Wednesday , June 19 2019
Home / Eleisaun Parlamentar / Alkatiri: Fretilin Hakarak Hametin Paz, Estabilidade no Dezenvolvimentu

Alkatiri: Fretilin Hakarak Hametin Paz, Estabilidade no Dezenvolvimentu

Partidu Fretilin hakarak hametin paz, estabilidade no dezenvolvimentu. Lema kampanna Fretilin nian mak TIMOR LESTE IDA BURAS LIU TAN hodi refleta partidu nia vizaun no misaun.

Sekretariu Jeral (Sekjer) Partidu Fretilin, Mari Alkatiri loke kampanna dahuluk partidu fretilin iha Municipiu Liquisa hodi husik manu pombo nu’udar sinal Fretilin maka autor ba paz no estabilidade.

“Ohin ita fo sinal ida tan, husi ohin ba oin, ita hakarak hametin paz no ita hakarak hametin estabilidade. Tamba ita atu lori, Timor-Leste ida buras liu do que agora” , dehan Alkatiri iha abertura kampanna Fretilin, iha kampu futebol Liquisa, loron 20/06.

Aleinde ne’e mos, Sekjer Mari Alkatiri ne’ebe sai orador prinsipal ba kampanna Partidu Fretilin nian hato’o planu politika partidu nian wainhira hetan konfiansa atu ukun ba periodu 2017 – 2022. Planu ne’e fo atensaun liu liu atu hadia, hametin no haburas area edukasaun, saude, agrikultura, asuntu veteranu, subsidiu idozu, bolsa da mae, infraestrutura, harii uma ba kbi’it laek no empregabilidade ne’ebe sai hanesan komprimisiu eletoral Partidu Fretilin ninian.

“Fretilin atu ba ukun, primeiru para atu hadia, segundu atu hametin, terseiru atu haburas. saida maka atu hadia? Saida maka atu hametin? Saida maka atu haburas? Sistema governasaun.’’ Tenik Alkatiri.

Iha parte seluk, jornalista TAFARA.TL intervista membru Estrutura nasional OPMT iha komisaun juridicia nasional, Lidia Gomes, hateten, so maluk feto deit maka hatene nia maluk feto seluk nia nesesidade no halakon desigualdade, tamba ne’e Lidia husu feto Timor-Leste atu vota ba Fretilin

“Fretilin manan, Feto Fretilin sira tenke apoia, tenke suporta, tenke ajuda nia maluk feto sira ne’ebe maka sai vulneravel no kbiit laek ” hateten Lidia iha posto kampanna Munisipiu Liquisa.

Tuir komunidade nia observasaun ba kampanna partidu Fretilin nian iha Liquisa, Augusto Lopes da Silva, idade 48, husi suku Loidahar hateten “Ohin sira koalia kona ba buat lima iha ne’eba, koalia kona ba edukasaun, saude, infraestrutura, veteranu, bolsa da mae, ferik no katuas sira. No tuir ha’u nia observasaun los duni povu nia hakarak maka ne’e” dehan Augustu depois de remata kampanna.

Kampanha refere hala’o iha kampu futebol Liquisa, hetan partisipasaun husi Sekretariu Jeral Fretilin, ho kuadrus Fretilin nian, inklui Koordenador kuadru Fretilin Liquisa, veteranu, apoiante militante no simpatizante Liquisa. Hetan observasaun direita husi CNE no STAE, no husi parte seguransa PNTL Munisipio Liquisa.* [Ambrozio Colo  | Contributor TAFARA.TL | Editor: Fernando Antonio da Costa | 20.06.2017].

About Ambrocio Colo

Ambrocio Colo, Kontributor TAFARA.TL, nudar mos Alumni Parlamentu Foinsa'e Nian [PFN] ba Periodu Daruak.

Check Also

PR Sei Estuda Lista Membrus Governu, Lú Olo: Hakarak Garante Bem Estar Do Estado

“Prezidente da Republika sei estuda hela, se to loron ida kazu hosi A ka B …

Leave a Reply

Your email address will not be published. Required fields are marked *