Sunday , June 24 2018
Home / Sosial & Politika / AMP Husu MF Esklarese Orsamentu Duadesimu, Aniceto: Komisaun Permanente Akompanna Deit Atividade Governu
Prezidente Parlamentu Nasional, Aniceto Guterres halo entrevista ho jornalista sira iha palacio prezidensia. [Foto: Zevonia Vieira | 21.02.2018]

AMP Husu MF Esklarese Orsamentu Duadesimu, Aniceto: Komisaun Permanente Akompanna Deit Atividade Governu

Relasiona ho orsamentu ba eleisaun antesipada ne’ebe governu sei aloka 5 milloens, Aliansa Maioria Parlamentar [AMP] ezizi Ministru Finansa, Dr. Rui Gomes hodi halo esklarese ba orsamentu refere.

Hatan ba ezijensia refere, Prezidente Parlamentu Nasional ba TAFARA.TL iha palacio prezidensia, 21/02, esplika katak AMP sei ho nia interpretasaun katak parlamentu ne’e sei funsiona ho normal, funsaun ba fiskalizasaun ne’e sei lao hanesan babain, tanba ne’e sira hakarak bolu Ministru Finansas.

“Bele ka lae ho situasaun parlamentu desolvidu bele bolu membru governu ida mai iha parlamentu nasional? tenke interpreta didiak, tanba liga mos ho orgaun sira seluk. Substansia kona ba duadesimu ne’e implementa ho los ka lae, iha komisaun permanente so bele akompanna deit ba atividade governu nian. Akompanna la signifika, la hanesan ho halo fiskaliza. Subtansia osan ne’e los ka lae, hau hanoin iha mekanizmu seluk para atu hatene informasaun ne’e, governu bele halo konferensia imprensa hodi hatan no deputadu sira mos bele informadu ona”, esplika Aniceto.

Aniceto mos informa katak tuir Konstituisaun dehan Komisaun permanente mak funsiona. Plenariu halo kuandu iha asumtu ne’ebe nesesariu tebes iha tempu agora, atu deskuti, “iha Konstituisaun dehan komisaun permanente bele autoriza deklarasaun deit ba estadu de sitiu ka estadu de emerjensia, katak bainhira situasuan extraordinariu tebes, marka plenariu ho kestaun ne’ebe lojika, se asumtu ida ne’ebe la grave, ne’e labele no komisaun permanente la konvoka plenaria maibe promove deit, ita hatene ona ne’e laos deit kestaun interpretasaun, maibe kestaun politika mos”.

Iha parte seluk TAFARA.TL halo konfirmasaun ho bankada opozisaun CNRT, Deputadu Arao Noe, liga ho ezijensia ne’ebe husu Ministru Finansa hodi esklarese konaba orsamentu ba iha eleisaun antesipada.

Via telefone Arao Nõe responde katak iha plenaria premeiru iha komisaun permanente, hosi bankada tolu AMP, ezizi atu konvida Ministru Finansas hodi esklarese kona ba dekretu governu nian konaba uzu duadesimal no artigu 31 Lei Jestaun Finanseira , tanba AMP hare katak hosi dekretu ne’ebe governu hasai konaba uza osan duadesimal, ne’e la tuir saida mak hatete iha artigu 31.

“Iha viola balun konaba relasaun uzu duadesimal, kuandu ajusta fali, tuir lolos osan duadesimal ne’e para selu deit tuir estrutura ba VI Governu nian [governu anterior], tanba VII Governu nia programa sedauk aprovadu, tanba nia orsamentu rasik sedauk iha, tanba ne’e mak orsamentu duadesima ne’e uza tuir orsamentu estadu 2017 no tuir strutura VI Governu nian, maibe hare ba realidade hosi dekretu ne’ebe governu aprova, halo fali adjustamentu ba orsamentu duadesimal, hodi selu fali ministeriu foun sira ne’ebe uluk laiha, ida ne’e indikasaun violasaun”, hateten Arao

Arao hatutan tan katak liga ho osan ba eleisaun antesipada, governu loke fali konta bankaria hodi tau fali osan duadesimal ba eleisaun nian, katak kada fulan tau milliaun ital, no hanesan osan ne’e gasta tiha ona, “osan ne’e rai hamutuk no fulan rua ka tolu nian, nia aloka ba iha ne’eba, no dehan 5 milloens para halo eleisaun antesipada. Tuir Lei Jestaun Finanseira artigu 31 konaba orsamentu duadesima, osan restu fulan ida, hodi apoio ba ministeriu ida, bainhira osan ne’e la uza hotu, osan ne’e tenke fila fali ba kofre estadu, tanba ne’e mak laiha dalan, para osan ne’e rai. Tanba ne’e bankada AMP presiza Ministru Finansas mai iha plenaria hodi esplika kona ba dekretu governu nian”. *[Zevonia Vieira | TAFARA.TL | 21.02.2018]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Sistema Online Iha Klinika Becora, Fasilita Inan Isin Rua Sira

Saude nudar seitor importante iha ema ida nian moris, ho saúde ne’ebe diak sei salva …

Leave a Reply

Your email address will not be published. Required fields are marked *