Monday , June 17 2019
Home / Eleisaun Parlamentar / Aniceto Guterres Avansa ho Agenda Mudansa, Maski Manan Liu Votu Ida deit
Presidetne Parlamento Nacional Eleitu Aniceto Guterres hahu nia diskursu iniciu iha Parlamento Nacional.[Foto: Zinho MD | TAFARA.TL | 05.09.2017].

Aniceto Guterres Avansa ho Agenda Mudansa, Maski Manan Liu Votu Ida deit

Deputadu Fretilin, Aniceto Guterres mak lidera Parlamentu Nasional ba periodu 2017-2022. Aniceto deklara ajenda mudansas ba servisu parlementu nian iha ninia diskursu. Partidu sira seluk espera Presidente Parlementu sai Presidente ba partidu hotu no ba povo Timor-Leste.

Liu hosi prosesu elisaun ne’ebe livre no segredu ba kandidatura nain rua, Deputadu Aderito Hugo hosi bankada CNRT no Deputadu Aniceto Guterres hosi bankada Fretilin. Eleisaun Presidente Parlementu ne’e Deputadu Aniceto Guterres mak manan ho votu 33, Aderito Hugo lakon ho votu 32. Prosesu elisaun ne’ebe halao iha oras tuku 22:00 kalan iha uma fukun Parlamentu Nasional.

Prezidente Eleitu Aniceto Guterres, hatoo nia diskursu katak, nudar deputadu Fretilin, no eleitu nudar Prezidente Parlamentu, sei promete atu sai Prezidente ba Parlamentu tomak.

“Laos prezidente ba grupu parlamentar ruma ka bankada ruma, muito menus ba koligasaun ruma iha uma fukun ida ne’e. Ne’e duni hau simu mandatu tuir Konstituisaun Republika no Rejimentu Parlamentu Nasional nian no ho independensia. Parlamentu Nasional hosi nia natureza propia no nudar orgaun soberania da reprezentativu ba sidadaun tomak Timor-Leste nian”, Esplika Aniceto.

Deputadu Fretilin ne’e mos afirma liutan katak, sei servisu ho membru parlamentu sira, ho maneira hanesan ba hotu-hotu, ho transparensia.

“Ita hotu iha ne’e tuir natureza parlamentu katak, ita hotu reprezenta povu Timor-Leste, povu ida ne’ebe aspira no merese duni atu hetan moris diak. Hosi premeriu legislatura to agora ita nia rai sei hasoru problema oin-oin hanesan kiak no mukit, eskluzaun social, falta de empregu, dependensia ba importasoens no problema seluk tan. Portantu ezizi estadu ida ne’e atu halo barak liu no diak liu. Estadu tenke lori dezenvolvimentu barak liutan atu alkansa dalan ba progresu no solidaridade nian, maibe atu dezenvolvimentu diak, estadu labele servisu mesak, presija partisipasaun no parseria hosi parte hotu-hotu, atu hatan ba dezafia ne’e”, afirma Aniceto.

Iha Aniceto nia diskursu mos nia promete atu halo mudansa ba servisu Parlementar nian. Nia hakarak halo servisu parlementu nakloke ba partisipasaun publik no mos lori Ministru relevante sira mai koalia ho parlementu bainhira persija.

Haree ba rezultadu elisaun hodi hili Prezidente Parlamentu Nasional ne’ebe rezulta katak diferensia votus ida deit. Ho rezultadu ida ne’e jornalista TAFARA.TL konfirma ho Prezidente PD, Mariano Asanami Sabino hatete katak, elisaun pesoal ne’e sempre lao normal, maibe presija konsolida jestaun, presiza hakuak malu. Ho aliansi ho partidu tolu hamutuk tuir mai tenke halo jestaun diak liu hodi bele metin liu. PD nia votus ne’e hatene ona katak totalidade.

Ba TAFARA.TL Asanami hatoo nia orgullu katak nudar jerasaun foun hodi kaer kargu foun. Aniceto ho saudozo Lasama nudar jersaun foun no hanesan ema RENETIL nian sente honra boot ida.

Iha tempu hanesan Sekretariu Jeral KHUNTO, Jose Agustinho da Silva ba TAFARA.TL esplika katak iha indikasuan ida ne’ebe la dun diak, maske iha ona komprimisiu no asina akordu.

“Mais bele dehan la dun solido, bele hetan influensia. Ohin ne’e ita haree selisih 1 suara tipsi la halimar, tempu ohin ne’e ita prolongga oras rua deit nee mak akontese hanesan ne’e, sa tan aban, hau hanoin dinamiku ba rezultadu ne’e bele oin seluk”, esplika Jose Agustinho.

Sekretariu Jeral KHUNTO husu ba Prezidente eleitu Aniceto Guterres atu bele sai Prezidente ba membru parlamentu hotu, iha spiritu akomodativu no demokratiku. Ideas no aspirasaun saida deit labele haree ba partidu maibe haree ba aspirsaun povu nian no interese estadu nian.

Iha parte sorin seluk, Deputadu PLP, Demetrio Amaral, ba TAFARA.TL hateten katak lakohi deskreve vota se, tanba elisaun liu ona. Maibe hakarak hatete deit katak metodolojia demokratiku ne’e fo dalan hili direita, nakloke no  segredu. Partidu lima manifesta tiha ona sira nia votus, katak votus ba se deit vitoria ba Timor-Leste.

Deputadu Demetrio Amaral ho nia espektativa katak hanesan prezidente Aniceto deskreve katak, promete atu sai prezidente ba parlamentu tomak no ba bankada hotu.

“Ami hotu espera katak sei materializa iha pratika no dezezu susesu iha nia lideransa, hodi parlamentu ida sai modelu ba produsaun lei sira, nakloke hodi rona lian sira ne’ebe lian laiha. No sai fiskalizador ne’ebe idak hodi ajuda governasaun ida ne’ebe moos no akuntabel”, hateten Deometrio Amaral.

Jornalista TAFARA.TL observa katak maski ikus mai votasaun ba Presidente Parlementu ne’e akontese duni, maibe diskusaun antes votasaun ne’e lori tempu barak tebes. Nota mos katak disiplina ba oras, kontinua sai dezafiu iha servisu Parlementu nian. Presidente Parlementu Nasional foun koalia ona kona ba puntualidade iha ninia diskursu, nune’e hein katak iha mudansa duni ba aspeitu ida ne’e.* [Zevonia Vieira | TAFARA.TL | Editor: Ato “Lekinawa” Costa | 05.09.2017].

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Jornalista Mak Fahe Informasaun Importane no Promove Debates

“Jornalista sira tenke iha responsabilidade, Adelino Gomes hateten jornalista laos hatene hakerek nutisia deit, laos …

Leave a Reply

Your email address will not be published. Required fields are marked *