Monday , December 10 2018
Home / Sosial & Politika / AMP Sei Lao Ho Plataforma Foun, Tuir Akordu Hosi Partidu 3, Fidelis: Plataforma Ne’e Ema Sei Gosta
Prezidente Partidu KHUNTO, Amanda Berta halo entrevista ho jornalista sira iha palacio prezidensia. [Foto: media PR | 07.02.2018]

AMP Sei Lao Ho Plataforma Foun, Tuir Akordu Hosi Partidu 3, Fidelis: Plataforma Ne’e Ema Sei Gosta

Partidu tolu, PLP, CNRT no KHUNTO asina ona akordu ka plataforma hodi lao hamutuk iha eleisaun antesipada ne’ebe sei realiza iha fulan Maiu.

Bainhira AMP hasoru malu ho Prezidente da Republika, CNE no STAE hodi deskuti konaba kalendario ba eleisaun antesipada, iha palacio prezidensia 07/02. Responde ba TAFARA.TL liga ho plataforma AMP nian, karik sei nafatin kontinua ho plataforma PLP nian ne’ebe uluk sai plataforma principal iha eleisaun 2017?

Prezidente Bankada PLP, Fidelis Magalhaes responde katak sedauk koalia konaba plataforma, maibe depois de kampanna ema sei hare plataforma no ema sei gosta, “ho tempu ami nia programa sei sai no jornalista sira sei vota hotu ba AMP”.

Ba jornalista sira Fidelis mos esklarese katak partidu hotu iha kompremitivu, “hau bele koalia iha ne’e e nome do partidu PLP, ami kompremitivu no durante ne’e ami hatudu iha asaun katak ami so hakarak Timor ida ne’ebe seguru, Timor ne’ebe moris iha harmonia nia laran no demokrasi nia laran. Komprimisiu ba ida ne’e sei la muda no sei aumenta liutan”.

Iha parte hanesan CNRT ne’ebe parte mos hosi AMP, responde ba TAFARA.TL liga ho plataforma AMP nian, CNRT sei kontinua ho plataforma uluk nian ou iha plataforma foun? Prezidente Conselho Dirativa Nasional [CDN], Dionisio Babo hateten hanesan desidi tiha ona iha otel Novo Turismo, enkontru alargradu, “hau hanoin sei lao ho plataforma ne’ebe foun”.

Plataforma entre partidu tolu ne’ebe uluk iha diferensia, sei la tama iha plataforma foun AMP nian? Dionisio responde katak ne’e laiha problema tanba AMP esplika tiha ona no iha tiha ona adjustamentus de programas entre partidu sira ne’e hotu, laiha objesaun no impedimentu.

Dinisio mos esplika ba komprimisiu CNRT nian iha kampanna eleitoral katak, partidu politiku sira hotu kompremete, liu-liu CNRT desde uluk kedas kompremete tiha ona katak sei lao tuir Lei, Konstituisaun.

Hanesan mos KHUNTO, ba TAFARA.TL Prezidente KHUNTO, Armanda Berta hateten kona ba plataforma, partidu KHUNTO lao ho AMP, “hau fiar katak programa durante tinan 15 nia laran ne’ebe halao ona, la ses hosi partidu istoriku sira halo, hanesan Fretilin, CNRT no PD nian programa no AMP halo nia kontinuasaun deit, maibe AMP mos prepara program foun ba ita nia nasaun ida ne’e no KHUNTO fiar lao ho AMP”.

Berta mos hateten Partidu KHUNTO garante paz no estabilidade iha nasaun laran iha eleisaun antesipada ne’ebe mak sei mai.*[Zevonia Vieira | TAFARA.TL | 09.02.2018]

 

 

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Komemora Loron Invasaun, PR Lú Olo Sauda CNC nia Inisiativa Hodi Hametin Memoria Kolektiva

Prezidente da Republika, Dr. Francisco Guterres Lú Olo sauda Centro Nasional Chega! no ekipa toma …

Leave a Reply

Your email address will not be published. Required fields are marked *