Wednesday , January 17 2018
Home / Sosial & Politika / AMP: PPN Manipula Hodi La Fo Konsiderasaun Ba Karta Mosaun Sensura
Prezidente hosi bankada hosi PLP, CNRT no KHUNTO halo konferensia imprensa ho jornalista sira. [Foto: Zevonia Vieira | 09.01.2018]

AMP: PPN Manipula Hodi La Fo Konsiderasaun Ba Karta Mosaun Sensura

“Dala ida tan Prezidente Parlamentu Nasional tenta hela dada nafatin tempu. Ironiku liu maka PPN admite proposta mosaun sensura ne’ebe hatama hosi AMP iha loron 20/11/2017, infelismente PPN foin haruka karta ba VII Governu Konstituisional ka Primeiru Ministru iha loron 3/01”. AMP

Aliansa Maioria Parlamentar (AMP), liu hosi konferensia imprensaba jornalista sira deklara katak bazea ba karta ne’ebe Prezidente Parlamentu Nasional ho numeru referensia 87/PRES/2017, ne’ebe hatoo ba VII Governu Konstituisional, iha loron 3/01/2018, ho asumtu atu halo ajendamentu ba debate Mosaun Sensura ba governu. Karta refere informa ba governu, hodi husu governu nia disponilidade atu mai atende ajenda debate mosaun sensura iha Parlamentu Nasional. AMP informa katak Prezidente Parlamentu Nasional (PPN) mos sita iha karta refere katak, sei fiksa data ba debate mosaun sensura nian la liu hosi loron 30, hahu hosi loron 18/12/2017, maske rejimentu parlamentu nasional la koalia kona ba limitasaun tempu ba debate mosaun sensura nian.

Prezidente Bankada PLP, Fidelis Magalhaes ne’ebe lee statementu liu hosi konferensia imprensa, 09/01 esplika katak iha artigu 140 Rejimentu Parlamentu Nasional konaba mosaun sensura iha duni fatin no nune’e mos tuir artigu 138 Rejimentu Parlamentu Nasional tempu ba debate plenaria nian, labele liu hosi loron tolu.

“Prezidente Parlamentu Nasional manipula hodi la fo konsiderasaun loloos ba kart aba mosaun sensura ne’ebe hatama hosi AMP iha loron 20/11/2017. Dalai da tana Prezidente Parlamentu Nasional tenta hela dada nafatin tempu. Ironiku liu maka PPN admite proposta mosaun sensura ne’ebe hatama hosi AMP iha loron 20/11/2017, infelismente PPN foin haruka karta ba VII Governu Konstituisional ka Primeiru Ministru iha loron 3/01, hodi konta fali hahu hosi loron 20/12/2017. Dala ida tan PPN tenta dada nafatin tempu hodi kria krize instituisional”, deklara Fidelis.

Iha loron 08/01, bainhira Prezidente Parlamentu Nasional, Aniceto Guterres halo konferensia imprensa ho jornalista sira, antes AMP sira realiza konferensia imprensa, ba jornalisra sira Aniceto esplika katak ajenda kona ba mosaun sensura pendente hanesan uluk iha loron 18/12/17.

“Hau anunsia tiha ona no notifika governu atu mai hatan no prazu ba loron 30 durante loron servisu nian, ne’ebe sura hosi loron 18/12/2017, loron ne’ebe hau halo anunsia. Depois anunsia, iha loron 3/01 hau haruka ona karta ba Primeiru Ministru, informa nafatin kona ba anunsiu ne’e ho nia notifikasaun katak ho rekerimentu hanesan mos mai hosi bankada KHUNTO, ne’ebe husu ba iha loron 8/01, hau aneksa rekerimentu sira ne’e ba Primeiru Ministru, presizamente governu tenke fo uluk resposta mai kona ba sa loron mak governu atu mai hatan, se loron ne’e sira konkorda ona mak meza Parlamentu foin bele fiksa ordem do dia no marka plenaria, tanba ne’e mak sedauk tau iha ajenda, tanba liga ho orgaun estadu sira seluk, Parlamentu la bele obriga ho data ida para atu mai obrigatoriomente”, esplika Aniceto Guterres.

Iha loron 09/01, hafoin AMP halo konferensia imprensa TAFARA.TL koko atu halo konfirmasuan fila fali ho Prezidente Aniceto maibe sedauk hetan konfirmasaun to TAFARA.TL hasae no publika nutisia refere.*[Zevonia Vieira | TAFARA.TL | 09.01.2018]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Luis: PPN Blokea Ajenda Hosi AMP, Branco: AMP Husu Ajenda Ba Sira nian Interese

“Akontese maka ajenda deit, ba interese grupu ninian, atu hadau poder, entaun ami hare katak …

Leave a Reply

Your email address will not be published. Required fields are marked *