Saturday , November 17 2018
Home / Sosial & Politika / Aniceto: Alokasaun Orsamentu Ba Saude, Edukasaun, Agrikultura no Infrastrutura Oituan liu
Xefe Banakda Fretilin, Aniceto Guterres halo entrevista ho jornalista sira iha Uma Fukun Parlamento Nasional.[Foto: Zevonia Vieira | TAFARA.TL | 04.10.2017].

Aniceto: Alokasaun Orsamentu Ba Saude, Edukasaun, Agrikultura no Infrastrutura Oituan liu

“Governu aprova osan barak atu gasta narnaran iha tempu badak tebes, hodi loke dalan ba sistema ajustu diretu, ne’ebé baibain ita hatene nakonu ho familiarizmu, favoritizmu no klientelizmu”. Aniceto Guterres

Orsamentu Jeral Estado 2018 hetan aprovasaun final global. Liu hosi aprovasaun OJE 2018 iha uma fukun parlamentu nasional, Xefe Bankada Fretilin, Dr. Aniceto Guterres hatoo deklarasaun de votu liga ho aprovosaun OJE 2018.

Aniceto hateten katak bankada Fretilin iha parlamentu nasional sei iha nafatin duvida no proekupasaun konaba orsamentu nia implementasaun no oinsa bele lori rezultadu no benefísiu ba povu Timor-Leste tomak.

“Governu aprova osan barak atu gasta narnaran iha tempu badak tebes, hodi loke dalan ba sistema ajustu diretu, ne’ebé baibain ita hatene nakonu ho familiarizmu, favoritizmu no klientelizmu”, hateten deklara xefe bankada Fretilin, 07/09

Tuir Aniceto katak, VIII Governu iha intensaun atu selu tusan balu husi governu anteriór sira, maske seidauk iha verifikasaun loloos tusan totál Estadu nian hamutuk hira, kona-ba saida, ou tansá halo tusan, “mais ou menus $60 miloins husi orsamentu ne’e destinadu atu selu tusan ka dívida husi projetu infrastrutura sira ho ajustu diretu husi V no VI Governu. maibé ita laiha informasaun loloos kona-ba ejisténsia, progresu no kualidade projetu sira ne’e. Idane’e forma ida tan atu halo esbanjamentu, hodi benefisia klientela sira ne’ebé fó ona apoiu ruma”.

Liu hosi deklarasaun votus, Aniceto mos hatoo ba povu katak iha loron 20 Septembru 2016, atual Primeiru Ministru, Taur Matan ruak, bainhira sei kaer kargu nudar Prezidente da Republika, iha uma fukun ida ne’e hatoo kritika forte hasoru governu tanba politika ne’ebe fasilita ezbanjamentu ba rekursu ka osan.

Eiz Prezidente Parlamentu Nasional ne’e mos hateten katak governu nia seriedade konaba di diversifikasaun ekonómika. OJE 2018, hanesan orsamentu sira iha tinan uluk nian, kontinua

depende maka’as ba transferénsia husi Fundu Minarai, no liu RSE. Se laiha reseita husi fatin seluk, Fundu Minarai sei mohu iha jerasaun ida ne’e.

“Fretilin nota katak alokasaun orsamentu ba área xave sira hanesan saúde, edukasaun, agrikultura no infrastrutura, uitoan liu kompara ho orsamentu ba despeza rekorrente sira. Governu ida ne’e só preokupa atu sustenta mákina Estadu de’it, selu saláriu funsionáriu sira, no seluk tan, setór sira ne’ebé laiha produtividade, iha mak gastus. Ida ne’e sinál ida negativu tebes”, hateten Aniceto.

Iha parte sorin hosi bankada AMP, PD, no PUDD, fo votus afavor no ezije ba VIII Governu Konstituisional hodi ezekuta ho orsamentu ho responsabilidade, hodi hakotu impase politika ne’ebe mak akontese dadauk no bele responde nesesidade povu nian ho dignu.

Liu hosi debate OJE 2018 aproval final global ho votus afavor 42, kontra 9 no abestensaun 14, iha loron 7/09. * [ Zevonia Vieira | TAFARA.TL | 07.09.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Juventude La Hakarak Promesas no Hakribi Atitude Koruptu

Hau fiar katak joven sira iha talentu atu hamosu no habelar idea foun no tau …

Leave a Reply

Your email address will not be published. Required fields are marked *