Friday , August 17 2018
Home / Eleisaun Parlamentar / AMP Sai Manan Nain Iha EA, Berta: Espera Responde Ami nia Susar Laos Promesas Deit
Xanana Gusmao, Taur Matan Ruak no Naimori iha kampanna eleitoral. [Foto: Copyright Aldo Martins]

AMP Sai Manan Nain Iha EA, Berta: Espera Responde Ami nia Susar Laos Promesas Deit

“Hau ema kiik oan, sei moris kiak nafatin, moris susar no terus ami kiik mak sempre hasoru. partidu ne’ebe mak manan, bele responde lalais mai nia susar hanesan sira koalia iha kampanna nia laran, no laos promesa no lalika halo ami halai tun sae tan”. Berta Alves

Aliansa Mudansa ba Progreso [AMP] sai manan nain iha eleisaun antesipada. Iha loron 12/05, povu iha Timor laran toma no inklui iha diaspora ba ezerse sira nia direitu hodi determina future nasaun, hodi harii fali VIII Governu Konstituisional.

Rezultadu final hatudu katak AMP manan maioria ho votus 308.548 [49.59%] tuir kedas ho Fretilin ho votus 212,702 [34,18%], Partidu Demokratiku ho votus 49,951 [8.03%] no ikus tuir Frente Dezenvolvimentu Demokratiku ho votus 34,235 [5.50%].

Iha tinan kotuk iha eleisaun parlamentar 2017, Partidu Fretilin manan maioria simplis ho votus 168,422 [34,51%] , Partidu CNRT 167,330 [34,29%], PLP votus 60,092 [12,31%], PD ho votus 55,595 [11,39%] no KHUNTO 36,546 [7,49%]

Iha fatin la hanesan komunidade Bairo Pite, Joao da Costa [39] ba TAFARA.TL ho esperansa boot katak espera koligasaun partidaria ne’ebe mak manan, bele implementa duni promesas ne’ebe mak koalia ona iha kampanna nia laran.

“Hau iha esperansa boot katak saida mak sira koalia bele implementa, laos hanesan promesas falsu deit, hodi hamonu povu nia fuan ba sira. Problema ne’ebe povu hasoru hanesan bee moos, edukasaun, saude no dezempregu bele responde ho diak, se lae eleisaun tan, ami la fiar ona”, hateten Joao

Joao husu ba lideransa sira hodi servisu hamutuk nafatin, hases tiha interese pesoal, no tau hamutuk interese nasional, hodi bele atinji povu nia mehi ne’ebe durante ne’e luta hamutuk.

Negosiante kiik, Berta Alves [42] ne’ebe faan modo iha jardim Bairo Pite, konfesa ba TAFARA.TL katak hanesan negosiante kiik lakohi tan iha funu, no lakohi hare tan povu ne’e terus.

“Hau ema kiik oan, sei moris kiak nafatin, moris susar no terus ami kiik mak sempre hasoru. partidu ne’ebe mak manan, bele responde lalais mai nia susar hanesan sira koalia iha kampanna nia laran, no lalika halo ami halai tun sae tan”, hateten Berta. * [ Zevonia Vieira | TAFARA.TL | 14.05.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

PR Sei Estuda Lista Membrus Governu, Lú Olo: Hakarak Garante Bem Estar Do Estado

“Prezidente da Republika sei estuda hela, se to loron ida kazu hosi A ka B …

Leave a Reply

Your email address will not be published. Required fields are marked *