orseik to’o ohin loron kompostu husi ami lia nain husi 13 distritu ami husu harohan ba rai nain sira, fatuk lulik, foho lulik , ai- lulik sira ba matebian sira , mate-klamar sira, nu’une mos ba aman maromak atu bele ajuda ita”, hateten Armindo

Lia Nain Armindo konfesa katak, iha loron ritual tradisional ne’e lia nain sira hamulak no husu deskulpa ba rai lulik no matebian sira, tanba nudar ema moris iha mundu ne’e iha sala, karik iha sala ba matebian sira, karik sira iha laran moras, karik durante sira sei moris to’o iis kotu, “ami husu mos deskulpa ba rai nain ne’e, balun karik halo sala ba ita nia rai, ba foho no fatuk lulik sira hotu, ne’e duni ami harohan ida ne’e, husu deskulpa ba sira, atu sira bele simu ita nia harohan ne’e, atu bele ajuda ita ho matenek, hodi partidu politiku sira iha future, se mak sei manan votus barak, bele ukun rai ne’e ho diak”.

Entertanto Lia Nain Dili hosi Uma Lisan Karkateu, Pio Ataide motael hatoo esperansa boot katak atu kria estabilidade iha rai ne’e, mak marka ona lia nain husi municipio 12 no RAEOA mai halo serimonia ida ne’e, hamutuk ho sira, hodi loke sira nia neon, laran no fo matak malirin ba sira hodi bele ukun povu ho diak.

Ba povu tomak Lia Nain hosi Municipio Dili hatoo katak nafatin fiar metin ba ita nian an, ita nia nian ulun, katak sei la iha tan situasaun manas, “ita tenke iha konsiensia ba ita nia an, fiar metin nafatin iha paz no estabilidade iha ita nia komunidade nia laran, labele hakfodak ho lia anin falsu. Mai ita hamutuk fo votus ba partidus politiku sira ne’ebe deit mak ita hili”. * [ Zelia Ximenes | Editor: Zevonia Vieira | TAFARA.TL | 07.04.2018 ]

About Zelia Ximenes

Check Also

PR Sei Estuda Lista Membrus Governu, Lú Olo: Hakarak Garante Bem Estar Do Estado

“Prezidente da Republika sei estuda hela, se to loron ida kazu hosi A ka B …

Leave a Reply

Your email address will not be published. Required fields are marked *