Saturday , April 20 2019
Home / Sosial & Politika / Aniceto: OR baixa Sira Boikota Ne’e Atu Hamosu Krizi Inistituisional, Abel: La Akontese Krizi Tanba Lao Tuir Regras
Prezidente Parlamentu Nasional, Aniceto Guterres hasoru malu ho Prezidente da Republika, Dr. Francisco Guterres Lú Olo. [Foto: Zevonia Vieira | 13.12.2017]

Aniceto: OR baixa Sira Boikota Ne’e Atu Hamosu Krizi Inistituisional, Abel: La Akontese Krizi Tanba Lao Tuir Regras

“Atu paraliza funsionamentu parlamentu nasional tanba komisaun espesializada ne’e importante no fundamental tebes ba funsionamentu parlamentu nian. Ida ne’e mak akontese bainhira orsamentu retifikativu baixa, sira boikota. Hirak ne’e mak kondisaun atu hamosu krizi instituisional”. Aniceto

Prezidente Parlamentu Nasional, Aniceto Guterres hasoru malu ho Prezidente da Republika, hodi informa situasan politika ne’ebe lao iha hela, liu-liu iha Parlamentu Nasional.

Hafoin remata enkontru ba jornalista sira Aniceto Guterres hateten katak liu hosi enkontru ne’e informa situasuan politika, liu-liu iha Parlamentu nasional, orsamentu retifikativu ne’ebe agora iha Parlamentu no komesa aban ba oin sei lori ba plenaria hodi hetan diskusaun no aprovasaun hosi parlamentu nasional.

Hatan ba TAFARA.TL kona ba preokupasaun hosi Prezidente da Republika rasik liga ho situasaun politika rai laran, liu-liu iha Parlamentu Nasional.

Aniceto informa iha palacio Prezidensia, 13/12 katak Prezidente da Republika akompanna tanba ikus Prezidente da Republika mak sei hola desizaun ikus.

“Prezidente dehan informasaun ne’e diak no ajuda Prezidente da Republika bainhira halo desizaun para fo solusaun ba situasaun politika”, esplika Aniceto.

Liga ho rekursu ne’ebe hosi bankada opozisaun sei hatama ba meza parlamentu, ba TAFARA.TL Aniceto hateten katak ne’e direitu deputadu nian atu hatama rekursu ba ajendamentu Orsamentu Retifikativu ho ajenda seluk bele hatama rekursu no sei hare iha plenaria.

Karik mosu krizi instituisional iha Parlamentu Nasional relasiona ho statementu hosi opozisaun?

Aniceto konfesa katak, nungka hasai lia fuan ida ne’e, “ne’e opozisaun sira mak koalia dehan katak krizi instituisional. Uluk komesa kedas ho meza das komisoens, sira hadau hotu meza komisoens, menus ida deit komisoens C nian mak Fretilin kaer. Agora dadauk sira tenta atu troka fali. Ita hatene ona sira nia objetivu hadau hotu meza komisaun ne’e para atu obstakoliza, atu paraliza funsionamentu parlamentu nasional tanba komisaun espesializada ne’e importante no fundamental tebes ba funsionamentu parlamentu nian. Ida ne’e mak akontese bainhira orsamentu retifikativu baixa, sira boikota. Hirak ne’e mak kondisaun atu hamosu krizi instituisional, agora sira dun fali hau maka tu hamosu krizi. Konaba ajendamentu, hau ajenda tiha ona, hau marka tiha ona maibe sira lakohi, sira hakarak ne’e urjenti hotu, problema razaun atu husu urjensia ne’e laiha. Hau nudar Prezidente Parlamentu hau buka mais la hetan. Sira uza razaun sira ne’e hodi halo destituisaun atu hatun hau nudar Prezidente parlamentu”.

Iha parte sorin bainhira TAFARA.TL konfirma ho deputadu opozisaun, hosi bankada PLP, Abel Pires da Silva, liga ho rekursu ne’ebe bankada opozisaun sira ne’ebe fo ba meza parlamentu. Abel esplika katak rekursu ne’e atu kestiona kona ba Prezidente nia desizaun simu orsamentu retifikativu no too agora sedauk tau iha ajenda.

“Rekursu ne’ebe tama ne’e atu kestiona Prezidente nia desizaun tanba sa Prezidente simu. Tuir urutan normal ne’e rekursu ne’e ita debate lai mak foin kontinua tanba kuandu ita kontinua depois mak rekursu ne’e tama ba ajenda, para anula Prezidente nia desizaun, ne’e katak saida mak ita halo iha komisaun ne’e saugati deit, ne’e mak komisaun foin lalais ne’e la halo servisu kuandu sei iha rekursu, tanba rekursu ne’e iha nia impaktu ba komisaun nian servisu mais to agora sedauk resolve”, hateten Abel

Abel pires mos informa ba TAFARA.TL katak to agora la akontese krizi instituisional iha Parlamentu Nasional tanba funsionamentu iha parlamentu nasional lao tuir rejimentu, laiha ema ida mak halo intrepretasaun ninian atu lao mesak-mesak, buat hotu ne’e lao tuir regras no Konstituisaun.

“Se ita hotu lao tuir regras ne’e mosu krizi oinsa, laiha krizi tanba komisaun ohin deit sei halo servisu. Prezidente Parlamentu nasional mak sei iha razaun dehan katak atu labele halo plenaria tanba dehan orsamentu retifikativu ne’e lao hela. Ami nia pozisaun mak atu fo rekursu ba desizaun ne’ebe dehan orsamentu retifikativu lao hela. Situasaun ida ne’e la podia akontese se karik tuir rejimentu, ita idak-idak iha baze legal”, hateten Abel.*[Zevonia Vieira | TAFARA.TL | 13.12.2017]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Bankada Fretilin Sauda no Respeita PR nia Desizaun Promulga OJE 2019

Relasiona ho Prezidente da Republika, Francisco Guterres Lú Olo promulga Orsamentu Jeral Estadu [OJE] 2019, …

Leave a Reply

Your email address will not be published. Required fields are marked *