Thursday , May 23 2019
Home / Eleisaun Parlamentar / Alkatiri: Laiha Unidade, Laiha Dezenvolvimentu, Povu Hakarak Paz No Estabilidade
Sekretariu Jeral Fretili, Dr.Mari Alkatiri halo deskursu iha loron selebrasaun Tinan Fretilin ba dala 43 iha sede Fretilin, loron 11 Septembru.[Foto: Martinho Moniz | TAFARA.TL | 10.09.2017].

Alkatiri: Laiha Unidade, Laiha Dezenvolvimentu, Povu Hakarak Paz No Estabilidade

“Ita liu hosi elisaun rua, ita bele hare ezemplu furak tebes iha elisaun rua ne’e katak iha maturidade. Povu fo votu mai ita, hatudu kedas katak hakarak ita hotu hamutuk, hakarak lori rai ne’e ba oin, nee votu povu nian” Mari Alkatiri.

Partidu Fretilin selebra tinan ba dala 43, iha sede Fretilin hamutuk ho parseiru koligasaun partidu PD no KHUNTO.

Sekretariu Jeral Fretilin, Dr.Mari Alkatiri ba partisipante sira ne’ebe partisipa hateten katak Fretilin halo tinan 43, mai hosi ASDT moris iha 20 de Maiu 1974, fo dalan atu harii Fretilin iha 11 de Septembru 1974.

“Hateke ba tempu uluk, iha tempu ne’eba hau idade 23 ka 24 no hau laos joven liu iha grupu, no balun joven liu hau. Ho idade 23 ka 24 ho responsabilidade boot tebes atu hasoru funu ida ne’ebe ita la hatene bainira mak hotu, tanba ne’e palavra de ordem savi Fretilin nian, mate ka moris ukun rasik an”, esplika Dr.Mari Alkatiri.

Iha deskursu Dr.Mari Alkatiri fo hanoin fila katak, ohin loron Timor-Leste tama iha baze foun, hodi harii no hametin estadu. Timor-Leste rai ne’ebe restaura independensia iha tinan 15 deit,  maibe hakarak ka lakohi tenke rekonyese povu koleng ona ho krizi, violensia no povu hakarak paz no estabilidade.

“Ita liu hosi elisaun rua ita bele hare ezemplu furak tebes, iha elisaun rua ne’e katak iha maturidade. Povu fo votu mai ita, hatudu kedas katak, hakarak ita hotu hamutuk hakarak lori rai ne’e ba oin, nee votu povu nian. Iha ne’e, ita pasifiku, povu tur hakmatek nafatin, atu hein lider sira fo sinal ba malu ne’ebe positvu katak rai ne’e sei lao ba oin duni”, hateten Dr.Mari.

Eiz Premeiru Ministru ne’e informa liutan katak, prosesu atu harii nasaun no estadu ida, liu-liu harii hosi zero ne’e la fasil. Tanba ne’e mak ho lezislatura ida ne’e no VII governu ne’ebe mak atu mai, ho intendimentu ne’ebe iha, buka atu harii Timor-Leste sei lao duni ba oin.

Eiz Premeiru Mininstru ne’e fiar katak lider sira iha vontade politika ne’ebe diak, buat hotu aprende ona katak laiha unidade, laiha dezenvolvimentu. Laiha Paz, laiha Dezenvolvimentu.

Iha parte sorin komunidade hela iha Bairo-Pitte, Olga Baptista ba TAFARA.TL hato’o nia esperansa boot katak, ho governasun foun ne’e bele responde aspirasaun povu tomak nian, oinsa mak povu hotu la hasoru tan krizi, oinsa mak povu hotu moris feliz.

“Hau lakohi ona moris iha krizi nia laran, tanba iha krizi 2006 hatudu ona mai hau katak tenke lakon familia no sasan. Krizi la fo benefisu ba ita, maibe sei fo buat at ba ita tanba haburas tan odiu malu. Hau husu ba governu foun atu bele responde povu nia ezijensia no hametin liu tan unidade no paz iha rai ida ne’e”, hateten Olga ho espektativa boot.* [Zevonia Vieira | TAFARA.TL | 10.09.2017].

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

MEDSOS Sai Obstaklu Ba Servisu Jurnalismu, Akara: Tenke Halo Edukasaun Sivika Konaba Internet Saudavel

“Kna’ar importante hosi jornalista professional sira atu fo informasaun ne’ebe los, kredibel ba publiku, no …

Leave a Reply

Your email address will not be published. Required fields are marked *