Friday , September 21 2018
Home / Eleisaun Parlamentar / AMP Hasoru PR, Xanana: Enkontru Lao ho Diak no Rapidu
Prezidente AMP, Xanana Gusmao halo entrevista ho jornalista sira iha palacio prezidensia. [Foto: Zevonia Vieira | 04.06.2018]

AMP Hasoru PR, Xanana: Enkontru Lao ho Diak no Rapidu

“Prezidente sei nomeia Primeiru Ministru mak nia sei fo sai ba imi, se mak atu sai Primeiru Ministru, tomada de posse bainhira Prezidente mak sei fo sai. Ami bele dehan deit katak enkontru rapidu tebes”. Xanana Gusma

Lideransa Aliansa Mudansa ba Progresu [AMP] hasoru malu ho Prezidente da Republika ba daruak nian.

Hafoin remata enkontru, Prezidente AMP, Xanana Gusmao ba jornalista sira informa katak Prezidente da Republika tuir Konstituisaun, iha prosesu politiku ba parlamentu no formasaun governu iha Prezidente da Republika nia kompetensia.

“Antes tomada de posse parlamentu Prezidente bolu ona partidu sira, depois tomada de posse parlamentu, Prezidente bolu fali atu halo konsulta. Ita boot sira hatene katak governu ne’e mai hosi parlamentu, tanba ne’e mak AMP inzita, agora Prezidente hare hela no halo konsulta, para hare oinsa maka buat sira ne’e lao”, hateten Xanana Gusmao iha palacio prezidensia 19/06.

Xanana Hatutan katak enkontru ne’ebe konvoka hosi Prezidente da Republika lao ho diak no rapidu. Tuir Xanana katak enkontru ne’ebe rapidu signifika katak iha hanoin no hakarak hanesan.

“Prezidente da Republika mak sei fo sai, Prezidente sei nomeia Primeiru Ministru mak nia sei fo sai ba imi, se mak atu sai Primeiru Ministru, tomada de posse bainhira Prezidente mak sei fo sai. Ami bele dehan deit katak enkontru rapidu tebes, ne’e tanba ambiente politiku ne’ebe ita fo hanoin ba malu ne’e diak. Ami agredese tebes ba Prezidente nian dispozisaun, Prezidente nia preokupasaun ba prosesu politiku ne’ebe lao dadauk iha ita nia rain”, hateten Xanana Gusmao.

Tuir informasaun ne’ebe TAFARA.TL rekolha katak lista Primeiru Ministru ba VIII Governu Konstituisional entrega ona ba Prezidente da Republika no hein Prezidente da Republika sei nomeia Primeiru Ministru liu hosi dekretu Prezidensial * [ Zevonia Vieira | TAFARA.TL | 19.06.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

PR Sei Estuda Lista Membrus Governu, Lú Olo: Hakarak Garante Bem Estar Do Estado

“Prezidente da Republika sei estuda hela, se to loron ida kazu hosi A ka B …

Leave a Reply

Your email address will not be published. Required fields are marked *