Friday , January 18 2019
Home / Eleisaun Parlamentar / AMP Apresia PR nia Desizaun Ba EA, Xanana: Desizaun PR Hakarak Defende Konstituisaun
Aliansa Mudansa ba Progresu [AMP] halo konferensia da imprensa iha sede CNRT. [Foto: Zelia Ximenes | 08.04.2018]

AMP Apresia PR nia Desizaun Ba EA, Xanana: Desizaun PR Hakarak Defende Konstituisaun

“Apresia tebes desizaun Prezidente da Republika tanba hakotu tiha impase politiku, ho ida ne’e Presidente da Republika hatudu duni no defende Konstituisaun”. Xanana Gusmao

Kampanna eleitora ne’ebe sei hahu ofisial iha loron 10/04, partidu politiku no koligasaun partidaria sira prepara ona sira nia programa politika hodi ba hatoo iha eleitor sira iha baze. Liu hosi konferensia da imprensa, iha sede CNRT, Prezidente no protavos Aliansa Mudansa ba Progresu [AMP], Xanana Gusmao esplika ba jornalista sira katak AMP apresia tebes desizaun Prezidente da Republika tanba hakotu tiha impase politiku, ho ida ne’e Presidente da Republika hatudu duni no defende Konstituisaun. AMP preparadu ona ho nia programa nasional durante tinan lima nia laran, kada tinan programa saida mak atu aprezenta iha parlamentu AMP preparadu.

“Ho kbi’it ne’ebe Konstituisaun fo ba Prezidente da Republika, hodi hasai desizaun eleisaun antisipada, Prezidente hakarak defende, laos deit Konstituisaun maibe hakarak fo oportunidade diak no valores demokratika. Dala barak ita rona estadu da direitu demokratiku, estadu katak estadu, direitu tuir lei. demokratiku povu nia desizaun mak vale, nudar partidus politiku ami haree ba situasaun amizavide, Prezidente hasai desizaun ne’ebe korreta, tanba tuir Konstituisaun, tuir demokrasia. Sujesaun minoria ba maioria, nee valores demokratikus nia mak fundamentu ba estadu de direitu demokratikus, minoria tenke hakruk ba maioria, laos maioria mak hakruk ba minoria”, dehan Xanana, 08/04

Prezidente Partidu CNRT mos kongratula ba povu, hosi labarik kiik, ferik no katuas, liu juventude sira, tanba povu ne’e bele ona hanoin katak, sira nia demokrasia mak ita respeita malu.

“Garante toleransia, estabilidade no paz ho pasiensia hein desizaun Prezidente nian, diak tebes ba AMP bele iha eleisaun. Ami sei reprezenta povu ho diak, AMP hakarak fo hatene ba povu tomak, eleisoens antisipadas besik ona iha loron 12 de maio, hodi ami nain tolu, so bele afirma katak vontade husi ami lideres partidu tolu ninian, ami nia vontade, ami nia determinasaun boot tebes atu bele responde ba saida mak povu hanoin hela, tanba situasaun nebe mosu dadaun ne’e governu la iha lejitimidade atu ukun. AMP sei garante estabilidade governativa funsional, serviso temporal durante tinan lima, hodi hametin estadu nia riin haat, liu-liu hametin parlamentu nasional no hametin governu. Ami mos dehan ba povu, ami sei implementa programa sira ne’ebe, fo resposta ba nessesidade dezenvolvimentu hodi kontribui ba povu no hadia nia moris”, esplika Xanana Gusmao

Iha tempo hanesan, Prezidente PLP, Taur Matan Ruak esplika durante ba povu levante problema iha tolu hanesan impase foin lalais ne’e sala se nian, no hau hatete ba sira ne’e laos sala AMP nian maibe ne’e sala partidu Fretelin no ne’e laos ba dala ida, maibe ba dala tolu ona, ba daruak importansia ba eleisaun agora nian, normalmente eleisaun halo tinan lima-lima, dadaun ne’e la akontese ida ne’e, tanba problema ne’ebe ita iha. Ba datolu numeru nebe povu la vota, ba nivel nasional mais de 160.000 mak la vota, saida mak ami husu atu sira bele vota, se sira hakarak estraga sira nia votu ba terseiru idade, bolsa da mae, bolsa estudu, hakarak edukasaun maibe sira la fo sira nia partisipasaun iha fo votus.

“Uluk ita ba funu tinan 24, ita fo ita nia kontribuisaun, tanbasa mak dala ida deit, iha tinan barak nia laran iha loron ida deit, ita labele fo ida ne’e mak hau nia preokupasaun ba povu e hau sente katak sira mos hanesan”, hateten Taur Matan Ruak.

Ba jornalista sira Taur Matan Ruak hatoo ba povu toma hodi partisipa iha eleisaun antesipada ho sivismu, lalika simu provokasaun, manten paz no estabilidade rai ida ne’e. Konferensia da imprensa ne’ebe halao hosi AMP, kompostu hosi partidu CNRT, PLP no KHUNTO, iha sede CNRT Bairo Girlhos Dili. * [ Zelia Ximenes | editor: Zevonia Vieira | TAFARA.TL | 09.04.2018 ]

About Zelia Ximenes

Check Also

PR Sei Estuda Lista Membrus Governu, Lú Olo: Hakarak Garante Bem Estar Do Estado

“Prezidente da Republika sei estuda hela, se to loron ida kazu hosi A ka B …

Leave a Reply

Your email address will not be published. Required fields are marked *