Monday , October 22 2018
Home / Sosial & Politika / Armando: Asegura Labarik Feto Sira Depois de Partus Fila Fali Ba Eskola
DILI- TIMOR LESTE- JULY 15, 2011: Generic photo of high school students in Dili on Friday, July 15, 2011. ADB / LUIS ENRIQUE ASCUI

Armando: Asegura Labarik Feto Sira Depois de Partus Fila Fali Ba Eskola

“Ha’u eskola SMA kelas tiga, la remata como ha’u isin rua tiha jadi ha’u lakontinua ona. Ha’u hakarak eskola fila fali, ha’u nia katuas oan mós la dehan ó labele eskola ona, ó iha oan ona ó labele eskola ona,” Nonoi

Problema konaba isin rua sedu, sai obstaklu ba feto foinsa’e sira ne’ebe hasoru problema refere iha sira nia moris, tanba isin rua sedu, sira la bele kontinua hanesan estudante hodi kontinua sira nia estudu iha eskola, ida ne’e parte hosi diskriminasaun hasoru feto?

Timor-Leste mós ratifika ona Convention Elimination of all Discrimination Against Woman (CEDAW), nune’e fó espasu boot ba feto sira hodi asesu ba buat hotu nune’e mós ba setor edukasaun (Art. 10).

Liga ho asuntu refere, TAFARA.TL halo entrevista ho Director Geral Secretaria Estado Igualdade Genero e Inclução Social (SEIGIS), Armando da Costa hatete katak firme nafatin atravez polítika abordajen integradu jenéru ne’ebé halo polítika ida ba ministeiru hotu, tenki implementa asuntu jenéru.

“Ita hakarak Ministeiru Edukasaun adopta polítika ida ne’ebé bele asegura labarik sira ne’ebé depois de partus fila fali ba eskola, pelumenus iha eskola públiku sira. Komitmentu ida ne’e Ministeiru Edukasaun hakarak, entermos diskusaun ita ko’alia ho sira ona, kona-ba ida ne’e maib’e ita iha prosesu ida que seidauk estabelese dokumentu ofisiál ida ne’ebé adopta husi ministeiru kona-ba situasaun ida ne’e,” Armando da Costa iha nia kna’ar fatin, SEIGIS Dili, 24/04/2018.

Armando realsa tan katak, partisipasaun labarik feto sira iha eskola, liu-liu sira ne’ebé durante periodu eskola sira hetan isin rua no tenki partu, ida ne’e tenki para duni eskola iha momentu balun, para hodi bele hala’o tiha prosesu ida isin rua nian ho tuur ahi. Asuntu ida ne’e ida foti duni,  inklui mós iha relatoriu CEDAW ne’ebé komité CEDAW mós fó fali rekomendasaun katak tenki iha polítika ida adekuadu no bele responde ba nesesidade ho situasaun alin feto sira ne’ebé depois de partus sira bele tama fali eskola. Ida ne’e sai hanesan ajenda importante ida husi SEIGIS.  dalabarak ko’alia kona-ba asuntu feto,  ko’alia liu feto ne’ebé maduro ka dewasa maibé iha kontekstu inkluzaun social, ne’e signifika mós feto no mós labarik feto sira, nune’e sira ne’ebé iha tinan eskola nian.

Iha parte sorin TAFARA.TL halo konfirmasaun ho Diretur Jerál Polítika Planeamentu i Parseria, Ministeiru Edukasaun, Antoninho Pires konaba dokumentu ofisiál polítika fila hikas ba eskola iha ona ka la’e?

Antoninho Pires hatan katak agora dadauk Timor seidauk iha, tamba agora dadauk iha hela situasaun emfaze polítika.

“Ami seidauk iha dokumentu ne’e I agora dadauk ami sei tenta rekolla dadus balun para depois haree ba dokumentu ida ne’e, dokumentu oinsá fila hikas ba eskola. No entanto ami iha tiha ona polítika ne’ebé uluk hatete katak ema hotu-hotu has direitu ba eskola, polítika ne’e klaru tiha ona, iha planu estratejiku I hotu-hotu tenki hakotu eskola tuir idade escolar,”hateten Antoninho.

Ministeiru Edukasaun ninia kna’ar ida mak halo asesoria nafatin, halo nafatin nia papel orientasaun ba eskola particulares, privadu sira, atu bele  haree ba polítika ne’ebé estadu, liu husi ministeiru traxa tiha ona, ida mak kona-ba oinsá mak garante ema hotu-hotu nia direitu hodi bele halo hotu ninia estudu tuir idade I garante asesu de kualidade edukasaun ba ema hotu, garante ninia equidade ba ema hotu, ba feto no mane tenki garante nia equidade.

Antoninho Pires ba TAFARA.TL mós halo esplikasaun kona-ba estudante sira, liu-liu feto sira ne’ebé mak kous iha eskola, kadeira sekundaria katólika nian, nia husu atu hakbesik ba Ministeiru Edukasaun hafoin partus, atu nune’e bele halo fila fali tranferensia ba eskola públika sira.

Iha sorin seluk, estudante feto ho naran inisial Nonoi (la’os nia naran lolos ) ne’ebé para nia eskola iha momentu finalista eskola sekundaria nian, senti triste tamba la konsege akaba nia eskola.

“Ha’u eskola SMA kelas tiga, la remata como ha’u isin rua tiha jadi ha’u lakontinua ona. Ha’u hakrak eskola fila fali, ha’u nia katuas oan mós la dehan ó labele eskola ona, ó iha oan ona ó labele eskola ona. Ha’u nia katuas oan mak sempre suporta ha’u, ha’u nia pai, ha’u nia mãe sempre suporta ha’u, sira dehan “se ó hakarak tenki eskola fali, buat hotu sempre hanusa ba mós tenki eskola fali, ó la eskola la halo buat ida.”,” dehan Nonoi ba jornalista TAFARA.TL.

Nonoi mós dehan tan, nu’udar feto ida nia la remata nia eskola ne’e nia senti triste los. Durante ne’e mós nia buka hela dalan hodi ema ruma ajuda nia maibé nia seidauk hetan. Nia mós tent aba hasoru diretor eskola públiku balun maibé nia la konsege marka audensia ho diretor refere tamba diretor refere oukupadu.

Nune’e mós ativista foinsa’e, Nelcia Guterres Belo ne’ebé mak durante ne’e halo sosializasaun ba prevensaun isin rua sedu, hatete katak ida ne’e durante ne’e nia haree katak feto mak sempre hasoru vitima iha komuniade.

“Hanesan feto hau interese tebes atu servisu iha asuntu ida ne’e tamba ha’u feto. Segundu iha komunidade nia leet feto mak sempre vitima iha aktus krime hotu. Feto lian la’ek tebes tamba ne’e ha’u reprezenta sira hodi hatutan sra nia lian  hodi buka solusaun ba problema hotu”.

Nia mós hatutan katak nia hili servisu ida ne’e atu konsensializa feto sira atu dehan lae ba kaben sedu no tau prioridade ba estudu.*[Maria do Céu | TAFARA.TL |24.04.2018].

About Maria do Ceu Gusmao

Maria do Ceu J.O. Gusmao, Jornalista, Webmaster no Marketing Officer iha TAFARA.TL desde tinan 2015 ate a data.

Check Also

MOFFE – CAUCUS Realiza Treinamentu Ba PARPOL, Marcelina: Hau nia Kontribuisaun Iha Partidu Importante

“Feto sira iha partidu laran halo mos servisu barak ba partidu nia susesu. Hau hakarak …

Leave a Reply

Your email address will not be published. Required fields are marked *