Friday , August 17 2018
Home / Siensia & Teknolojia / APFTL Divulga Informasaun Internet Saudavel, Zaulino: Uza Sala SosMed, Bele Fo Risku Ba Ema
Foto hamutuk ekipa No Partisipante atividade Child Online Protection iha São José Operario, klasse 11 (CSH) turma F. [Foto: Jonas da Silva | 05.06.2018]

APFTL Divulga Informasaun Internet Saudavel, Zaulino: Uza Sala SosMed, Bele Fo Risku Ba Ema

“Ohin loron media sosial ema barak utiliza sala, dalaruma problema mosu desentendimentu, bele fo risku fali ba ema nia vida, ema nia liberdade la iha tiha, konflitu ida agora makas ne’e konflitu iha media sosial”. Zaulino

Iha era teknolojia ne’ebe avansadu, halo ema hotu pasa nia tempu hodi uza sasan teknolojia sira hodi akompanna sira nia moris no atividades. Teknolojia hanesan sosial media halo sai hanesan ona fuan sorin ba ema barak, oinsa sira utiliza no fahe informasaun privadu ka geral ba ema hotu bele akompanna.

Sosial media ne’ebe nia funsaun ne’ebe lolos atu kria komunikasaun entre kolega sira iha rai laran ou dook, hodi fasilita sira atu informa ba malu maibe dala barak ema uza salah sosial media, liu-liu facebook hodi estraga ema ida nia privasidade.

Ho preokupasaun hirak ne’e Alumni Parlamentu Foinsa’e Timor-Leste [APFTL] ho membro Parlamentu Foisa’e sira divulga informasaun konaba Internet Saudavel/Child Online Protection ho objetivu foinsa’e sira asesu ona informasaun konaba internet saudável.

Prezidente APFTL, Zaulino da Silva iha abertura Internet Saudavel iha SAo Jose Operariu, hateten ohin loron media sosial ema barak utiliza sala, dalaruma problema mosu desentendimentu, bele fo risku fali ba ema nia vida, ema nia liberdade la iha tiha, “konflitu ida agora makas ne’e konflitu iha media sosial, ema trata malu, ema insulta malu, hau hanoin situasaun sira ne’e hotu, ita nia papel hanesan joven ita iha responsabilidade, atu asegura ita nia an para depois atu ita labele monu iha situasaun sira hanesan ne’e”.

Zaulino informa katak atividade ne’e hanesan divulgasaun informasaun kona ba Child Online Protection/internet Saudavel, hanesan atividadde husi APFTL ne’ebe mak hakerek mos iha planu asaun anual 2018 no realiza hamutuk ho alin Parlamentu Foinsa’e sira, hodi divulga informasaun ida ne’e, atividade ne’e APFTL hahu kedas iha 2016, kuaze iha munisipiu 8 liu liu ba eskola sekundaria sira, laos deit ba estudante sira APFTL mos sosializa ba inan aman sira, edukador sira, oinsa atu bele proteze mos oan sira atu utiliza.

Iha fatin hanesan Professor Responsavel Klasse 110 Turma F, Sekola Sekundaria Catòlica de São José Operário, Moises Vicenti hateten foinsa’e atu hatene uja sasan tau iha nia fatin, liu-liu atu asesu media sosial, tanba ohin loron media sosial ita uja sala ita sai vitima ba hahalok sira ne’e.

Estudante eskola sekundadria Catòlica de São José Operário Dili, Delzia Maria José de Deus mos hatoo hanoin katak atividade ne’ebe APFTL realiza, sira bele aprende liu tan kona ba utilizasaun internet ho diak.

“Ami bele aprende liu tan kona ba uza/asesu internet, dalaruma ema balu uja/asesu internet ladun domina an, dalabarak sira uja la kontrola an bele mosu konflitu barak, entaun hanesan ne’e ita persija uja internet ho diak atu nune’e bele asesu buat balu ne’ebe mak ita persija”, saran Maria de Deus, 05/06.

Delzia mos fo hanoin ba nia belun sira atu uja internet ho didiak, tanba la uja ho diak maka buat barak sei akontese ba ita no husu ba maluk sira hotu tenkeser uja ho kualidade.

Iha sorin seluk Estudante eskola sekundadria Catòlica de São José Operário Dili, Nuno Patricio de Araujo Pinto, hato’o sentimentu haksolok ba TAFARA.TL kona ba programa APFTL nian ne’ebe realiza, tanba ho programa sira ne’e bele hatene diak liutan, oinsa mak uza internet ho diak.

Atividade refere realiza ho orsamentu ne’ebe mai hosi kontribuisaun membro APFTL sira, ho montante $330.00, ne’ebe aloka ba divulgasaun fatin neen, inklui Eskola Sekundaria Sao Jose Operario, Atividade iha Sao Jose Operariu ne’e partisipa husi estudante 110 ano turma F. Departamentu Siensias Sociais e Humanidade, ne’ebé realiza iha dia 5 de Junho 2018. Entretantu atividade ne’e rasik realiza ona iha eskola sekundaria 4 de Setembru, Finantil, 12 de Novembru ho Canossa Has Laran iha fulan hirak liu ba, tuir planu sei realiza iha eskola ida tan, hodi kompleta ba eskola neen. * [ Yane Maia | Edito: Zevonia Vieira | TAFARA.TL | 05.06.2018 ]

About Yane Elfrida Maia

Check Also

INDMO Realiza Sertame ba Sentru Formasaun Publiku no Privadu

Institutu Nasional Dezenvolvimentu Mão de Obra (INDMO) loke sertame ba Sentru Formasain Publiku no Privadu. …

Leave a Reply

Your email address will not be published. Required fields are marked *